Qizilsu yézisida “Muqimliq boyiche chatma jawabkarliq mes'uliyetnamisi” yolgha qoyulghan

Muxbirimiz qutlan
2014-08-27
Share
chatma-jawabkarliq-mesuliyetnamisi.jpg Qizilsu yézisidiki “Muqimliq boyiche chatma jawabkarliq mes'uliyetnamisi” höjjiti
RFA/Qutlan


Yéqinda ijtima'iy uchur wastilirida qizilsu yéziliq partkom we hökümet namida “Muqimliqni saqlash boyiche chatma jawabkarliqni ortaq üstige élish mes'uliyetnamisi” dégen belgilime tarqalghan.

30 Maddiliq bu mes'uliyetnamide yéza tewesidiki déhqanlarning qolum - qoshnilar ara bir - birini nazaret qilishi shuningdek tuyuqsiz weqeler yüz berse kent ahalilirining kolléktip boyiche chatma jawabkarliqni ortaq üstige élishi belgilen'gen.

Mezkur mes'uliyetname ijtima'iy uchur wastiliri arqiliq ashkara bolghandin kéyin Uyghur éli we chet'ellerdiki Uyghur jama'etchiliki arisida küchlük inkas peyda qildi.

Radi'omiz peyziwat nahiyesining qizilsu yézisi we uninggha qoshna yézilargha téléfon qilip bu heqte téximu ilgiriligen halda uchur élishqa tirishqan bolsimu, lékin téléfon liniyisi üzüwétilgechke bu heqte chongqurlap uchur élishqa imkan bolmidi.

Ijtima'iy uchur wastiliri arqiliq jama'etchilikke ashkara bolghan mezkur 30 maddiliq mes'uliyetname qizilsu yéziliq hökümet namidin 18 - awghust küni chiqirilghan. Mes'uliyetnamide kent mes'uli, guruppa mes'uli hemde her bir guruppining ezalirining imza qoyushi telep qilin'ghan.

Bu heqte ziyaritimizni qobul qilghan amérikidiki Uyghur ziyaliyliridin doktor jür'et obul munularni bildürdi.

“Men aldinqi küni féysbuk arqiliq tarqalghan bu 30 maddiliq mes'uliyetnamini körüp heyran qaldim. Rastni désem, bu mes'uliyetnamidiki mezmunlarning héchbiri eqlimge sighmidi. Bundaq chékidin ashqan bimenilikni dunyaning bashqa herqandaq yéridin uchratqili bolmaydu. Mundaqche éytqanda, hazir xitay hökümiti özining atalmish muqimliq siyasiti üchün Uyghur xelqini kolléktip bedel töleshke, yüz bergen jiddiy weqelerge kolléktip mes'ul bolushqa shundaqla axirida kolléktip jazalinishqa mejbur qiliwatidu. Tarixta mustemlikichi milletler özige qaram qilin'ghan milletlerni kolléktip jawabkar bolushqa we ularni kolléktip jazani qobul qilishqa mejburlighan ehwallar bolghan. Bundaq ehwallar xitay tarixidimu shundaqla natsistlar gérmaniyesining yehudilar üchün qurghan jaza lagérliridimu bolghan. Wahalenki, dunya 21 - esirning medeniyet muhitida turuwatqan bügünki künde, bu qismetning Uyghur xelqining béshigha kélishi ademni heqiqetenmu te'ejjüplendüridu. Erkin, démokratik ellerde yashawatqan kishilerning köpinchisi bügünki Uyghurlar duch kéliwatqan bu ehwallarni anglisa ishinelmey qalidu. Bu ademni téximu azablaydu. Rastni éytqanda, bu 30 maddiliq chatma jawabkarliq mes'uliyetnamisining özi Uyghurlar üstidiki milliy we diniy zulumning qaysi derijige yetkenlikini körsitip béridighan bir pakit, xalas.”

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet