Aqsuda beden chéniqturghan yashlar térrorluq gumani bilen tutqun qilindi

Muxbirimiz shöhret hoshur
2014.07.04
xitay-saqchi-uyghur-qizi-chong-bazar.jpg Xitay qoralliq küchlirining xelq'araliq chong bazar etrapida kocha charlawatqan körünüshi. 2009-Yili 14-iyul, ürümchi.
AFP


Aqsu awatning besh'ériq yézisida 20 nechche neper yash beden chéniqturghanliqi we öyliridin beden chéniqturush eswapliri tépilghanliqi üchün térrorluq gumani bilen tutqun qilin'ghan. Bulardin ikki nepiri ayal bolup, 17 - 18 nepiri yéziliq saqchixanida tutup turulmaqta, qalghanliri nahiyilik jama'et xewpsizlik idarisigha tapshurup bérilgen. Bu ehwal, nöwette Uyghur rayonining herqaysi nahiyeliride ötküzülüwatqan ochuq meydan sotliridiki gumandarlarning atalmish jinayi arqa körünüshinimu belgilik derijide yorutup bermekte.

Xewerlerdin ashkarilinishiche, 22 - may etigenlik bazargha hujum qilish weqesidin kéyin Uyghur rayonining herqaysi nahiyeliride keng kölemlik ochuq meydan sotliri échilmaqta. Bu heqtiki xitay xewerliridin gumandarlarning térrorluq bilen eyiblen'genliki melum bolsimu, emma ularning konkrét qandaq bir weqeni sadir qilghanliqi, yeni eyiblinishke seweb bolghan jinayi pakitliri melum emes. Shunga biz bu heqte melumat élish üchün, rayondiki herqaysi saqchixanilargha téléfon qilduq.

Xadim: besh'ériq saqchixanisi !

Muxbir: silerning yézida eng yéqinda yüz bergen weqe qaysi weqe?

Xadim: térrorluqqa chétishliq kishiler tutuldi.

Muxbir: jem'iy qanche kishi tutuldi?

Xadim: birqanchisini nahiyige tapshurup bériwettuq. 17 - 18 I saqchixanimizda bar.

Muxbir: bular qanche yash etrapidiki kishiler?

Xadim: eng chongi 25 yash, 18 yash bilen 25 arisida, ikki nepiri ayal.

Muxbir: bular néme ish qilghan, qandaq weqe sadir qilghan kishiler?

Xadim: beden chéniqturghan, öylirini axturghan waqtimizda beden chéniqturidighan eswaplar bayqalghan.

Muxbir: undaqta, bularning emeliy sadir qilghan bir ishi yoq oxshimamdu?

Xadim: térrorluqni pilanlawatqan chéghida bayqilip tutuldi.

Muxbir: ularning bir yerge toplashqan, yighin achqan ehwali barmiken?

Xadim: yoq, qol téléfonliri bilen alaqilashqan.

Muxbir: ularni tutush jeryaninglarda qarshliq körsetkenler boldimu?

Xadim: yaq, bolmidi.

Muxbir: mushu gumandarlarni tutush jeryaninglarda meyli saqchi yaki gumandarlar tereptin ölgen, yarilan'ghanlar boldimu?

Xadim: yaq, bolmidi. Hazir saqchixanimizda tutup turuluwatqanlargha siyasiy telim - terbiye élip bériwatimiz.

Biz yene bu heqte bir qisim ahalilerdinmu melumat igiliduq:

Muxbir: sizche, saqchilarning bu derijide zorawanliqi néme sewebtin kélip chiqiwatidu?

Ahale: menche peqet we peqet térrorluqqa bir yil qarshi turimiz dégenliki üchünla bolup kétiwatqan ishlar bu?

Hörmetlik radi'o anglighuchilar, ahalilerdin igiligen melumatlirimizdin qarighanda, xitay hökümiti Uyghur rayonida bir yil térrorluqqa zerbe bérish dolquni qozghighandin kéyin, asasiy qatlamlardiki saqchi orunliri wezipe orunlash we yuqirigha doklat sunush üchün, burun jaza mudditini tügitip bolghan sabiq mehbuslarnimu qayta tutqan, burun gunahsiz dep qoyuwétilgen gumandarlarni qaytidin yighqan. Eger bundaq sabiq mehbus we gumandarlarning sani köp bolmighan ehwal astida, yuqiriqigha oxshash, yeni beden chéniqturushqa oxshash térrorluq bilen héch alaqsi bolmighan ishlarnimu térrorluqqa pakit dep körsitip tutqun élip barghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.