Washin'gtondiki chong namayishning teyyarliqi jiddiy bashlandi

Ixtiyariy muxbirimiz ekrem
2019-03-08
Élxet
Pikir
Share
Print
Uyghur diyaridiki chékige yétiwatqan milliy zulum we basturushqa naraziliq bildürüsh hemde uni aq saraygha biwasite anglitish üchün amérikidiki bir qisim Uyghur jama'iti amérika Uyghur birleshmisining uyushturushi bilen aq saray aldida ötküzülgen kechlik namayishtin körünüsh. 2018-Yili 22-iyun, washin'gton.
Uyghur diyaridiki chékige yétiwatqan milliy zulum we basturushqa naraziliq bildürüsh hemde uni aq saraygha biwasite anglitish üchün amérikidiki bir qisim Uyghur jama'iti amérika Uyghur birleshmisining uyushturushi bilen aq saray aldida ötküzülgen kechlik namayishtin körünüsh. 2018-Yili 22-iyun, washin'gton.
Photo: RFA

4-Ayning 6-küni washin'gtonda oxshimighan partiye-guruhlar, diniy éqimlarning birleshme zor namayishi ötküzülmekchi.

D u q rehberlirining bügün bergen melumatlirigha asaslan'ghanda, 3-mart küni dunyaning herqaysi elliridiki Uyghur teshkilatliri rehberlirining ishtirakida téléfon yighini chaqirilip, 4-ayning 6-küni washin'gtonda ötküzülidighan zor birleshme namayishning teyyarliq xizmitini jiddiy bashlash qarar qilin'ghan. 

D u q mu'awin re'isi perhat muhemmidi ependining bildürüshiche, 4-mart küni yene bir qétim téléfon yighini chaqirilip, namayish teyyarliq guruppisi qurup chiqilghan. Uning eskertishiche, d u q rehberlikide bashlan'ghan bu qétimqi zor namayish ötken yili 4-ayning 26-küni yawropa ittipaqining merkizi biryussélda we 11-ayning 6-küni jenwediki b d t binasi aldida ötküzülgen namayishtin kéyinki 3-qétimliq chong namayish bolup hésablinidiken.

D u q ijra'iye komitéti re'isi ömer qanat ependining bayan qilishiche, bu qétimqi namayishqa Uyghurlardin sirt, amérika we kanadadiki oxshimighan diniy éqimlarning, oxshimighan partiye-guruhlarning wekilliri qatnishidiken. Uning éytishiche, bu qétimqi namayishning meqsiti amérika hökümitining Uyghurlar heqqide ünümlük qararlarni qobul qilishi arqiliq xitayni jaza lagérlirini taqashqa mejburlashtin ibaret bolup, namayishqa yene amérikining muhim dölet erbablirimu ishtirak qilip nutuq sözleydiken. 

D u q taratquliridiki bügün 5-mart élan qilin'ghan melumatlargha asaslan'ghanda, bu namayishqa amérika we kanadadiki Uyghurlardin sirt, dunyaning herqaysi elliridiki Uyghurlarningmu qatnishishi üchün seperwerlik pa'aliyetliri élip bérilidiken.

Ömer qanat ependining tekitlishiche, bu qétimqi namayish amérika hökümitining Uyghurlar mesilisi saheside janliq heriketke ötüshige seweb bolidiken. 

Melum bolghinidek, d u q ning 2018-yili 4-ayning 27-küni yawropa ittipaqining merkizi biryussélda we 11-ayning 6-küni jenwediki b d t binasi aldida xitayning jaza lagérlirigha qarshi ötküzülgen namayishlirining kölimi alahide zor bolghan bolup, minglarche Uyghurlar dunyaning herqaysi qit'eliridin kélip qatnashqan idi. Bu qétim washin'gtonda ötküzülidighan namayish köliminingmu shundaq zor bolushi texmin qilinmaqta iken.

Toluq bet