Aqsu aykölde gumandar tuniyaz qurbanning étiz yaqilap su tutuwatqan chéghida étiwétilgenliki ashkarilandi

Muxbirimiz shöhret hoshur
2014.08.21
urumchi-basturush-5-iyul-305.jpg Ürümchi naraziliq namayishini basturush üchün ürümchige kirgen qoralliq eskerler. 2011-Yili iyul.
RFA


Hörmetlik radi'o anglighuchilar, biz tünügünki programimizda aqsu aykölde shenbe küni ikki neper déhqan yashning xitay saqchiliri étizda étiwétilgenliki heqqide xewer bergen iduq. Muxbirimizning weqe heqqidiki dawamliq éniqlashliri dawamida, étiwétilgen yashlardin birining 20 - kent ezasi 25 yashliq yasin awut ikenliki, yene birining bolsa 19 - kent e'azsi 26 yashliq tuniyaz qurban ikenliki ashkarilandi. Kent amanliq mudirining ashkarilishiche, saqchilar shenbe küni etigende tuniyaz qurbanni étiz yaqilap su tutuwatqan yéride, térrorluq guruppisining ezasi gumani bilen qorshawgha alghan we tuniyaz qurban qolidiki ketmenni derhal tashliwetmigenliki üchün, qarshlilashti dep qarilip étiwétilgen.

Biz awwal 20 - kent amanliq saqlash mudirigha téléon qilduq, u, öz kentide shenbe küni étiwétilgen yashning yasin awut ikenlikini, 25 yashliq yasin awutning öyide étiwétilgenlikidin xewer tapqanliqini, emma étilish jeryani we chétishliq délosidin xewersiz ikenlikini bayan qildi. Biz arqidin 19 - kent amanliq saqlash mudiridin melumat soriduq. U shenbe küni öz kentide étiwétilgen yashning tuniyaz qurban ikenlikini, uning étiwétilish jeryani heqqide saqchilardin resmiy melumat alalmighanliqini, emma shahidlardin weqening jeryani heqqide melumat igiligenlikini ashkarilidi. Uning bayan qilishiche, tuniyaz qurban shenbe küni etigende étizliqta su tutuwatqan bolup, u su yaqilap kitiwatqan mezgilide, 4 aptomobildin sekrep chüshken aqsu dölet amanliq saqchiliri teripidin étiwétilgen. Uning, weqeni körgen awut meqset isimlik bir déhqanning éghizidin anglighanlirigha asasen bayan qilishiche, saqchilar aptomobilidin sekrep chüshüp tuniyaz qurbanni aptomobilgha chiqishqa, uning yénidiki yene ikki déhqanni bolsa arqisigha chékinishke buyrighan. Déhqan awut meqset we ibrahim niyaz arqigha chékin'gen, tuniyaz qurban jayida midirlimay turghan ehwal astida, saqchilar oq chiqirip uni étiwétilgen. Shahid awut meqset tuniyaz qurbanning néme üchün étiwétilgenlikini chüshenmey qalghanliqini, peqet neq meydanda tuniyaz qurbanning qolida ketmen barliqini, shunga saqchilarning uning qolidiki ketmendin ürküp kétip, uni étiwetken bolush éhtimalliqini ilgiri sürgen. Amanliq saqlash mudiri awut meqsettin, tuniyaz qurban bilen saqchilar arisida talash - tartish bolghan - bolmighanliqini sorighanda, awut meqset, ariliqta talash - tartish qilishqudek waqitningmu ötmigenlikini bayan qilghan.

Biz yene 10 - kentning 5 - guruppa bashliqidinmu melumat soriduq. Guruppa bashliqi tuniyaz qurbanning eyni chaghda saqchilargha qarshliq körsetkenlikige a'it héchqandaq melumat yoqluqini, uning peqet saqchilar kelgende, motosiklitigha yolinip turghanliqi we yénida peqet ketmini barliqini, peqet ketmen yénida bolghanliqi üchünla étiwétilgenlikini otturigha qoydi. Biz yene weqening tepsilatini tuniyaz qurban étiwétilgen meydanda bar bolghan déhqan awut meqsetning öz éghizidin anglash üchün, guruppa bashliqidin awut meqset bilen téléfonda körüshtürüshni telep qilduq. U 20 minuttin kéyin bizni uchrashturidighanliqini éytti, emma 20 minuttin kéyin téléfon qilghinimizda, u téléfonimizgha jawab bermidi.

Hörmetlik radi'o anglighuchilar, yuqiriqi melumatlardin qarighanda, 26 yashliq tuniyaz qurbanning su yaqilawatqan mezgilde qolida ketmen tutqan halette étiwétilgenliki, uning hetta teslim bolush yaki qarshliq körsitish pursitimu bolmighanliqi aydinglashti. Emma, xitay saqchilirining déhqan awut meqset texmin qilghandek, tuniyaz qurbanning ketminidin ürküp kétip étiwetkenliki we yaki rayonda yürgüzülüwatqan basturush siyasetliridin jasaretlinip, uni tirik tutushni xalimay neq meydanda étiwetkenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.