"Bir awaz bir qedem" namayishigha awstraliye we yaponiyediki Uyghurlarmu awaz qoshti

Muxbirimiz méhriban
2018-03-15
Élxet
Pikir
Share
Print
Awstraliyede ötküzülgen "Bir awaz bir qedem" namayishidin körünüsh. 2018-Yili 15-mart.
Awstraliyede ötküzülgen "Bir awaz bir qedem" namayishidin körünüsh. 2018-Yili 15-mart.
Photo: RFA

15-Mart küni awstraliye we yaponiyediki namayishning neq meydan ehwali heqqide radiyomizgha uchur yetküzgen Uyghur pa'aliyetchilirining bildürüshiche, 15-mart küni14 dölettiki 17 sheherde birla waqitta élip bérilish pilanlan'ghan "Bir awaz bir qedem" ayallar naraziliq namayishi, gerche mezkur guruppining shu döletlerdiki ayal ezalirining yétekchilikide teshkillen'gen bolsimu, emma namayishqa shu döletlerdiki barliq Uyghurlar we Uyghurlarning ehwaligha hésdashliq qilghuchi yerlik xelqlermu aktip awaz qoshqan.

Waqit perqi amérikidin we yawropa ittipaqidiki döletlerdin bir kün ilgiri bolghan awstraliyening adélayd we sidnéy sheherliride, shu yer waqti 15-mart küni etigen sa'et 11-de "Bir awaz bir qedem" ayallar naraziliq namayishi bashlan'ghan.

Awstraliyening adélayd shehiridiki namayish teshkilligüchilirining biri bolghan éldane abbas söz qilip, 15-mart künidiki "Bir awaz bir qedem" namayishining 14 dölette birla waqitta orunlashturulushining sewebi heqqide toxtaldi.

Adélayd shehiridiki neq meydan namayishi toghrisidiki uchurlar "Bir awaz bir qedem" guruppisining aktip ezaliridin shehrizat gheyret, perizat xanim, éldane abbas we zulfiye abdulla xanimlar teripidin radiyomizgha yollandi.

Neq meydandiki namayish körünüshidin melum bolushiche, eslide jimjit yürüsh arqiliq naraziliq namayishi élip bérish pilanlan'ghan bolsimu, emma adélayd shehiridiki namayish qatnashchiliri yol boyi xitay hökümitige qarshi "Jazalash lagérlirigha soliwélin'ghan Uyghur qérindashlirimiz qoyup bérilsun!", "Uyghurlargha erkinlik", "Sherqiy türkistan'gha erkinlik" dégendek naraziliq sho'arlirini towlap mangghan. Yashlar nöwette Uyghurlar uchrawatqan basturulush weziyitini anglitip, yol boyi teshwiqat waraqchilirini tarqitip mangghan.

Namayishni teshkilligüchilerdin perizat xanimning bildürüshiche, namayishchilar adélayd shehiridiki jenubiy awstraliye parlamént binasi aldigha kelginide parlamént ezaliridin maykol qatarliq birqanche parlamént ezasi söz qilip, Uyghurlarning nöwettiki ehwaligha hésdashliq qilidighanliqini bildürgen.

Namayish meydanidin öz tesiratlirini bayan qilghan birqanche Uyghur adélayd shehiridiki "Bir awaz bir qedem" guruppisidiki ayallar teripidin teshkillen'gen namayishning ehmiyiti heqqide toxtaldi. Ular sözliride bu xil namayishlar arqiliq awstraliyege oxshash gherb démokratik döletlirining Uyghurlar weziyitige köngül bölüshini ümid qilidighanliqini bildürdi.

Awstraliyediki "Bir awaz bir qedem" guruppisining aktip ezaliridin zulpiye abdulla xanim ziyaritimizni qobul qilip, mezkur namayishning adélayd shehiridiki sheher ahalisiningla diqqiti we qiziqishini qozghapla qalmastin belki namayish meydanigha awstraliyediki bir qanche taratqularningmu muxbirliri kélip neq meydandin namayish heqqide xewer bergenlikini bildürdi. U, bu qétimqi namayish gerche "Bir awaz bir qedem" ayallar guruppisi öz aldigha musteqil teshkilligen tunji namayish bolghan bolsimu, emma nahayiti muweppeqiyetlik élip bérilghanliqidin söyün'genlikini bildürdi.

15-Mart küni pütkül dunya boyiche birla waqitta élip bérish qarar qilin'ghan "Bir awaz bir qedem" ayallar namayishi yaponiyedimu muweppeqiyetlik élip bérildi.

15-Mart washin'gton waqti etigen sa'et 9 da radiyomiz ziyaritini qobul qilghan yaponiye Uyghur jem'iyitining bashliqi, dunya Uyghur qurultiyining tinch okyan asiya-bölümining mes'uli ilham mexmut ependining bildürüshiche, yaponiyediki namayishqa qatnashqan adem sani gerche jiq bolmisimu, emma shu küni yaponiyening tokyo shehiride ötküzülgen namayish, yaponiyediki xewer agéntliqliri teripidin xewer qilinishtin bashqa, yaponiyediki ijtima'iy taratqulardimu munazire qozghighan.

"Bir awaz bir qedem ayallar guruppisi" ning yaponiye bölikidiki namayishqa qatnashqan bir xanimning bildürüshiche, 15-mart tokyoda namayishqa qatnashqan Uyghur ayallirining zor köpchilikining uruq-tughqanliri xitay da'iriliri teripidin tutqun qilinip, "Terbiyelesh lagér" lirigha solan'ghanlar bolup, namayish jeryanida bu ayallarning tökken köz yashliri ularni körgen yaponiyeliklerning köngül bölüshi we hésdashliqini qozghighan.

Toluq bet