Parat ötküzülgen béyjingdin yiraqtiki Uyghur élidimu qattiq bixeterlik tedbirliri élindi

Xitay hökümiti yapon'gha qarshi urushning 70 yilliqigha béghishlan'ghan paratini béyjingda ötküzdi. Emma pütün xitay miqyasida 3 künlük dem élish élan qilinip, jay - jaylarda qattiq bixeterlik tedbirliri élinishi, ammiwi teshwiqatning kücheytilishi qatarliqlar xelq'araning diqqitini qozghidi. Igiligen ehwallardin melum bolushiche, Uyghur élining ürümchi, ghulja qatarliq sheherliride, hetta yézilardimu 3 - séntebir parat mezgilide barliq ishchi - xizmetchiler 3 künlük dem élishqa qoyup bérilgen؛ mekteplerning dersi bir hepte kéchiktürülgen؛ yézilarda déhqanlar kent - kentlerde yighiwélinip, kolliktip halda yapon'gha qarshi urushning 70 yilliqi üchün ötküzülgen paratni körüshke teshkillen'gen.

Xitay hökümiti 3 - séntebir yeni peyshenbe künidiki paratni tinch - aman ötküzüwélish üchün bir aydin buyan béyjingda qattiq bixeterlik tedbirlirini yolgha qoyghan idi. Birnechche kündin buyan xitay metbu'atliri we xelq'ara taratqularda élan qilin'ghan xewerlerdin melum bolushiche, béyjing hökümiti paratning ongushluq we bixeter ötküzülüshi üchün xitay kommunist hökümiti tarixidiki eng qattiq bxeterlik tedbirlirini alghan. Béyjing sheherlik hökümiti séntebir éyida béyjing ahalilirining köndürülgen kepterlirini uchurushini chekligendin sirt, parat küni asmanda uchup yürgen qushlarni qorqutup qachuruwétish üchün mexsus shungqar terbiyiligen. Xitay hawa armiyisi yene parat küni hawada nomur körsitidighan herbiy ayropilanlar uchup ötidighan liniyelerdiki qush changgilirini chugiwétish üchün mexsus makaka maymunlirini terbiyiligen. Sheher ichide qatnaydighan herqandaq ammiwi aptobus, tiramway, yer asti poyizi qatarliqlargha qoralliq eskerler charlashqa orunlashturulghan, tyen'enmén meydani etrapidiki méhmanxanilarning paratqa munasiwetsiz kishilerni qobul qilishi cheklen'genliki, doxturxanilar balnistta yétip dawalanmaydighan bimarlarni körüshni toxtatqanliqi qatarliq ehwallar ashkarilan'ghan idi.

Taratqularda xitay hökümitining 3 - sénbtebirdiki paratni ongushluq ötküzüwélish üchün, mexsus uqturush chüshürüp, bu xil qattiq bxeterlik tedbirlirini bir aydin buyan pütün xitay miqyasigha qeder kéngeytkenliki xewer qilin'ghan idi. 3 - Séntebir küni radiyomiz ürümchi, ghulja qatarliq sheherlerge téléfon qilip igiligen ehwallardin, parat ötküzülgen béyjingdin nechche on ming klométir yiraqliqtiki Uyghur sheher, yéziliridimu qattiq bixeterlik tedbirliri yolgha qoyulup,, siyasiy telim - terbiye, teshwiqat pa'aliyetliri élip bériliwatqanliqi melum boldi.

Ürümchidin ziyaritimizni qobul qilghan bir Uyghur xanim, köpligen idarilerde bu 3 künlük dem élishta toy - tökün, chong tiptiki méhmandarchiliq qatarliq ammiwi pa'aliyetlerni orunlashturmasliqi, ishchi - xizmetchilerning yiraq seperge, seyle - sayahetke chiqmasliqi tewsiye qilin'ghanliqi üchün, özlirining a'ile boyiche olturup, béyjingda ötküzülüwatqan paratning emeliy ehwalini körüwatqanliqini bildürdi. U bayanida hökümet üch künlük dem élishqa qoyup bergini üchün, ürümchi shehiride yekshenbe küni yeni 6 - séntebir küni hökümetke qarashliq barliq idare,jem'iyet xizmetchilirining ishqa baridighanliqi, pütkül ottura, bashlan'ghuch, aliy mekteplerningmu yekshenbe küni yéngi mewsümlük oqushini bashlaydighanliqini bildürdi.

