Gollandiyediki Uyghurlar barin inqilabi shéhitlirini eslidi

Ixtiyariy muxbirimiz pida'iy
2015.04.06
Muhammad-Yusup-qarim-Ilahi-oqumaqta-barin.jpg “Barin inqilabida shéhit bolghan qérindashlirini eslesh pa'aliyiti” de ilahi oqulmaqta. 2015-Yili 5-aprél, gollandiye.
RFA/Pidaiy

2015‏-Yili 5‏-aprél küni gollandiyening ütréxt ölkisige qarashliq zesyt shehiride ötküzülgen “Barin inqilabida shéhit bolghan qérindashlirini eslesh pa'aliyiti” ni yawropa sherqiy türkistan ma'arip jem'iyiti teshkillidi.

Yighin'gha hüseyin tejelli ependi riyasetchilik qildi. Pa'aliyet qur'an kérim tilawiti bilen bashlandi. Andin mezkur jem'iyetning re'isi iysa qarihajim barin inqilabining tarixi arqa körünüshi we ijabiy ehmiyiti heqqide teyyarlan'ghan melumatlarni sundi.

Yighinda sözge chiqqan diniy ziyaliy abdulwahap qarihajim shéhitlikning derijiliri we heqqaniyet yollirida tölen'gen bedellerning haman bir küni méwisi körülidighanliqini tarixtiki janliq misallar bilen chüshendürdi. U bu heqte toxtilip, es'habulkehfdiki heqqaniyetchilerning étiqadida mehkem turushi, 300 yildin kéyinki bir qowmning hédayet tépishigha seweb bolghandek, barin inqilabidiki ezimetlerning qeyser rohi, sherqiy türkistanliqlarning istiqbaligha bir seweb bolup qalghusi dep ümid qilidighanliqini bildürdi.

Pa'aliyette yene, shé'irlar déklamatsiye qilindi we ilahiy oquldi. Pa'aliyetke gollandiyediki Uyghurlar hemde xanim-qizlarmu ishtirak qildi.

Mezkur jem'iyet merkizide élip bérilghan bu pa'aliyet shu yer waqti sa'et 14 din 19 gha qeder dawam qildi. Pa'aliyet ehli ariliqtiki dem ilishlarda birlikte ghizalinip we namaz oqup qérindashliqni chéngitti, öz-ara hal-mung éytishti. Pa'aliyet axirida erkin bes munazire qilip qaytishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.