Ақсу айкөлдә йәнә икки нәпәр уйғур яш етиветилгән

Мухбиримиз шөһрәт һошур
2014-08-20
Share
qeshqer-saqchi-herbiy-uyghur-qarshiliq.jpg Коча чарлаватқан хитай қораллиқ күчлири. 2014-Йили 3-март, қәшқәр.
Imaginechina


Бүгүн радиомизға кәлгән бир намсиз хәттә баян қилинишичә, йеқинда ақсу айкөлдә икки нәпәр уйғур яш хитай әскәрлири тәрипидин етиветилгән. Хәттә йәнә баян қилишичә, әскәрләр етизда ишләватқан икки нәпәр яшни соал - сорақсизла етивәткән. Хәттә етиветилгән икки нәпәр яштин бириниң исминиң ясин қари икәнлики баян қилинған. Мухбиримизниң бу йип учиға асасән ениқлашлири давамида, вәқәниң 16 - авғуст йәни шәнбә күни айкөлниң һаса дегән йеридә йәни 19 - кәнттики сәйшәнбә базарда йүз бәргәнлики испатланди.

Айкөл йезилиқ сақчихана хадимлири дәсләптә вәқәдин хәвәрсизликини ейтти, арқидин вәқәдин хәвәрдар икәнликини, әмма алақидар учурларни ашкарилиялмайдиғанлиқини ейтти.

Соал: етиветилгән ясин қари дегән балиниң дадиси қайси орунда ишләйду?

Җаваб: қайси ясин қари у?

Соал: қайси күни етиветилгән балилардин бири. Вәқәдин хәвириңиз йоқму?

Җаваб: бу һәқтә башлиқлиримиздин мәлумат елиң.

Соал: вәқә қайси кәнттә йүз бәрди?

Җаваб: : буни мән дәп берәлмәймән?

Соал: билмәмсиз яки дәп беришни халимамсиз?

Җаваб: билимән, дәп берәлмәймән.

Соал: вәқә қайси күни йүз бәрди? биләмсиз - билмәмсиз?

Җаваб: билимән, дәп берәлмәймән.

Айкөлдә бир идариниң нөвәтчи хадими вәқә һәққидики учурни җәмийәттин аңлиғанлиқини, әмма идарә мәсуллириниң бу һәқтә өзигә мәлумат бәрмигәнликини ейтти. Униң баян қилишичә, өткән һәптә сақчилар, 20 - кәнттики бир өйгә кирип өй игисидин оғлини сүрүштә қилған, өй игиси оғлиниң өйи айрим икәнликини ейтқандин кейин, сақчилар у өйгә бесип кирип у өйдики оғулни соал - срақсизла етип ташлиған. Бу нөвәтчи хадимниң баян қилишичә, вәқәдә етиветилгәнләр икки нәпәр болуп, булардин бири 19 - кәнттин икән.

Биз йәнә 10 - кәнттики бир мәһәллә башлиқидинму әһвал игилидуқ. Бу мәһәллә башлиқи вәқә һәққидә өз әзалиридин мәлумат аңлиғанлиқини ейтти:

- Шәнбә күни сәйшәнбә базарға берип келиватқан әзалиримиз, йол үстидә етиветилгән бир балиниң җәситини көрүпту, җәсәтниң үсти йепиқлиқ икән. Йоллар тосуветилипту, сақчилар әзаларни башқа йол билән меңишқа буйрупту......

Һөрмәтлик радио аңлиғучилар, юқириқи мәлуматлардин қариғанда, етиветилгән икки яшниң бири, 20 - кәнт; йәни бирси 19 - кәнт әзаси икәнлики; бириниң өйидә, йәнә бириниң йол бойида йәни етизда етиветилгәнлики еһтималға йеқин көрүлмәктә. Әмма уларниң қандақ бир гуман яки қандақ бир җәрянда етиветилгәнлики һазирчә мәлум әмәс. Ақсу айкөлдә өткән йили роза һейт һарписида сақчилар билән амма арсида тоқунуш йүз бәргән, тоқунушта сақчилар аз дегәндә 13 кишини етип өлтүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт