Biryussél bilen londonda xitaygha qarshi namayishqa qatnashqan Uyghurlar yürek sadalirini anglatti

Ixtiyariy muxbirimiz erkin tarim
2018-10-01
Élxet
Pikir
Share
Print
11 Ge yéqin dölettin kelgen Uyghurlar bélgiye paytexti biryusséldiki yawropa parlaméntining aldida ötküzgen namayishtin körünüsh. 2018-Yili 1-öktebir.
11 Ge yéqin dölettin kelgen Uyghurlar bélgiye paytexti biryusséldiki yawropa parlaméntining aldida ötküzgen namayishtin körünüsh. 2018-Yili 1-öktebir.
RFA/Erkin Tarim

Bélgiye Uyghur jem'iyiti bilen birlikte "Erkinlik karwini" namida namayish qiliwatqan yashlarning orunlashturushi bilen 1-öktebir küni bélgiye paytexti biryussélda namayish ötküzülgen bolup, namayishqa qatnishish üchün 11 ge yéqin dölettin kelgen Uyghurlar namayish jeryanida ziyaritimizni qobul qilip, özlirining bu qétimqi namayishqa qatnishishtiki meqsiti heqqide yürek sözlirini bayan qilishti.

"Erkinlik karwini" namliq namayishni bashlighan finlandiyelik Uyghur xalmurat namayish meydanida ziyaritimizni qobul qilip, bu namayishni "Xitay méning ata-anamdin, aka-ukamdin, acha-singlimdin qolungni tart" déyish üchün bashlighanliqini, bügün buni bélgiye paytexti biryusséldiki yawropa parlaméntining aldidiki namayish bilen axirlashturghanliqini bayan qildi.

Bélgiye Uyghur jem'iyiti re'isi abdullam ependi mezkur namayish toghrisida toxtalghanda "Bu namayish, xitay kommunistlirining wetinimizni bésiwalghanliqining 69-yilliqi we xitayning Uyghurlarni 'jaza lagérliri' gha tashlawatqanliqigha naraziliq bildürüsh üchün élip bérildi, bélgiye we bashqa döletlerdin bolup köp sanda kishi qatnashti, yaxshi bir namayish boldi", dédi.

Abdullam rano ependi 1-öktebir küni biryusséldiki yawropa parlaméntining aldida ötküzülgen namayishning burunqi namayishlargha oxshimaydighan teripining, bezi namayishchilarning Uyghur we in'gliz tilida guwahliq bérish ikenlikini bildürdi.

Norwégiyedin kélip bu namayishqa qatnishiwatqan Uyghur yashlirining wekili amanulla ependi, téléfon ziyaritimizni qobul qilip, bu namayishning burunqi namayishlargha oxshimaydighan tereplirini tekitlep ötti.

Bu namayishqa gollandiyediki Uyghur yashlirigha wakaliten qatnashqan ilshat ependi namayishning yaxshi ötkenlikini, "Erkinlik karwini" namliq namayish pa'aliyitining yawropa ittipaqining merkizi bolghan bélgiyede axirlashqanliqini éytti.

Biryussélda ötküzülgen namayishqa qatnashqan Uyghurlar in'glizche, Uyghurche tillarda "Jaza lagérlirigha qamalghan bir milyon Uyghur qoyup bérilsun!", "Uyghurlargha erkinlik!", "Sherqiy türkistan'gha musteqilliq!", "Xitaylar sherqiy türkistandin chiqip ketsun!" dégendek her xil sho'arlarni towlap, yawropa birlikining xizmet binasi etrapidiki kochilarni lerzige saldi.

1-Öktebir küni en'gliye paytexti londondiki xitay elchixanisining aldidimu namayish ötküzülgen. Uyghur pa'aliyetchi rehime mexmut xanim namayishqa tibetlerningmu qatnashqanliqini bayan qildi.

Igilinishiche, namayishni körgen bezi yawropa parlaménti parlaménti ezaliri namayish toghrisida namayishchilardin so'al sorighan, bezi téléwiziye qanalliri, zhurnalistlar sin'alghugha alghan.

Toluq bet