Голландийәдики уйғурлар барин инқилаби шеһитлирини әслиди

Ихтиярий мухбиримиз пидаий
2015.04.06
Muhammad-Yusup-qarim-Ilahi-oqumaqta-barin.jpg “барин инқилабида шеһит болған қериндашлирини әсләш паалийити” дә илаһи оқулмақта. 2015-Йили 5-апрел, голландийә.
RFA/Pidaiy

2015‏-Йили 5‏-апрел күни голландийәниң үтрехт өлкисигә қарашлиқ зәсйт шәһиридә өткүзүлгән “барин инқилабида шеһит болған қериндашлирини әсләш паалийити” ни явропа шәрқий түркистан маарип җәмийити тәшкиллиди.

Йиғинға һүсәйин тәҗәлли әпәнди риясәтчилик қилди. Паалийәт қуран керим тилавити билән башланди. Андин мәзкур җәмийәтниң рәиси ийса қариһаҗим барин инқилабиниң тарихи арқа көрүнүши вә иҗабий әһмийити һәққидә тәйярланған мәлуматларни сунди.

Йиғинда сөзгә чиққан диний зиялий абдулваһап қариһаҗим шеһитликниң дәриҗилири вә һәққанийәт йоллирида төләнгән бәдәлләрниң һаман бир күни мевиси көрүлидиғанлиқини тарихтики җанлиқ мисаллар билән чүшәндүрди. У бу һәқтә тохтилип, әсһабулкәһфдики һәққанийәтчиләрниң етиқадида мәһкәм туруши, 300 йилдин кейинки бир қовмниң һедайәт тепишиға сәвәб болғандәк, барин инқилабидики әзимәтләрниң қәйсәр роһи, шәрқий түркистанлиқларниң истиқбалиға бир сәвәб болуп қалғуси дәп үмид қилидиғанлиқини билдүрди.

Паалийәттә йәнә, шеирлар декламатсийә қилинди вә илаһий оқулди. Паалийәткә голландийәдики уйғурлар һәмдә ханим-қизларму иштирак қилди.

Мәзкур җәмийәт мәркизидә елип берилған бу паалийәт шу йәр вақти саәт 14 дин 19 ға қәдәр давам қилди. Паалийәт әһли арилиқтики дәм илишларда бирликтә ғизалинип вә намаз оқуп қериндашлиқни чеңитти, өз-ара һал-муң ейтишти. Паалийәт ахирида әркин бәс муназирә қилип қайтишти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.