Чен чүәнго уйғур елидики бәзи кадирларниң идийиси партийә билән бирдәк әмәс, дәп җиддийләшмәктә

Мухбиримиз ирадә
2017-01-27
Share
chen-quanguo-chen-chuengo-4.jpg Уйғур елиға тәйинлигән йеңи партком секретари чен чүәнго йиғинда сөздә.
cpad.gov.cn

Уйғур аптоном райониниң партком секретари чен чүәнго башчилиқидики әмәлдарлириниң нөвәттә һәр қетимлиқ йиғинда қилған сөзидә, кадирларниң истил мәсилисини қаттиқ тәкитләп, бир қисим кадирларниң идийиси партийә билән бирдәк болмайватиду, дегәнни тәкрарлиши диққәт қозғимақта. Чәтәлләрдики уйғур көзәткүчиләр болса районда иҗра қилиниватқан сиясәтләрниң вә җиддий һаләтниң хитай кадирларниму биарам қиливатқанлиқини, бу сиясәтләрниң һечкимгә хатирҗәмлик әп кәлмәйдиғанлиқини тәкитлиди.

Һөрмәтлик радийо аңлиғучилар, йеқиндин буян уйғур аптоном райониниң башлиқлири нәгила барса, қайси йиғинда сөзлисә кадирларниң истили мәсилисини қаттиқ тәкитләватиду. Улар сөзидә кадирларниң идийисиниң партийә билән бирдәк болуши, һәр милләт кадирлириниң баш нишанни тонуп йетип, истилини яхшилиши керәкликини қайта-қайта тилға елип, буни уйғур елида муқимлиқ яритишниң түп капалити, дәп көрсәтмәктә. Мәсилән, уйғур аптоном райониниң партком секритари чен чүәнго 1-айниң 9-күнидики муқимлиқни қоғдаш хизмити телефон йиғинда төвәндики сөзләрни қилған иди :

-Шинҗаңдики кадирлар истилда ениқ тонушқа игә болуши лазим, шинҗаңдики һәр милләт кадирлар узақтин буян чеграда йилтиз тартип, чеграни тәрәққий қилдурди, уларниң роһий һалити вә омумий истили яхши, лекин айрим җайларниң вә бәзи кадирларниң омумий баш нишанға болған тонуши әмәлийләшмигән, идийәдә бихудлуқ қиливатиду, истили турақсиз, тәдбири йоқ, күрәштин бизар, мәсулийитини ада қилмай, хизмәттә мәсулийәтсизлик қиливатиду. "үч хил күч"ләр шинҗаңдики һәр милләт амминиң ортақ дүшмини, әмма истилниң дурус болмаслиқи бизниң техиму чоң дүшминимиз, уни зор күч билән һәл қилип, техиму қәтий позитсийә билән аптоном районимизниң муқимлиқини қоғдаш хизмитини пухта, яхши ишлишимиз лазим.

Униңдин кейин уйғур аптоном райониниң рәиси шөһрәт закирму 23-январ күни қәшқәрдә қилған сөзидә шинҗаңда муқимлиқ вә әбәдий әминлик яритиштин ибарәт баш нишан ши җинпиң вә униң рәһбәрликидики партийә мәркизи комитетиниң дуня вәзийити вә шинҗаңниң омумий вәзийитигә қарап туруп чиқарған һөкүми. Шуңа буниңға биз қәтий әгишишимиз, униң шинҗаңниң әмәлийитигә мас келидиғанлиқиға ишинишимиз керәк, дегән сөзләрни қилди.

Дәл шу күнләрдә уйғур аптоном район даирилири йәнә уйғур ели миқяси бойичә "сөзни өгиниш, истилни өзгәртиш, әмәлийләштүрүшни чиң тутуш" паалийити башлашни бекитип, "истилни һәқиқий өзгәртиш, иҗтимаий муқимлиқни илгири сүрүштики муһим тәдбир" дәп көрсәтти.

1-Айниң 25-күни чен чүәнго чаған мәзгилидики бихәтәрликни тәкитләп ачқан муқимлиқ йиғинида йәнә охшаш мәсилини тәкитләп төвәндики сөзләрни қилди :

-Идийә җәһәттә һәр вақит һошяр болуш керәк. Йүксәк һошярлиқ вә сәгәкликни сақлап, һазирқи муқимлиқни қоғдашниң кәскин вәзийитини толуқ тонуп, бихудлуқ идийәси, бошаңлиқ қилип уруштин бизар болуш вә тәләй синаш писихикисини қәтий йеңиш керәк.... Тонуши йетәрлик болмай, иш орнида чиң турмай, хизмәттә бипәрвалиқ қилиш сәвәблик муқимлиқ җәһәттә мәсилә көрүлсә, җавабкарлиқини қанун-интизам бойичә қаттиқ сүрүштүрүш керәк. Шуниң билән биллә, зораван-террорчилар билән тил бириктүридиған "икки йүзлимичи"ләрни қаттиқ тәкшүрүп бир тәрәп қилиш керәк.

