En'gliye parlaméntida Uyghurlarning éghir weziyiti heqqidimu guwahliq bérildi

4-Ayning 18-küni en'gliye parlaméntida “Eng qarangghu minutlar” mawzuluq guwahliq bérish yighini ötküzüldi. Yighinda Uyghurlarning bügünki weziyitimu anglitildi.

En'gliye parlaménti kishilik hoquq komissiyonining ezasi fi'ona bruké xanim bilen en'gliyediki kishilik hoquq pa'aliyetchisi we yazghuchi bénédékt rogérs uyushturghan bu qétimliq guwahliq bérish yighinida xitay wiyétnamdin tutup kétip ömürlük qamaq jazasigha höküm qilghan wang bingjangning akisi bilen teywenlik kishilik hoquq pa'aliyetchisi li mingchining ayali guwahliq bergen.

Bügünki guwahliq bérish yighinida Uyghurlarning nöwettiki éghir weziyiti toghrisida londondiki Uyghur pa'aliyetchi rahime mexmut xanim bilen “Xitaygha yardem” fondining re'isi bolup fu ependi guwahliq bergen. Rehime mexmut xanim bu heqte ziyaritimizni qobul qilip, en'gliye parlaméntida ötküzülgen guwahliq bérish yighini heqqide melumat berdi.

Arqidin bash shtabi amérikidiki “Xitaygha yardem” fondining re'isi bolup fu ependi xitaydiki diniy bésim toghrisida guwahliq bergen. Rehime mehmut xanimning bildürüshiche, bob fu ependi nöwette Uyghurlarning béshigha kéliwatqan éghir derijidiki diniy cheklimiler, atalmish “Terbiyelesh lagérliri” toghrisida 15 minuttek melumat bergen.

Xewerlerge asaslan'ghanda, ötken yili 7-aydin tartip köp sanda Uyghurlar atalmish “Terbiyelesh merkizi” namidiki lagérlargha qamalghan bolup, bularning ichide chet'elde pa'aliyet élip bériwatqan Uyghur pa'aliyetchilerningmu ata-aniliri, uruq-tughqanliri bar iken. Uyghur pa'aliyetchi rehime mexmut xanim 18-aprélda en'gliye parlaméntida ötküzülgen guwahliq bérish yighinida bu heqte tepsiliy melumat bérgenlikini bayan qildi.

Rahime mexmut xanim ziyaritimiz jeryanida yene parlaménttiki kishilik hoquq komissiyonining bügünki guwahliq bérish yighinlirida chüshken pikirlerni retlep we mexsus doklat teyyarlap, en'gliye parlaméntigha we en'gliye hökümitige sunidighanliqini bayan qildi.

Igilinishiche, en'gliye parlaméntida 2016-yilidin tartip “Eng qarangghu minutlar” témisida guwahliq bérish yighini ötküzülüp kelmekte iken. Uyghur en'gliyediki Uyghur pa'aliyetchi enwer toxti ependi “Eng qarangghu minutlar” namliq guwahliq bérish yighinida xitaydiki organ yötkesh mesilisi boyiche guwahliq bergen iken.