Вашингтондики уйғурлар 1-өктәбир мунасивити билән хитайға қарши намайиш өткүзди

Мухбиримиз шөһрәт һошур
2014-09-30
Елхәт
Пикир
Share
Принт
Вашингтон вә униң әтрапидики уйғурлар хитай әлчиханиси алдиға топлинип намайиш өткүзди. 2014-Йили 30-сентәбир, вашингтон.
Вашингтон вә униң әтрапидики уйғурлар хитай әлчиханиси алдиға топлинип намайиш өткүзди. 2014-Йили 30-сентәбир, вашингтон.
RFA

30‏-Сентәбир күни йәни хитайниң 1-өктәбир дөләт байримидин бир күн бурун, вашингтон вә униң әтрапидики уйғурлар хитай әлчиханиси алдиға топлинип намайиш өткүзди. Намайишта алди билән дуня уйғур қурултийиниң рәиси, уйғурларниң мәниви аниси рабийә қадир ханим нутуқ сөзлиди.

Вашингтон әтрапидин келип топланған 100 гә йеқин намайишчилар ғәзәплик шоарларни товлап хитайниң қирғинчилиқ сиясәтлирини әйиблиди, тәшкилат рәиси алим сейитоф намайишқа йетәкчилик қилди. У сөзидә америка уйғур җәмийитиниң тор бетидә елан қилинған баянатиниң мәзмунлири һәққидә тохталди. Баянатта алди билән, хитай һөкүмити уйғур районида иҗра қиливатқан қанунсиз бастуруш һәрикәтлирини тохтитишқа вә қанун иҗра қилиштики хәлқара өлчәмләргә һөрмәт қилишқа чақирилди.

Баянатта, хитай дөлити қурулған чағда, ялғуз бир милләтниң, йәни хитай миллитиниң дөлити дәп қурулған әмәс, бәлки, көп милләтлик, көп мәдәнийәтлик бир дөләт дәп қурулған; шундақла, хитайдики һәрқайси милләтләрниң мәдәнийәт, тил, диний һоқуқлириниң капаләт астиға елинидиғанлиқиға вәдә берилгән. Шуңа хитай һөкүмити һеч болмиди дегәндә, хитай дөлитиниң қурулуш принсиплириға, йәни әркинлик, адаләт, баравәрлик вә уйғурларниң өз тәқдирини өзи бәлгиләш һоқуқиға һөрмәт қилиши керәк дейилгән.

Алим сейитоф баянатта йәнә, хитайниң нөвәттики ассимилятсийә сиясәтлири билән әркинлик сөйәр уйғур миллитини еритиветәлмәйдиғанлиқини, хитайниң йәнә тинчлиқ сөйәр уйғур миллитигә қарши қоллиниватқан дөләт террори билән, өз дөлитиниң пүтүнлүкини қоғдиялмайдиғанлиқини, әксичә йиқилишини тезлитидиғанлиқини әскәртти.

Бүгүн йәнә, хитай хәлқ җумһурийити қурулғанлиқиниң 65 йиллиқи болуш билән биллә, уйғур аптоном райони қурулғанлиқиниңму 59 йиллиқи. Шуңа бүгүн америка уйғур җәмийити хитайни аптономийә һоқуқиға һөрмәт қилишқа, уни дәпсәндә қилмаслиққа чақирди.

Нөвәттә, аптономийә қануниниң қәғәз йүзидә қепқалғанлиқи вә иҗра қилинмайватқанлиқи һәққидә тохталған намайишчилар, уйғурларниң аптономийә һоқуқиға, хитайниң мәрһәмити билән әмәс, бәлки қанлиқ җәңләрдин кейин еришкәнликини вә униң әйни чағдики сабиқ шәрқи түркистан миллий армийисиниң һәйвиси билән қолға кәлгәнликини илгири сүрди.

Бүгүнки бу намайиш, мустәқил тәтқиқатчи, илһам тохтиниң муддәтсиз қамақ җазасиға һөкүм қилинған вә хитай бүгүрдә 40 нәпәр уйғур пәрзәнтиниң хитай қораллиқ күчлири тәрипидин қанлиқ шәкилдә бастурулған мәзгилгә тоғра кәлди. Шуңа бүгүнки намайишта, илһам тохтиға берилгән җаза вә бүгүрдики қанлиқ бастурушқиму наразилиқ билдүрүлди.

Пикирләр (1)
Share

iliyar

Дин Türkiye/İstanbul

Sılernıg Bu Namayışlarıngıznı Kullaymen Allah Bütün Dünyada Yaşavatgan Uygur Türklerige Güç Kuvvet Bersin Rahmet

Oct 10, 2014 03:00 AM

Толуқ бәт