Dolqun eysaning apisi ayxan memetning “Terbiyilesh lagéri” da qaza qilghanliqi ilgiri sürülmekte

Muxbirimiz shöhret hoshur
2018.06.29
Share on WhatsApp
Share on WhatsApp
ayxan-memet-ana-dolqun-eysa.jpg D u q re'isi dolqun eysa ependining dadisi eysa memet bilen merhum anisi ayxan memet. (Waqti we orni éniq emes) eysa memet ependi hazir 95 yash bolup, uning nede ikenliki we salametlik ehwali éniq emes.
Social Media

Dunya Uyghur qurultiyining bayanatchisi dilshat rishit qurultay re'isi dolqun eysaning apisining ölümi heqqide özige kelgen uchurlardin biride merhumening “Terbiyilesh lagéri” da wapat bolghanliqining qeyt qilin'ghanliqini bayan qilghan idi. Muxbirimizning 3 heptige yéqin élip barghan éniqlashliri dawamida Uyghur diyaridiki köpinche saqchilar dolqun eysaning apisining ölümige munasiwetlik uchurlarning “Dölet mexpiyetliki” ge yatidighanliqini tilgha élip, bu heqte gep qilishni ret qildi. Bu jeryanda saqchi xadimliridin biri merhume ayxan memet xanimning kelpin nahiyilik 2‏-terbiyilesh lagérida jan üzgenlikini tilgha aldi.

Dunya Uyghur qurultiyining re'isi dolqun eysaning bu yil 78 yashqa kirgen anisi ayxan memet xanim ötken ayning 17‏-küni alemdin ötken bolup, dolqun eysa bu musibet xewiridin mushu ayning 11-küni xewer tapqan idi. Bu heqte radiyomizgha melumat bergen qurultay bayanatchisi dilshat rishit özige kelgen uchurlardin biride ayxan memet xanimning “Yépiq terbiyilesh lagéri” da qaza qilghanliqining qeyt qilin'ghanliqini bayan qilghan idi. 

Üch heptige sozulghan éniqlashlirimiz dawamida xadimlarning köpinchisi mezkur ölüm heqqide melumat bérishni ret qilghan bolsimu, emma héchqaysisi ölüm xewirining rastliqini inkar qilmidi. Kelpindiki xadimlardin biri bu heqte bir derije yuqiri orunlardin ehwal igilishimizni tewsiye qilsa, yene beziliri ehwaldin xewerdar orun süpitide aptonom rayonluq j x nazaritini körsetti. 

Melum bolushiche, merhume ayxan memet xanimning ölümi heqqide eng deslepte uchur tapshuruwalghan kishi qurultayning yardemchi teptishi polat sayimdur. U ölüm heqqide ishenchlik menbedin uchur tapshuruwalghan bolsimu, emma ölümning sewebi heqqide héchqandaq melumatqa érishelmigen. Qurultay rehberliri mezkur ölüm xewirining 3 hepte kéchikip ashkarilinishigha asasen merhumening lagérda wapat bolghanliqi heqqidiki uchurning asassiz emeslikini perez qilishqan.
Éniqlashlirimiz dawamida soralghan merhumening qaysi lagérda jan üzgenliki heqqidiki so'alimizgha bezi xadimlar ochuq halda dolqun eysaning apisining ölüm xewirining “Dölet mexpiyetliki” ikenlikini, shunga bu so'algha jawab bérelmeydighanliqini éytti. Yene bir xadim dolqun eysaning a'ile-tawabi'atlirining ehwali heqqidiki herqandaq bir melumatning “Dölet mexpiyetliki” ikenlikini tekitlidi. Kelpin baziridiki saqchi xadimliridin biri merhume ayxan memetning jan üzüshtin awwal kelpin nahiyisidiki 2‏-terbiyilesh merkizide ikenlikini, uning “Esebiy diniy idiyedin yuqumlinish” bilen eyiplinip, bir yildin béri mezkur lagérda “Terbiye” liniwatqanliqini tilgha aldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.