Уйғур район даирилириниң баш нишанға әгишиш, истилни тоғрилаш мәсилисидә бунчә җиддийлишип кетиши чәтәлләрдики көзәткүчиләрниң диққитини қозғиди. Улар, уйғур елида мәҗбурий йүргүзүлүватқан "қошмақ туғқан болуш", "қош тил йәсли маарипи" қатарлиқ бәзи сиясәтләрниң шу җайдики амминила әмәс, шу партийә вә һөкүмәт әзалириниң өзиниму нарази қилидиғанлиқини билдүрди. Америка уйғур бирләшмиси рәиси елшат һәсән әпәнди уйғур елида йүргүзүлүватқан юқириқидәк сиясәтләр хитай кадирларғиму арам бәрмәйватқанлиқини, уларниң хатирҗәмликини бузуватқанлиқини, шуңа бундақ наразилиқларниң болушиниң тәбиийликини билдүрди.

Дәрвәқә, уйғур аптоном районлуқ партком2015-йили-ноябир елан қилған ахбаратида, "шинҗаң гезити" ниң сабиқ башлиқи җав шинвейни "3 хил күчләр"гә қарши туруш, террорлуққа қарши туруш қатарлиқ зор принсипал мәсилиләрдики сөз-һәрикити мәркәз һәм аптоном районлуқ партком билән бирдәк болмиди, дәп тәнқид қилған вә уни компартийәниң ашқунлуқ, террорлуққа қарши туруш, муқимлиқни қоғдаш асасидики"шинҗаң сиясити" гә қарши турғанлиқи үчүн әмилидин елип ташлап, тәптиш органлириниң бир тәрәп қилишиға тапшуруп бәргән иди.

11-2016 Айда болса қәшқәр вилайити даирилири вилайәткә қарашлиқ 11 наһийә вә шәһәрдики һаким дәриҗилик 15 кадир вә бөлүм башлиқи дәриҗилик 22 кадирни "қош тил йәслиси" қурулуши хизмитидә актип болмиғанлиқи яки пикир җәһәттә партийә билән бирдәк болмиғанлиқи үчүн әмилидин қалдуруп җазалиған яки агаһландуруш бәргән иди.

Америкидики аләм қатниши идариси насаниң тәтқиқатчиси, доктор әркин сидиқ әпәнди хитай һөкүмитиниң йәрлик милләтләрни ассимлиятсийә қилиш сияситини иҗра қиливатқан бир шараитта буниңға қарши чиққан яки пәқәт өз мәдәнийитини қоғдап қелишнила ойлаватқан кадирларни истили яхши әмәс дәп җазалиши бир хаталиқ, дәп көрсәтти.

Чен чүәнго юқиридики йиғинларда қилған сөзидә, давамлиқ террорлуқ, үч хил күчләргә қақшатқуч зәрбә беришни, һәрвақит һошярлиқни сақлашни, дүшмәнгә рәһимсиз болушни тәкитлимәктә. У алдинқи күнидики сөзидә, муқимлиқиға капаләтлик қилишта, һәр дәриҗилик кадирлар асасий қатламға чоңқур чөкүп, аилиләргә кирип әһвал игилиши керәк... Тәкшүрүш понкитлири террорлуққа қарши туруш, муқимлиқни қоғдашниң һәқиқий алдинқи сәп қаравулханиси болуши; җәмийәттә торлаштуруп башқурушни күчәйтип, адәттики районларда үч минутта, нуқтилиқ орунларда бир минутта бир тәрәп қилиш чәмбирики һасил қилиши керәк...Қақшатқуч зәрбә бериш җәһәттә юқири бесим, чөчүтүш һалитини давамлиқ сақлап, зораван-террорчиларға қәтий зәрбә берип, тәлтөкүс йоқитип, уларни йилтизидин қурутуш керәк" дегәндәк сөзләрни ишләтти. Дуня уйғур қурултийи баш катиби долқун әйса әпәнди юқириқидәк шуарлар арқилиқ муқимлиқ яратқили болмайдиғанлиқини билдүрди.

Доктор әркин сидиқ әпәнди бу сиясәтләрниң шу җайдики һечқандақ бир милләткә хатирҗәмлик елип кәлмәйдиғанлиқини, болупму йәрлик милләтни йоқ қилишни мәқсәт қилған сиясәтләрниң үнүм бәрмәйдиғанлиқини билдүрүп, хитай һөкүмитини тарихтин савақ елишқа чақирди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт