D u q rehberlirining yawropa parlaméntidiki 2018-yilliq pa'aliyetliri bashlandi

Ixtiyariy muxbirimiz ekrem
2018.01.11
dolqun-eysa-Fabio-kastaldo-ependi.jpg D u q re'isi dolqun eysa ependi yawropa parlaméntining mu'awin re'isi fabi'o kastaldo ependi bilen. 2018-Yili 9-yanwar, bélgiye paytexti biryussél.
RFA/Ekrem

Dunya Uyghur qurultiyining re'isi dolqun eysa bashliq qurultay rehberliri yawropa parlaméntida muhim uchrishishlarni ötküzdi.

D u q ning yéngi yilliq tunji xelq'araliq pa'aliyiti yawropa parlaméntida bashlandi. Melum bolushiche, d u q 2018-yilliq xizmet pilanida yawropa parlaméntida élip baridighan pa'aliyetlerni aldinqi küntertipke tizghan. Qurultay re'isi dolqun eysa ependi bashliq bir guruppa kishi 9-yanwar bélgiye paytexti biryussélgha yétip kélip, 10-yanwardin bashlap yawropa parlaméntidiki pa'aliyetlirini bashliwetken.

Dolqun eysa ependining bügün biryusséldin bergen melumatigha asaslan'ghanda, 10-yanwar küni u aldi bilen yawropa parlaméntining mu'awin re'isi fabi'o kastaldo ependi bilen bir sa'et söhbet ötküzgen. Andin yawropa parlaménti kishilik hoquq komitétining ezasi hélga trüpél xanim we parlamént ezasi ilxan küchük ependiler bilenmu ayrim ayrim söhbetler élip barghan. Dolqun eysa ependi uchrashqan bu parlamént ezaliri 2017-yili 10-ayning 19-küni yawropa parlaméntida qurulghan “Uyghur dostluq guruppisi” ning ezaliri iken.

Dolqun eysa ependining bildürüshiche, yawropa parlaméntida 4 kün dawamlishidighan bu qétimqi pa'aliyetning mezmun da'irisi keng iken. D u q rehberliri özliri uchrashqan parlamént ezalirigha Uyghur diyarining nöwettiki weziyitidin tepsiliy melumat bérish bilen birge, nöwette jiddiy hel qilishqa tégishlik bezi mesililer toghrisida parlamént ezaliridin yardem telep qilghan. Bolupmu, tayland, malayshiya, bulghariye, türkiye we yawropaning herqaysi jayliridiki qiyin weziyette qalghan Uyghur musapirlirini qutuldurup qélish üchün yawropa parlaménti ezalirining jiddiy chare-tedbir qollinishini iltimas qilghan.

Uyghur diyarida yolgha qoyuluwatqan “Yépiq terbiyelesh merkizi” namidiki tutqunlar lagérliri mesilisimu bu qétimqi söhbetning muhim témiliridin biri bolghan. D u q ning programma yétekchisi pitér irwén ependi bu heqte toxtalghanda, Uyghur diyaridiki kishilik hoquq depsendichilikining herqaysi saheliridiki emeliy misallirini anglatqanliqini bildürdi. U yene, dolqun eysa ependining bu “Yépiq terbiyelesh merkizi” ni eyni zamandiki natsist gérmaniyesining yehudiylarni yighiwélish lagérigha oxshitip teswirligenliki we herbir yurttin qanche minglighan Uyghurning bu lagérda ménge yuyushqa mejburliniwatqanliq mesilisi parlamént ezalirining jiddiy diqqitini qozghighanliqi hemde yawropa parlaméntida bu heqte derhal bir ish qilish lazimliqini tekitleshkenliklirini tilgha aldi.

Dolqun eysa ependi “Yépiq terbiyelesh merkizi” heqqide toxtalghanda, parlamént ezalirigha bu toghrisida tepsiliy chüshenchiler bérip, yawropa parlaméntining xitayning bu wehshiyliklirini tosush üchün derhal bir qarar qobul qilishigha türtke bolushni meqset qilghanliqini eskertip ötti. U sözide, chet'eldiki Uyghurlarning yurtidiki a'ile-tawabi'at liri bilen bolghan xet-alaqe we téléfon alaqisining cheklimilerge uchrawatqanliq mesilisini otturigha qoyup, yawropa parlaméntining buninggha jiddiy inkas bildürüshi lazimliqini tekitligen shundaqla Uyghur tilining cheklinishi we milliy assimilyatsiye mesilisi üstidimu toxtalghan.

Dolqun eysa ependi yawropa parlaméntida 11-yanwar küni yene bir qisim parlamént ezaliri bilen uchrishishqa kélishken bolup, parlamént ezasi lasto türkesh, ignazi'o karra'o hemde yawropa parlaméntining tashqi ishlar ministirliqining xadimliri bilen ayrim-ayrim söhbet élip baridiken. Bu heqte kéler qétimliq programmilirimizda tepsiliy melumat bérimiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.