Uyghur bölümi "Erkin tiniqlar" namida sehipe achti

Muxbirimiz jüme
2019-02-01
Élxet
Pikir
Share
Print
Shiwétsiyede xitaygha qarshi namayish teshkillewatqan merhum küresh kösen (2005-yil 1-öktebir)
Shiwétsiyede xitaygha qarshi namayish teshkillewatqan merhum küresh kösen (2005-yil 1-öktebir)
RFA/Qutlan

"Erkin tiniqlar" sehipimizning tunji sanini sehipimizning échilish meqsiti heqqide chüshenche bergech merhum sen'etkar küresh kösenni eslesh bilen bashlashni layiq taptuq.

Hemmimizge melum bolghinidek, yéqinqi bir nechche yildin béri lagérlargha qamalghan milyonlighan Uyghurlar arisida Uyghur ziyaliyliri, Uyghur edibliri, Uyghur yazghuchilirimu köp salmaqni teshkil qildi.

Biz igiligen xewerlerge qarighanda, nöwette Uyghur élide, jümlidin xitay miqyasida Uyghur tilida chiqidighan barliq neshr buyumliri biraqla toxtitilghandin sirt, ilgiri neshr qilin'ghan nurghunlighan nadir eserlerning yighip kétilgenliki melum. 

Gherb metbu'atlirida "Medeniyet qirghinchiliqi" dep qariliwatqan mezkur weziyetning Uyghur tili, medeniyiti we kimlikining kelgüsige élip kélidighan weyran qilish xaraktérlik tesirini mölcherlesh qéyin bolmisa kérek.

Xitay Uyghurlargha qaratqan bu xil basturush siyasetlirining yene qachan'ghiche dawam qilidighanliqi na'éniq boluwatqan weziyette Uyghur medeniyiti, kimliki we tarixini ejdadlardin ewladlargha toshughuchi bolmish Uyghur tilliq eserlerning köplep yézilishi, neshri qilinishi we tarqilishini kapaletke ige qilish üchün qandaq zörür qedemlerni élish mumkin dégen so'allarmu nöwette Uyghur jem'iyitide munazire qiliniwatqan témilarning biri.

Hemminglargha melumki, erkin asiya radi'osining Uyghurche bölümi tesis qilin'ghan 20 yildin béri barliq tirishchanliqlarni körsitip "Awazsizlarning awazi" bolup kéliwatidu, buni her biringlarning yéqindin qollap-quwwetlishidin hergiz ayrip qarashqa bolmaydu-elwette. 

Herqaysinglarning medet we ümidlirini asas qilghan halda radi'o programmilirimizning rengdarliqini ashurup, mezmunini béyitip, weten ichi we sirtidiki yazghuchi, sen'etkar we edebiyat-sen'et heweskarlirimizgha téximu chong sorun hazirlap bérish meqsitide mana bügündin tartip radiyomizda "Erkin tiniqlar" dégen témida yéngi bir sehipe achtuq. 

Sehipimizde Uyghurlarning siyasiy teqdirige munasiwetlik bolghan siyasiy, ijtima'iy, diniy we edebiy mezmundiki söhbet-mulahiziler, dunyaning herqaysi jayliridiki yazghuchi-sen'etkarlirimiz teripidin élan qilin'ghan edebiyat-sen'et eserliri, roman-hékayiler, shé'ir, naxsha-muzika, yumurlar we güzel sen'et eserliri keng tordashlarning behr élishigha sunulidu.

Konilar: "Künning bashlinishi tangdin, ishning bashlinishi salamdin" dégeniken, shunga biz bügün sehipimizning resmiy sani bashlinishtin élgiri bu sehipimiz arqiliq eziz xelqimizge salam yollashni muwapiq taptuq. Weten ichi we sirtidiki barliq qérindash, dost-yarenlerge bizdin otluq salam bolsun! shu wejidin bügünki programmimizni merhum sen'etkar küresh kösenning "Salam denglar weten'ge" namliq naxshisi bilen bashlashni layiq taptuq. 

Merhum sen'etkar küresh kösen 1959-yili Uyghurlar wetinining merkizi ürümchi shehiride ziyaliy a'iliside dunyagha kelgen hemde kéyinki mezgillerde sen'et saheside yuqiri shöhret qazan'ghan. Siyasiy sewebler bilen hayatining bir qismini sersanliqta ötküzüshke mejbur bolghan ot yürek sen'etkar küresh kösen 2006-yili 48 yéshida shiwétsiyede wapat bolghan idi.

Toluq bet