Gérmaniyede “Barin weqesi” ning 28 yilliqini xatirilesh namayishi ötküzüldi
2018.04.05
5-Aprél küni gérmaniyening myunxén shehiride buningdin 28 yil muqeddem yüz bergen “Barin weqesi” ni xatirilesh namayishi ötküzüldi.
5-Aprél küni myunxén shehiridiki xitay konsulxanisi aldida ötküzülgen bu namayishni “Yawropa sherqiy türkistan birliki” teshkilligen bolup, namayishqa myunxén we yéqin etraptiki sheherlerdin kelgen köp sandiki Uyghur jama'iti qatnashti.
Namayish bashlinish aldida myunxén shehiridiki Uyghur moysipitliri we siyasiy aktipliri aldi bilen “Barin weqesi” ning jeryani, tarixiy ehmiyiti, uni her yili xatirileshning muhimliqi heqqide Uyghur jama'itige chüshenche bérip ötti.
Bu qétimliq namayish jeryanida “Yawropa sherqiy türkistan birliki” ning re'isi turghunjan alawudun ependi ziyaritimizni qobul qilip, “Barin weqesi” ni xatirilesh namayishini uyushturushtiki meqsetler heqqide toxtaldi.
Mezkur teshkilatning mu'awin re'isi esqerjan ependi gérman jama'itige “Barin weqesi” heqqide melumat berdi. Namayish jeryanida myunxéndiki jama'et erbabliridin ablimit tursun ependimu söz élip, xitayning atalmish “Yépiq terbiyelesh merkizi” namidiki yighiwélish lagérlirida dawam qiliwatqan éghir zulumlarni bayan qilip ötti.
Namayishchilar namayish jeryanida Uyghurche, gérmanche, xitayche sho'arlarni towlap, xitay konsulxanisi aldini lerzige saldi. Myunxéndiki Uyghur jama'et erbabliridin zébibulla ependi ziyaritimizni qobul qilghanda, Uyghur millitining “Barin weqesi” ni ebediy untumaydighanliqini eskertti.
Bir yérim sa'et dawamlashqan bu namayishqa sherqiy türkistanning ay-yultuzluq kök bayraqliri bilen türlük lozunkilar élip kélin'gen bolup, lozunkilargha yézilghan sho'ar we belgiler kochidin ötken-kechken gérman jama'itige Uyghurlar nöwette duch kéliwatqan zulumlarni anglitish rolini ötidi.