Yash doxtur: “Uyghur bolghinim üchünla doxturxanida 2-derijilik puqra mu'amilisige uchridim”

Muxbirimiz méhriban
2014-10-30
Share
abduletip abduwaris-doxtur.jpg Yéziliq saqchi ponkitining bir xitay saqchisi kötürüp kelgen okulini sélip qoyushni ret qilghanliqi üchün, saqchi oq chiqarghan Uyghur doxtur abdulétip abduwaris. 2013-Yili séntebir, xoten.
RFA

Yéqinda jenubiy Uyghur élidiki doxturluq xizmitidin istépa bérip, gherb döletlirige oqush pursiti izdep kelgen yash Uyghur doxtur özi ishlewatqan herbiy doxturxanidiki ehwallarni bayan qilip, doxturxanida ikki yil ishlesh jeryanida öz béshidin kechürgen nurghun naheqchiliklerning uni bu doxturxanida dawamliq ishleshtin waz kechürgen sewebler ikenlikini bildürdi.

27-Öktebir düshenbe künidiki ziyaritimizde, Uyghur bimarlirining xitay doxturliri teripidin qopal mu'amilige we tejribe obyéktigha aylan'ghanliqi heqqide neqillerni alghan yash Uyghur doxtur bu qétimqi söhbette özining doxturxanida ishlesh jeryanidiki kechmishliri heqqide toxtaldi.

U öz kechmishlirini bayan qilish bilen bille, Uyghur élidiki mutleq köp sandiki Uyghur doxturlirining xitay bashliqlar hetta kesipdash xitay doxturliri teripidin ikkinchi derijilik puqra mu'amilisige uchrash ehwalining oxshimighan derijide mewjut ikenlikini bildürdi.

Xitaydiki dangliq tébbiy uniwérsitétta xitay tilida 5 yilliq oqushini ela tamamlighandin kéyin, yurtigha qaytip kélip, jenubiy Uyghur élidiki xéli dangliq bir herbiy doxturxanida ikki yil xizmet qilghan yash Uyghur doxtur doxturxanigha kelgen tunji künidin bashlapla 2-derijilik puqra mu'amilisige yoluqqan.

Uning bildürüshiche, gerche uning oqush tarixi doxturxanidiki köp sandiki doxturlardin üstün bolsimu, emma u doxturxanida xizmetke chüshkendin kéyinla, andin özi érishishke tégishlik doxturluq xizmet derijisining, doxturluq belgilimisige xilap halda, herbiy rayondiki melum xitay ofitsérning 3 yilliq doxturluq kursini tügetken yéqinigha bériwétilgenlikini bilgen. Bu yash doxtur réntgén bölümige orunlashturulup adettiki téxnik qilip qoyulghan. U doxturxanidiki munasiwetlik bashliqlardin ehwalni sürüshtürginide ular “Sen munasiwetlik kishilerge néme üchün sowghat teyyarlimiding? héch bolmisa ikki bolaq tamaka bolsimu sowghat élip kélishing kérek idi. Bu yerde sen oqughan dangliq mektep we yuqiri netije ishlimeydu” dégen jawabni bergen.

Doxturxanigha kiripla bu xil naheqchilikke uchrighan bu yash Uyghur doxtur, öz qabiliyiti we tirishchanliqi bilen özini ispatlimaqchi bolghan. U tiriship ishlesh bilen bir waqitta, özi ishlewatqan doxturxanida yüz bériwatqan doxturluq exlaqigha xilap qilmishlar, Uyghur bimarlirining doxturluq kinishkisi bolmighan xitay doxturliri teripidin tejribe obyékti qilinishi, qopal mu'amilige uchrishi qatarliq ehwallar heqqide doxturxana bashliqlirigha inkas qilghan we bu ehwalni tüzitishni telep qilghan.

Emma, uning bashqa kesipdash doxturlardin yuqiri bolghan téxnik sewiyisi, xizmettiki mes'uliyetchanliqi, doxturxana bashliqlirigha bergen teklip pikirliri, rawan in'glizchisi we késel körünüshke kelgen bimarlarning uninggha bergen yuqiri bahaliri, doxturxana bashliqlirini eksiche ongaysiz halette qaldurghan. Uning tirishchanliqliri doxturxanida échilghan xizmet xulasisi yighinida uni éghizche maxtashqila yarighan.

U tekrar-tekrar halda, xitay ölkiliridiki yuqiri derijilik doxturxanilargha ékskursiye, öginishke bérish, hetta netijisi yetken turuqluq aspirantliqta oqush pursitidin mehrum qilin'ghan. Uning naraziliqigha qarita doxturxana bashliqi uninggha “Doxturxanimizning sanga oxshash tirishchan yashqa éhtiyaji bar” dégen jawabni bergen, emma kesipdash xitay doxturlar uninggha ochuqla qilip,“Bu yerde netijeng we qabiliyiting esqatmaydu, yolini qilishing kérek idi” dégen meslihetni bergen.

U, özining xizmitidin istépa bérip, chet'elge chiqip kétish qararini élishidiki seweblerning eng axirqisi heqqide toxtilip, birnechche ay ilgiri doxturluq aspirantliqida oqush üchün iltimas qilghinida, u tallighan mekteptiki yétekchi xitay proféssorning uning Uyghur ikenlikini bilginidin kéyin, uni ashkara ret qilishi, xitayda doxturluq kespini dawamlashturushtiki axirqi ümidini üzüshke mejbur qilghanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet