Uyghur xanim-qizliri Uyghurlar uchrawatqan zulumlarni tonushturdi

Xitay hökümitining Uyghur élide lagérlarni qurup bir milyondin artuq Uyghur qatarliq musulman xelqlerni qamighanliqi xelq'arada belgilik tesir qozghighan, uning Uyghurlargha qaratqan siyasetliri metbu'atlarda her xil shekilde qattiq eyibliniwatqan mezgilde, amérika-xitay ikki terep diplomatliri amérika xitay soda kéngishi qurulghanliqining 45 yilliqini tebriklesh ziyapiti ötküzdi.

Halbuki, 5-dékabir washin'gton we etraptiki sheherlerdin teshkillen'gen 10 neper Uyghur xanim-qizi ziyapet ötküzülüwatqan méhmanxana aldida sükütte turush sheklide ötküzgen naraziliq namayishi mezkur pa'aliyet ishtirakchilirining diqqitini Uyghur mesilisige mu'eyyen derijide tartti

Uyghur pa'aliyetchiliridin elfidar xanim ziyaritimizni qobul qilip, amérika-xitay soda kéngishi qurulghanliqining 45-yilliqi tebrikliniwatqan bu künni Uyghurlar uchrawatqan zulumini anglitishning, amérika we dunyadin Uyghurlargha köngül bölüshni telep qilishning yaxshi pursiti, dep bilip, bu namayishni mushu kün'ge toghrilighanliqini bildürdi.

Ular mezkur namayish arqiliq xitay bilen tijaret qiliwatqan amérika shirketliri we sodigerlerni mes'uliyetchan bolushqa, peqetla iqtisadiy menpe'etni dep xitayning Uyghurlargha qiliwatqan zulumining bir parchisi bolup qalmasliqqa agahlandurushni meqset qilghan. Ularning tinch yosundiki bu namayishi ziyapetke kelgen méhmanlar we bashqa kishilerningmu küchlük diqqitini tartqan.

Elfidar “Gerche hawa soghuq bolsimu, ötken-kechkenlerning diqqiti we ularning bizge köngül bölüshidin illiqliq hés qilduq” deydu.

Elfidarning tonushturushiche, nöwette Uyghur qiz-ayallardin teshkillen'gen bu guruppa yene xitay bilen hemkarlashqan amérika shirketlirige we xelq'araliq soda teshkilatlirigha xitayning Uyghurlargha séliwatqan zulumliri heqqide xet ewetishni, xitay bilen munasiwetlik her xil sorunlargha qatnishish pursetlirini qoldin bermey Uyghur weziyitini tonushturush pa'aliyetlirini dawamlashturmaqchi iken.