8-Mart ayallar bayrimida Uyghur xanim-qizlar duchar boluwatqan mesililer bayan qilindi

8-Mart ayallar bayrimi munasiwiti bilen türkiyening qeyseri shehiride pa'aliyet élip bériwatqan sherqiy türkistan medeniyet we hemkarliq teshkilatining ayallar xizmitige mes'ul xadimi rabiye ilktürk bashchiliqidiki hey'et qeyseri atatürk meydanida muxbirlargha bayanat berdi. U bayanatida kommunist xitay hökümiti Uyghur élini igiligendin buyanqi yérim esir jeryanida xitayning Uyghurlargha élip bériwatqan bésim siyasitining barghanséri kücheygenlikini, buningdin eng köp ziyan-zexmetke uchrighanlarning Uyghur xanim-qizliri ikenlikini éytti.

Rabiye ilktürk xanim muxbirlargha bergen bayanatida yene Uyghur qizlirining xizmet nami bilen ichkirilerge élip bériliwatqanliqi, bigunah tutulup türmilerge tashlan'ghan, öltürülgen, iz-déreksiz yoq bolup ketken kishilerning ayallirining tul qalghanliqi, anilirining bolsa bala derdide qan yighlawatqanliqini éytti.

Rabiye xanim bayanatida, uzun yillardin béri Uyghur ayalliri bundaq derd-elemler ichide yashawatqan bolsimu, dunyadiki ayallarning derdini anglitiwatqan insan heqliri teshkilatlirining Uyghur xanim-qizlirining mesililirige yéterlik derijide köngül bölmeywatqanliqini bayan qildi shuningdek dunyaning herqaysi jayliridiki ammiwi teshkilatlarni we türk hökümitini Uyghur xanim-qizlirining mesililirige köngül bölüshke chaqirdi.

Arqidin qeyseridiki Uyghur xanim-qizlardin terkib tapqan 40 kishilik hey'et herqaysi siyasiy partiye we ammiwi teshkilatlarlarni ziyaret qilip, Uyghur ayallirini mesilisini anglatti. Bu pa'aliyetler toghrisida téximu köp melumat igilesh üchün rabiye ilktürk we Uyghur diyaridin yéngi kelgen ismini ashkarilashni xalimighan Uyghur xanim bilen söhbet élip barduq.