Bay kömürkan hujumchiliri 56 kün ichide xitay terep bilen az dégende 4 meydan urush qilghan
2016.11.07

Ötken yili 18-séntebir küni yüz bergen bay kömürkan hujumi heqqide xitay metbu'atliri weqedin 56 kün ötkende xewer bergen we bergendimu, cholta bergen idi. Radiyomiz weqe heqqide dunyagha deslepte uchur bergen we weqe gumandarlirining kimlikliri heqqide nisbeten tepsiliy melumat ashkarilighan bolsimu, 56 kün'ge sozulghan bu hujum qilish, chékinish we qiriwétilish jeryanining tepsilati heqqide melumat alalmighan. Xitay metbu'atliri 2-noyabir küni tarqatqan mezkur weqe heqqidiki yéngi mexsus xewiride ene shu jeryanlar heqqide yene bir qisim melumatlarni ashkarilidi. Melum bolushiche, hujumchilar 56 kün ichide xitay terep bilen az dégende 4 meydan urush qilghan.
Ilgiriki éniqlashlirimizda 18-séntebir küni memet eysa, musa toxtiniyaz we tursun jüme qatarliq kömürkan hujumchilirining soghan kömür kénining qarawulxanisi we ishchilar yataq binasigha hujum qilghandin kéyin, özliri saqchixanigha téléfon qilip délo melum qilghanliqi we saqchilar yétip kelgende yoshurun'ghan yéridin étilip chiqip 5 neper saqchini öltürgenliki heqqide xewer bergen iduq. Xitay metbu'atliri weqe yüz bérip 56-küni ashkarilighan xewiride hujumchilarning 18-séntebir küni ishchilar yataq binasigha hujum qilghanliqini, xitay qoralliq qisimlirining hujum gumandarlirini öngkürde qorshap otchachar bilen qiriwetkenlikini xewer qilghan idi. 2-Noyabir shinxu'a tori we s s t w ning xewiride, hujumchilarning kömürkan'gha hujum qilghandin kéyin, saqchilargha pisturma hujum yeni tuzaqqa dessitip hujum qilghanliqi tilgha élin'ghan. Shundaqla hujumchilarning qolidiki aptomatik qoralning saqchilarning qolidin tartiwélin'ghanliqi we bu qorallarning xéli ilghar derijilik qoral ikenliki ashkarilan'ghan.
Weqe dawam qiliwatqan aylarda, yeni gumandarlar kömürkandin chékin'gen we xitay qoralliq qisimliri qoghlap zerbe bérish herikiti élip bériwatqanda, radiyomizgha kelgen bir inkasida, hujumchilarning qéchish dawamidimu, xitay qoralliq küchlirige éghir zerbilerni bergenliki tilgha élin'ghan bolsimu, emma inkasning menbesi éniqsiz bolghachqa, bu tepsilatlar radiyomiz teripidin xewer qilinmay turghan idi. Bu yilning béshida xitay j x tarmaqliri, memliket boyiche qehrimanlar tizimlikini élan qilghan we tizimliktiki ikki neper qehrimanining kömürkan hujumchilirini qoghlap zerbe bérish dawamida ölgenliki tilgha élin'ghan, bu radiyomizgha kelgen yuqiriqi inkasning toghriliqini delilligen idi. Yeni xitayning bay nahiyisidiki alahide saqchi etritining mu'awin bashliqi shyaw kéyün we uning bir sepdishi, kömürkan hujumchilirining qolida jan bergen. Xitayning bu qétimqi xewerliride, kömürkan hujumchiliri bilen axirqi jengning 12-noyabir küni yüz bergenliki tilgha élinish bilen birlikte, uningdin ilgiri yeni 28-öktebir künimu bir qisim gumandarlar bilen bir meydan urush bolghanliqi tilgha élin'ghan. Xitayning 2-noyabir tarqatqan xewiride, weqede aman qalghan we kömürkan hujum gumandarlirini yoqitishqa qomandanliq qilghan wang gang isimlik qoralliq saqchi qisim bashliqining ish-izliri nuqtiliq halda teshwiq qilin'ghan. Melum bolushiche, wang ganggha térrorgha qarshi awan'gart dep nam bérilgen. Emma xewerde wang gangdin bashqa qehrimanlirining héchqaysining nami tilgha élinmighan.
Xewerde oxshashla weqe gumandarliri qatarigha kirgüzülgen we öngkürde otchachar bilen qiriwétilgen ana-balilar heqqide yenila héchqandaq uchur bérilmigen, hetta ilgiri öginish dolquni qozghighan saqchi bashliqi memet toxtiniyaz we weqening birinchi küni pisturma hujumda ölgen térekbazar saqchixana bashliqi wu féng qatarliqlarning nami tilgha élinmighan. Buningdin xitay da'irilirining bay weqesi heqqidiki uchurlarni yenila sezgür uchurlar qatarida yoshuruwatqanliqi, ashkarilawatqan parchilirinimu tolimu éhtiyat bilen ashkarilawatqanliqi melum bolmaqta. Eyni chaghda Uyghur közetküchilerdin memet toxti ependi, xitayning bay weqesi gumandarlirini ana-bala dep ayrimasliq we top-yekün qirghin qilish, shundaqla xelq'arada cheklen'gen qorallarni ishlitish arqiliq, urush jinayiti sadir qilghanliqini ilgiri sürgen idi. Xitayning bay weqesi uchurlirini bu derijide cholta we éhtiyat bilen élan qilishi da'irilerning közetküchiler sadir qildi dewatqan urush jinayitining ashkarilinishidin qorqush sewebidin yaki rayondiki Uyghur yashlirining xitaygha qarshi jasaretlinip kétishidin endishe qiliwatqanliqi hazirche melum emes.