Washin'gton etrapidiki Uyghurlar namayish ötküzüp, xitay da'irilirining basturush heriketlirini qattiq eyiblidi

Muxbirimiz iltebir
2014.08.04
Share on WhatsApp
Share on WhatsApp
amerika-uyghur-yeken-namayish.jpg Xitay hökümitining yeken we bashqa jaylarda Uyghurlarning naraziliq heriketlirini basturush namida köpligen bigunah xelqni öltürgenlikige naraziliqini bildürüp ötküzülgen namayish. 2014-Yili 3-awghust, washin'gton.
RFA

Amérikining wérjiniye, meriylen shtatlirida we washin'gtonda yashawatqan Uyghurlar yekshenbe küni yeni 3-awghust küni washin'gtondiki xitay bash elchixanisi aldida jem bolup, xitay hökümitining yéqinda yeken we bashqa jaylarda Uyghurlarning naraziliq heriketlirini basturush namida köpligen bigunah xelqni öltürgenlikige naraziliqini bildürüp namayish ötküzdi.

Shu küni chüshtin kéyin bashlan'ghan namayishqa dunya Uyghur qurultiyining re'isi rabiye qadir xanim, Uyghur amérika birleshmisi, Uyghur kishilik hoquq, démokratiye fondi mes'ulliri bashchiliqida 200 din artuq kishi qatnashti. Xitay elchixanisining etrapini ayyultuzluq kök bayraqlar qaplighan bolup, jarangliq sho'ar sadasi kishiler qelbini titretmekte idi.

Namayish bashlinish aldida rabiye xanim nutuq sözlep, Uyghurlar wetinide yüz bériwatqan weqeler, xitay armiye, saqchilirining rehimsiz basturush heriketliri, Uyghurlarning pidakarliq bilen körsitiwatqan qarshiliq pa'aliyetliri shundaqla chet'ellerdiki Uyghur teshkilatlirining wezipiliri heqqide melumat berdi.

Dunya Uyghur qurultiyining re'isi rabiye qadir xanim Uyghurlarning nöwettiki jiddiy weziyiti heqqide heqiqiy, toghra uchur igilesh hemde buni chet'ellerde anglitish toghrisida toxtilip mundaq dédi:

Rabiye qadir xanim yene, chet'ellerdiki Uyghur pa'aliyetchilirini xitay da'irilirining buzghunchiliq heriketliridin hoshyar bolushqa chaqirip mundaq dédi:

Namayish dawamida dunya Uyghur qurultiyi we Uyghur amérika birleshmisining wekillirimu “Xitay hakimiyitining qanliq basturush jinayetlirini pash qilish, chet'ellerdiki Uyghurlarning her xil pa'aliyetlerni janlandurup, xitay dölet térrorchiliqigha bolghan qattiq ghezep nepritini ipadilesh” heqqide tesirlik nutuq sözlidi.

Namayishchilar qolliridiki pilakat we bayraqlirini égiz kötürüp, “Shi jinping qirghinchiliqni toxtat, xitay döler térrorchiliqni toxtat, Uyghurlargha erkinlik, Uyghurlargha höriyet, xitaylar wetinimizdin chiqip ket, sherqiy türkistan xelqige musteqilliq kérek!” dégendek sho'arlarni toxtimay towlap, özlirining qattiq iradisini namayan qildi.

Namayishqa shu küni chüshtin awwal washin'gton shehiride uyushturulghan medeniyet pa'aliyitige qatnashqan bir qisim Uyghurlarmu qolliridiki ayyultuzluq kök bayraqlirini lepilditip kélip qoshuldi.

Namayish chüshtin kéyin 5 lerge qeder dawamlashti.

Tepsilatini yuqiridiki awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.