Chaqliq orunduqtiki 12 yashliq Uyghur bala ramanjan namayish meydanini lerzige saldi

Muxbirimiz méhriban
2018.03.19
ramanjan-bir-awaz-bir-qedem.jpg Chaqliq orunduqta olturup “Bir awaz bir qedem” namayishigha qatnashqan ramanjan. 2018-Yili 15-mart, myunxén, gérmaniye.
RFA

Birnechche kündin buyan chet'ellerdiki Uyghurlar 15-mart küni pütün dunyadiki 14 dölet 18 sheherde oxshash waqitta ötküzülgen “Bir awaz bir qedem” namayishi heqqide qizghin bes-munazire qilishmaqta. Bolupmu gérmaniyening myunxén shehiridiki namayish qatnashquchiliri arisida chaqliq orunduqta olturup namayishqa qatnashqan 12 yashliq ramanjan alahide diqqet qozghimaqta. Medine xanim oghli ramanjan bilen birlikte 600 kilométir musapini bésip, myunxéndiki Uyghur jama'itining namayishigha qatnashqan. Ularning hékayisi muhajirettiki minglighan Uyghurlarning közlirini yashlap, ulargha ghurur we ilham béghishlimaqta.

15-Mart küni awstraliyening adélayd shehiridiki namayishigha qatnashquchilardin perizat xanim watis'apta chaqliq orunduq bilen myunxéndiki namayishqa qatnashqan 12 yashliq Uyghur bala ramanjan heqqidiki tesiratini bayan qilghan. U, chaqliq orunduqtiki oghlini ittirip 6-7 sa'etlik musapini bésip, nechche qétim poyiz almiship myunxén'gha yétip kelgen qeyser ana medine xanimning milliy rohi heqqidimu toxtilip ötken. Perizat xanim, chaqliq orunduqtiki 12 yashliq ramanjan bilen qeyser ana medine xanimning sunmas rohining erkin, démokratik döletlerde yashap turuqluq Uyghurlar üchün adalet telep qilidighan namayishlargha qatnishishtin özini qachurup kéliwatqan, Uyghur jama'itige qoshulup yashashtin éhtiyat qiliwatqan bir qisim Uyghurlargha ajayip bir ders bolghanliqini tekitligen.

Bu qétimqi “Bir awaz, bir qedem” namayishini teshkilligüchilerdin amérikidiki roshen abbas xanim ziyaritimizni qobul qilip, namayish meydanidiki tesirlik körünüshler heqqide toxtaldi.

Roshen abbas xanim, gérmaniyening myunxén shehiridiki namayish qatnashquchiliri arisida chaqliq orunduqta olturup namayishqa qatnashqan 12 yashliq ramanjanni alahide tilgha aldi. 600 Kilométir musapini bésip, oghlini chaqliq harwa bilen ittirip myunxéndiki namayish meydanigha élip kelgen medine xanimning rohidin qattiq tesirlen'genlikini bildürdi.

Biz bügün, yeni 19-mart küni gérmaniyede yashaydighan bu yalghuz ana-balini ziyaret qilish pursitige érishtuq. Namayishtin kéyin dunyaning herqaysi jayliridiki Uyghurlardin köpligen teshekkür téléfonlirini alghanliqini bildürgen medine xanim, shu künki namayishqa chaqliq harwidiki méyip oghlini élip bérishtiki sewebler heqqide toxtaldi.

Medine xanim, özining bir ana bolush süpiti bilen zulum astidiki Uyghur millitining bir ezaliq mejburiyitini ada qilish we oghlini Uyghur jama'itining qoynida terbiyelep, uninggha Uyghurlar duch kéliwatqan bügünki mislisiz zulumni bildürüsh burchining barliqini alahide tekitlidi. U oghligha kichikidin bashlap Uyghur tilini ögitip kelgenlikini, özi japa cheksimu, köp hallarda purset bolsila gérmaniyede ötküzülüp kéliwatqan namayishlargha oghli bilen bérip qatniship kéliwatqanliqini bildürdi.

Gérmaniyede tughulup bu yil 12 yashqa kirgen, chaqliq orunduq bilen mektepke bérip-kélidighan ramanjanmu sap Uyghur tili bilen ziyaritimizni qobul qildi.

Ziyaritimiz jeryanida ramanjan özining bir Uyghur balisi bolush süpiti bilen Uyghurluq burchini ada qilishqa her waqit teyyar ikenlikini, özining xitay hökümitige bolghan naraziliqini ipadilesh üchün 15-mart küni myunxéndiki namayishqa apisi bilen bille barghanliqini bayan qildi.

Ramanjan mundaq dédi: “Chünki men Uyghur, méning tomurlirimda éqiwatqini Uyghurning qéni. Men gerche mangalmisammu, emma hemme yérim saq. Men wetinimni we Uyghur millitimni söyimen. Shunga yol qanche yiraq we japaliq bolsimu, emma men apam bilen namayishqa keldim!. . . ”

Melum bolushiche, 15- mart küni myunxén shehiride ötküzülgen “Bir awaz, bir qedem” namayishigha qatnashqan ramanjan shu küni namayish meydanidikilerning diqqet nuqtilirining birige aylan'ghan. Namayishqa qatnishiwatqan Uyghurlar we namayishni körüsh üchün kelgen gérmanlar ramanjandin uning néme üchün namayishqa qatnashqanliqini sorighan. Ramanjan ulardin özining néme üchün namayishqa qatnashsa bolmaydighanliqini qayturup sorighan we yighlap ketken. Ramanjanning yighisi namayishqa qatnashqan Uyghurlarni tesirlendürgen we ularning milliy rohigha ilham bergen bolsa, namayishni körgili kelgen yerlik gérmanlarning téximu küchlük hésdashliqini qozghighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.