Bay weqeside ölgen saqchilarning 6 neper emes, az dégende 9 ikenliki ashkarilandi

Muxbirimiz shöhret hoshur
2016-01-11
Share
bay-weqesi-saqchixana-saqchi.jpg Bay weqeside ölgen saqchilar: üstünki qur soldin onggha: 1. Wu féng, bay térekbazar saqchixanisi bashliqi, 2. Shyaw kéyün bay nahiyilik alahéde saqchi etiritining mu'awin bashliqi, 3. Xong jiyenwin, térekbazar saqchixana xadimi, 4. Lo tiyenyong, bay nahiyilik alahéde saqchi etiritining xadimi
Uyghur rayonidiki saqchilarning melum bir undidar topidin élindi

Ötken yil 18 - séntebir bay nahiyiside yüz bergen soghan kömürkan hujumini 56 kün kéchiktürüp élan qilghan xitay axbarati hujum yüz bergen küni 3 resmiy, 2 yardmchi saqchining ölgenlikini, gumandarlarni qoghlap zerbe bérish jeryanida aqsu wilayetlik saqchi idarisining mu'awin bashlighi memet toxtiniyazning ölgenlikini xewer qilghan idi, emma charlash dwamida ölgen saqchilarning omumi sani heqqide toxtalmighan idi. Bügün rayondiki melum bir saqchilar ündidar topida tarqalghan bir uchurdin ashkarilinishiche charlash dawamida memet toxtiniyazdin bashqa yene bay nahiyilik alahide saqchi etritining mu'awin bashliqi shyaw kéyün qatarliq 3 saqchiningmu ölgenliki ashkarilandi. Mezkur uchurda memet toxtiniyazdin bashqa 8 saqchining resimi we ulargha bérilgen nam we ular üchün oqulghan mersiye orun alghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu:

Hörmetlik radi'o anglighuchilar, bügün ündidarda tarqalghan bir uchurdin ashkarilishiche, xitayning bay kömürkan hujumchili'irini izdesh we zerbe bérish opiratisiyesi dawamida, bay nahiyilik alahide saqchi etritining mu'awin bashliqi shyaw kéyün, alahide saqchi xadimi lotyenyong we yardemchi saqchi yaqup yasin qatarliq 3 saqchimu ölgen. Xitay axbarati hazirgha weqede saqchi tereptin 6 kishining ölgenlikini tilgha alghan؛ opératsiye dawamida ölgen yuqiriqi 3 saqchi heqqide héchqandaq melumat bermigen idi. Bügünki ündidar xewiride bay weqeside ölgen memet toxtiniyazdin bashqa 8 neper saqchi heqqide melumat bérilgen. Bulardin 4 nepiri xitay millitidin bolup, bular térek bazar saqchixanisining bashliqi wu féng, mezkur saqchixana xadimi xong jyenwén, bay nahiyilik alahide saqchi etritining mu'awin bashliqi shyaw kéyün we alahide saqchi xadimi lo tyenyong qatarliqlar؛ xewerde bildürilishiche bu töt saqchigha"Inqilabiy qorban" we 2 - derijilik xizmet körsetken qehriman dep nam bérilgen. Qalghan 4 neper saqchi Uyghur bolup, bular abduzayir qurban, ekber osman, yaqup yasin we ilyas toxti qatraliqlar, bulardin abduzayir qurban térek bazar saqchixanisining resmiy saqchisi bolup, uninggha"Inqilabiy qurban" we 2 - derijilik xizmet körsetken qehriman dep nam bérilgen؛ qalghan üch nepiri yardemchi saqchi bolup ulargha peqet "Inqilabiy qurban" depla nam bérilgen.

Bu ashkarilan'ghan 8 kishidin 5 nepirining kimliki radi'omizning ilgiriki xeweriliride tilgha élin'ghan bolup, bu uchur radi'omizning ilgiriki xewerlirining toghriliqini yene bir qétim delillidi. Bügünki bu saqchilarning ündidar uchurida yene mezkur 8 shexske qarita yézilghan bir mersiyemu orun alghan. Mersiyede ularnng atalmish baturluqi we pidakarliqigha apirinlar oqulup, ularning xitay dölet bixeterliki we jem'iyet amanliqigha zor töhpe qoshqanliqi mu'eyyenleshtürülgen. Mana bu, bay weqeside öltürülgen saqchilardin memet toxtiniyazdin bashqilirining kilimlikining tunji qétim ashkarilinishi bolup hésablinidu.

Bu xewerge asaslan'ghanda bay weqeside ölgen saqchilarning sani xitay ilgiri élan qilghandek 6 neper bolmastin belki az dégende 9 neper. Bulardin üch nepiri saqchi emeldari. Weqede ölgen emeldarlar sani nezerde tutulsa, bay kömürkan hujumi yéqinqi yillardin béri Uyghur rayonida yüz bergen qarshiliq heriketliri ichide xitay saqchilirigha bir nöwet éghir zerbe bergen bir heriket bolup hésablinidiken. Chünki ilgiriki weqelerde yekende bir qoralliq qisim etritining bashliqi, sériqbuya weqeside bir saqchi ponkiti bashliqi öltürülgen bolsimu, bir qétimliq weqede saqchi tereptin 3 emeldarning öltürülüshi tunji qétim bolup hésablinidu. Xitayning bay weqesi heqqidiki xewerliri üstide pikir bayan qilghan Uyghur közetküchiler, xitayning xitay saqi we köchmenlirini ürkütüp qoymasliq we Uyghur qarshlilashquchilarni jasaretlendürüp qoymasliq üchün weqeni kéchiktürüp xewer qilghanliqi, bolupmu ölgen saqchilarning kimliki we sanini sir tutup kéliwatqanliqini otturigha qoyghan idi:

Kanada turushluq siyasiy weziyet analzichisi memet toxti bu heqte : "Xitayning rayondiki istratégiyilik nishanliridin biri rayonning démograpiyesini özgertish yeni xitay nopusini mutleq üstün orun'gha ekilish, bu yalghuz nopus yötkesh bilenla emelge ashmaydu, yötkelgen nopus u yerde turushi kérek, turush üchün ularda xatirjemlik tuyghusi bolushi kérek, bundaq weqelerde saqchilarning ölgenlik xewirini bérish mezkur istratégiyilik nishan'gha mas emes, shunga xitay xewerliride saqchilarning kimliki we öltürülüsh jeryani tilgha élinmidi dep qaraymen" dédi.

Bay weqeside ölgen saqchilarning kimliki we sani heqqidiki yuqiriqi yéngi uchurlar, bay weqesining tepsilati heqqide hazirghiche élan qilin'ghan melumatlarda yene köpligen kemtüklüklerning barliqi éhtimalliqini otturigha chiqarmaqta. Bayda qoghlap - zerbe bérish opératsiyisi dawam qiliwatqan mezgilde, shiwitsiyediki "Sherqi türkistan teshwiqat merkizi" gumandarlarning qéchish jeryanidimu saqchilargha éghir zerbe bergenliki, bezi Uyghur charlighuchilarning gumandarlarning sépige qétilip ketkenliki, bir qisim gumandarlarning xitay metbu'aliri opératsiye axirlashti dégen chaghdimu téxi tutulmighanliqi heqqide radi'omizgha bezi uchurlarni yollighan, emma bu uchurlar eyni chaghda baydiki da'iriler yaki ahaliler teripidin delillenmigenliki üchün xewer qilinmighan idi. Weqede ölgen saqchilarning yuqiriqi yéngi tizimliki, ene shu xewer qilinmighan uchurlarning pütünley asassiz emeslikini körsetmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet