Uyghurlarning derd-ehwali b d t da etrapliq anglitilmaqta

Ixtiyariy muxbirimiz ekrem
2017-09-19
Élxet
Pikir
Share
Print
Dolqun eysa ependi b d t kishilik hoquq kéngishining doklat hazirlighuchi alahide xadimi michél forst(Michél Forst) bilen söhbettin kéyin xatire sürette. 2017-Yili 19-séntebir, jenwe.
Dolqun eysa ependi b d t kishilik hoquq kéngishining doklat hazirlighuchi alahide xadimi michél forst(Michél Forst) bilen söhbettin kéyin xatire sürette. 2017-Yili 19-séntebir, jenwe.
RFA/Ekrem

D u q rehberliri b d t 36-nöwetlik kishilik hoquq kéngishi yighinida Uyghurlar mesilisini etrapliq anglatmaqta.

11-Séntebir bashlan'ghan, 27- séntebirgiche dawam qilidighan jenwediki birleshken döletler teshkilati (b d t) kishilik hoquq kéngishining 36-nöwetlik yighinigha Uyghurlargha wakaliten d u q bash katipi, wakaletsiz milletler teshkilatining mu'awin re'isi dolqun eysa, qurultay programma mudiri pitér érwin we qurultay xizmetchisi rayin ependiler qatnashmaqta idi. Ular birqanche kündin buyan yighinlarda nutuq sözlesh, b d t aliy komissarliqi xadimliri bilen uchurushush we herqaysi ellerning b d t diki elchiliri bilen ayrim söhbetler élip bérishtek shekillerde, Uyghurlarning nöwettiki qéyin weziyitini tepsiliy anglitip kelgen.

Shiwétsariyening jenwe shehiridiki b d t din ziyaritimizni qobul qilghan dolqun eysa ependi, bügün we aldinqi birqanche künlerde b d t da élip barghan pa'aliyetliri toghrisida bizni birqisim uchurlar bilen teminlidi.

Dolqun eysa ependi 18-séntebir küni yighinda Uyghur tili mesilisini otturigha qoyush bilen birge, yighindin kéyin b d t ning ghayib qiliwétilgenler mesilisige mes'ul xadimliri bilen ayrim uchriship, 2009-yilidiki 5-iyul ürümchi weqesidin buyan iz-déreksiz ghayib bolghan Uyghurlar mesilisini anglatqan. U yene, tayland, kambodzha, misir qatarliq ellerdin xitaygha qayturulghandin kéyin iz-déreksiz yoqap ketken Uyghurlar mesilisinimu tilgha alghan.

D u q programma mudiri pitér érwin ependi, 11-séntebirdin bashlan'ghan b d t diki pa'aliyetlirining belgilik ünüm yaratqanliqini eskertti. U mundaq dédi: "D u q ning bu yil b d t da élip barghan pa'aliyetlirining mezmuni herxil, doklat bérish qétim sani köp, waqti uzun boldi. Bu sewebtinmu, köpligen döletlerning bu yerdiki elchiliri we kishilik hoquq teshkilatliri Uyghurlar mesilisige alahide diqqet qildi. Beziler yighin meydanida yaki sirtqa chiqqandin kéyin, özlirige qarangghu bolghan nuqtilar heqqide so'allar sorap, Uyghurlarning nöwettiki weziyitini hemde xitay hakimiyitini ichkirilep chüshinishke tirishti. D u q teripidin 2 aydin buyan teyyarliq qilip hazirlan'ghan Uyghurlarning weziyitige a'it doklatlar köpligen kishilerge tarqitildi. Buning choqum yaxshi tesiri bolidu, dep oylaymen".

Bügün 19-séntebir küni, dolqun eysa ependi amérikaning b d t diki elchisi bilen körüshüp, amérika hökümitining Uyghurlar mesilisige téximu jiddiy köngül bölüshini telep qilghan. U, bügün yene b d t kishilik hoquq kéngishining alahide doklat hazirlighuchi xadimi bilen mexsus söhbet ötküzüp, xitay hökümitining Uyghur kishilik hoquq pa'aliyetchilirige séliwatqan ziyankeshlikini anglatqan.

D u q wekilliri 20-séntebir küni chaqirilidighan b d t ning omumiy yighinida, misirda tutqun qilin'ghan we türkiyede panahlinip turuwatqan Uyghurlar mesilisini nuqtiliq otturigha qoyidiken.

Toluq bet