Долқун әйсаниң италийә вәқәси йәнила ғулғула темиси болмақта

Ихтиярий мухбиримиз әкрәм
2017.08.02
dolqun-eysa-unpo-italiye-saqchi-tekshurush-620.jpg Долқун әйса әпәнди италийә юқири палатасида чақирилидиған уйғурлар һәққидә гуваһлиқ бериш йиғиниға кәлгәндә, бинаниң сиртида италийә алаһидә һәрикәт башқармисиниң хадимлири тәрипидин тосувелинған көрүнүш. 2017-Йили 26-июл.
unpo.org

Д у қ баш катипи долқун әйсаниң италийәдә сақчилар тәрипидин 3 саәт тутуп қоюп берилгәнлики хәлқара мәтбуатларда йәнила қизиқ тема болмақта.

Д у қ баш катипи, у н п о муавин рәиси долқун әйса әпәнди 26-июл италийә юқири палатасида чақирилған уйғурларниң нөвәттики вәзийитидин гуваһлиқ бериш мәхсус йиғинида нутуқ сөзләштин 15 минут илгири, римдики дигос дәп аталған алаһидә һәрикәт башқармиси хадимлири тәрипидин тутуп кетилип, үч йерим саәттин кейин қоюп берилгән иди. Бу вәқә бүгүнгичә мисирдики уйғур оқуғучилар вәқәсигә охшашла көплигән хәлқаралиқ ахбарат вастилирида кәң тарқитилип, уйғурлар мәсилисини қизиқ темиға айландурмақта. 

Долқун әйсаниң италийә вәқәси хәлқара мәтбуатларда тәсир қозғапла қалмай, уйғурлар арисидиму иҗтимаий таратқуларда бәс-муназириләргә сәвәб болмақта. Биз бүгүн бу бәс -муназириләргә қизғин иштирак қиливатқан бир қисим уйғур сиясий паалийәтчиләрни зиярәт қилип, уларниң қарашлирини игиләш пурситигә ериштуқ. 

Д у қ баянатчиси дилшат решит әпәнди бу һәқтә тохталғанда, ғәрбтики көплигән даңлиқ ахбарат васитилириниң бүгүнгә қәдәр өзидин бу һәқтә мәлуматлар сораватқанлиқини вә түрлүк хәвәр, анализ мақалилири елан қиливатқанлиқини тилға алди.

Д у қ муавин рәиси пәрһат муһәммиди әпәнди долқун әйса әпәнди италийәдә учриған тосалғу һәққидә тохталғанда, алди билән италийәдәк демократик бир дөләттә тутқун қилинғанлиқидин әпсусланғанлиқини билдүрди. У сөзидә, ғәрб демократик әллириниң хитай билән болған иқтисадий мәнпәәт алдида кишилик һоқуқ мәсилисигә бипәрва қараватқанлиқини әйиблиди. 
Әнқәрәдики һаҗитәппә университетиниң оқутқучиси, истратегийә мутәхәссиси доктор әркин әкрәм әпәндиму бу һәқтә өз қарашлирини оттуриға қоюп, бу италийә вәқәсидә хитайниң қоли барлиқиниң шүбһисиз икәнликини әскәртти.  
Д у қ баш катипи, у н п о муавин рәиси долқун әйса әпәнди болса, бу қетимқи италийә вәқәсиниң техи ахирлашмиғанлиқини, бу мәсилини германийә һөкүмити вә явропа парламентида күнтәртипкә елип келидиғанлиқини билдүрди.

Һаҗитәппә университетиниң оқутқучиси истратегийилик чүшәнчиләр институтиниң истратегийә мәсилилири бойичә мутәхәссиси доктор әркин әкрәм әпәнди сөзидә, хитайниң чәтәлләрдики сиясий дәва паалийәтлиригә қарита тосқунлуқ қилиштин ибарәт өз пиланлирини әмәлгә ашурушқа тиришиватқанлиқини тәкитлиди.

Пәрһат муһәммиди әпәнди, долқун әйсаниң италийәдә тутқун қилинишиға хитай һөкүмитиниң уни хәлқара сақчиға террорист қилип көрсәткәнликиниң асаслиқ сәвәб болғанлиқини илгири сүрди. У йәнә бу қетимқи вәқәни дуня җамаитигә кәң көләмдә тәшвиқ қилип, хитайниң қилмишлирини хәлқараға билдүрүшниң зөрүрлүкини тәкитлиди.  
Долқун әйса әпәнди бундин илгириму шветсарийә, түркийә, америка, җәнубий корейә қатарлиқ дөләтләр чегралиридин кириштә тосулуп, яки тутқун қилинип қоюп берилгән иди. Мәсилән, кейин, америка қошма штатлири долқун әйсаниң америкиға киришигә рухсәт қилған вә у америкиға берип, йиғин һәм мукапат елиш мурасимлириға қатнашқан иди.

Уйғур сиясәтчиләр униң һәр қетимлиқ тутқун қилиниш вәқәсиниң уйғурлар мәсилисини хәлқараға тонутушқа төһпиләр қошқанлиқини қәйт қилишти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.