Amérikidiki Uyghurlar washin'gtonda jem bolup xitay we taylandqa qarshi naraziliq namayishi ötküzdi

7-Ayning 12-küni, yeni yekshenbe chüshtin kéyin sa'et 2:00 de amérikidiki Uyghur jama'iti washin'gton'gha jem bolup, xitay we tayland hökümetlirige qarshi naraziliq namayishi ötküzdi.

Paytext washin'gton hemde uninggha qoshna wirjiniye we mariylan shtatliridin yighilghan nechche yüzligen Uyghur jama'iti aldi bilen washin'gtondiki dupunt sirkul baghchisigha yighildi. Amérikidiki Uyghurlarning xitay we taylandqa qarshi naraziliq namayishigha hemdem bolush üchün bir qisim qérindash türk, ezerbeyjan we qazaq wekillirimu jem boldi.

Bu qétimliq namayishning küch körsitish yürüshi bashlinish aldida amérikidiki ezerbeyjan teshkilatigha wakaliten sabir bayramli ependi söz qildi.

Sabir bayramli ependi sözide dunyada hazir shimaliy siprusni öz ichige alghan 7 musteqil türkiy tilliq dölet mewjut bolsimu, emma ularning Uyghurlargha nisbeten héchqanche sahib chiqmighanliqini tekitlidi. U yene “Gerche bügün türkiye türk dunyasidiki yétekchi dölet bolush süpiti bilen Uyghurlar heqqide gep qiliwatqan bolsimu, lékin yenila yéterlik emes. Ezerbeyjan, qazaqistan we bashqa türkiy jumhuriyetlirining Uyghurlar heqqidiki awazi téximu yéterlik emes. Türk dunyasi choqum Uyghur mesilisi boyiche eng awan'gart sözchi we sahib bolushi kérek” dep körsetti.

Amérika Uyghur birleshmisining re'isi alim séytof namayishning resmiy bashlan'ghanliqini, namayishchilarning tertiplik we tinch usulda washin'gtondiki tayland elchixanisigha qarap yürüsh qilidighanliqini jakarlidi.

Nechche yüzligen namayishchilar qoshuni sa'et 2 din 20 minut ötkende dupunt sirkul baghchisidin qozghilip, heywetlik sep tüzüp tayland elchixanisigha qarap yürüsh qildi. Ay yultuzluq kök bayraq, amérika bayriqi we türkiye bayraqliri bilen birge washin'gton kochilirini qaplidi. Namayishchilarning sho'ar we sadaliri etrapni lerzige keltürdi.

Namayishchilar qoshuni washin'gtonning kona shehiri bolghan jorji tawin kochisigha yétip kelgende kochidiki kishiler toxtap namayishchilargha hörmet bildürdi. Bezi amérikiliqlar namayishchilar sépige qoshulup bille sho'ar towlidi. Beziliri namayishchilargha egiship hemdem boldi. Saqchi aptomobilliri namayishchilar aldida yol échip mangdi.

Namayishchilar qoshuni birqanche kilométir yol bésip, axiri jorji tawindiki tayland elchixanisi aldigha yétip keldi. Bügün yekshenbe bolghachqa gerche elchixana taqalghan bolsimu, lékin etraptiki nurghun kishiler bu yerge yighilip namayishni kördi. Amérika Uyghur birleshmisining mu'awin re'isi ömer qanat söz qilip, bügünki namayishning sewebi we meqsetliri heqqide chüshenche berdi.

Tayland elchixanisi aldida bir sa'ettek naraziliq bildürüsh namayishi dawam qilghandin kéyin, namayishchilar yene sep tartip, potomek deryasi boyidiki kochini boylap dupunt sirkulgha qaytip keldi. Bu qétimliq namayishni teshkilligen amérikidiki Uyghur putbolchi yashlar guruppisining wekilliri Uyghurche we in'glizche nutuq sözlep, özlirining jama'etke we ularning kolléktip küchige bolghan héssiyatlirini bayan qildi.

Axirida alim séytof xulase sözi sözlidi hemde bügünki namayishning ghelibilik axirlashqanliqini bildürdi.

Tepsilatini awaz ulinishtin anglighaysiz.