Uningdin yapon'gha qarshi urush ghelibisining 70 yilliqini xatirileydighan parat béyjingda ötküzülüwatqan turuqluq, nechche on ming klométir yiraqliqtiki ürümchide yene néme üchün shunche qattiq bixeterlik tedbirliri élin'ghanliqini sorighinimizda, bu xanim “Yapon'gha qarshi urush ghelibisining 70 yilliqini xatirilesh dölitimizning chong ishi tursa, elwette bu pa'aliyetni xatirjem ötküzüsh üchün barliq tedbirler élinidu - de dep jawab berdi.

Radiyomiz igiligen ehwallardin, ötken heptidin buyan Uyghur élining jenub - shimalidiki wilayet, nahiyilerdin ürümchige qatnaydighan yoluchilar aptobusliri azaytilip, tekshürüsh kücheytilgini üchün, dem élishqa qoyup bérilgen xizmetchilermu ilgiriki bayram mezgilliridikidek uzun yolluq sayahet - seperge chiqish pa'aliyetlirini azaytqan. Yéngi oqush mewsümi üchün ürümchige qatnaydighan uniwérsitét oqughuchiliri üchün 3 - séntebir küni chüshtin kéyindin bashlap yoluchilar aptobusliri köpeytilgen.

Uyghur élidiki melum yézidin ziyaritimizni qobul qilghan bir xanimning bildürüshiche, yézidin ürümchidiki aliy mekteplerge bérip oquydighan oqughuchilar peyshenbe küni chüshtin kéynki yaki kechlik aptobuslargha olturup ürümchige qarap yolgha chiqqan. Béyjingda parat ötküzülidighini üchün nahiye tewesidiki mektepler yéngi oqushni bulturqidin bir hepte kéchikip 6 - séntebir yekshenbe küni bashlaydighanliqi uqturulghan. Hökümet xizmitini qiliwatqan barliq xadimlar 3 künlük dem élishqa qoyup bérilgen bolsimu, emma bügün yeni peyshenbe küni herqaysi kentlerdiki kadirlar we bir qisim déhqanlar yighiwélinip, kolliktip halda béyjingda ölküzülüwatqan paratning neq meydan körünüshini körüshke orunlashturulghan.

Xewerlerdin melum bolushiche, xitay hökümiti yapon'gha qarshi urush ghelibisining 70 yilliqini xatirilesh namida ötküzülüwatqan parat mezgilide, pütün xitay boyiche qattiq bxi'eterlik tedbirliri alghandin bashqa yene, intérnét - téléfon uchurlirighimu qattiq tedbirlerni qollinip, xitaydiki ammiwi tor béketliridini beydu, sina, qatarliq tor betlerge mexsus uqturush tarqitip, bu tor betlerdin tordashlar yollighan uchurlargha qarita qattiq tekshürüshni yolgha qoyushni telep qilghan. 3 - Séntebir künidiki Uyghurche tor béketlirini tekshürginimizde, tor béketlirige yollan'ghan yapon'gha qarshi urushning 70 yilliq ghelibisini xatirilesh üchün ötküzülgen béyjingdiki parat heqqidiki xewer we süretlerning xitayning shinxu'a agéntliqi qatarliq hökümet taratquliridin élin'ghanliqi, emma bu xewer we süretlerge yézilghan inkaslarning tolimu az bolushigha qarimay, hemmisidila xitay hökümitini medhiyileydighan mezmunlardin terkip tapqanliqi melum boldi.