Ikki yil késilgen gholluq erzdar ömerjan abla türmidin chiqipla yene radi'omizgha derdini tökti

Muxbirimiz shöhret hoshur
2013-04-26
Élxet
Pikir
Share
Print
Süret, ali derijilik géologiye néfit qédirip tekshürüsh énzhinéri ömerjan ablaning béyjingdiki erzdarlar turaqliq jayida boshün muxbirining ziyaritini qobul qilghandiki süretliridin biri.
Süret, ali derijilik géologiye néfit qédirip tekshürüsh énzhinéri ömerjan ablaning béyjingdiki erzdarlar turaqliq jayida boshün muxbirining ziyaritini qobul qilghandiki süretliridin biri.
Din élindi.

Béyjingdiki gholluq erzdarlardin ömerjan abla, özining we bashqa Uyghur erzdarlarning erz - shikayet matériyallirini torda élan qilghanliqi we xelq'ara axbaratqa melum qilghanliqi üchün ürümchi sheherlik ottura sot mehkimisi teripidin dölet mexpiyetlikini ashkarilash bilen eyiblinip 2 yilliq qamaqqa höküm qilin'ghan idi.

Téxi ikki heptining aldida jaza mudditini tügetken ömerjan abla türmidin chiqidighan küni saqchilargha özining idiyisi we meydanining özgermigenlikini ochuq bildürüp, erz qilishni yene dawamlashturidighanliqini éytqan. U dégini boyiche, ötken hepte béyjinggha yétip kelgen we bügün radi'omizgha téléfon qilip, özining naheq halda ikki yil türmide yatqanliqi heqqide melumat berdi.

Töwende muxbirimiz shöhret hoshurning bu heqte teyyarlighan programmisini anglaysiler:

Eslide qaramay néfit shirkitide ishchi bolghan, kéyin shirket teripidin mejburiy ishtin boshitiwétilgen ömerjan abla, birqanche yildin béri béyjingda néfit shirkitidiki naheqchiliqlar üstidin erz qilip kéliwatqan idi. Ömerjan yene özi yasighan néfit qédirishta ishlitilidighan bir üskünining patént hoquqi bir xitaygha bériwétilgenliki üchün, bu heqtimu erz qilish bilen birlikte, béyjinggha kelgen bashqa Uyghur erzdarlarghimu yol körsitip, ularning erzlirini qanuniy yol bilen élip bérishigha yardem qilghan. Ömerjan ablaning erz qilish usuli bir tereptin hökümet organlirigha ehwalni melum qilish bolsa, bu kargha kelmigende ehwalni xelq'ara axbaratlargha ashkarilash bolghan. U yene da'iriler erzige qulaq salmighanda, sepdashliri bilen birlikte xitay dölet organliri aldida topliship naraziliq bildürgen؛ bezide b d t ishxanisi we bezide chet'el konsulxaniliri aldida, xitay dölet organliri üstidin shikayet qilghan. Uning bu herikiti ürümchi ottura sot mehkimisi teripidin dölet mexpiyetlikini ashkarilash we dölet bixeterlikige xewp yetküzüsh bilen eyiblinip, u ikki yilliq qamaqqa höküm qilin'ghan.

Ömerjan sotta, dölet mexpiyetlikini ashkarilash dégen eyiblimini ret qilghan. U eksiche, parixor emeldarlaning qilmishini pash qilghanliqini otturigha qoyup, emeliyette özining dölet menpe'eti üchün xizmet qilghanliqini ilgiri sürgen. U yene özining wén jyabawning xelq hükümetni nazaret qilish, axbarat erkin bolush dégen chaqiriqlirigha asasen heriket élip barghanliqini bayan qilghan. Ömerjanning sottiki bayanlirini ret qilalmighan sotchilar, uni yenila ikki yilliq qamaqqa höküm qilghan. Melum bolushiche, sotta uning 59 Uyghur erzdarning matériyallirini torda élan qilghanliqi, Uyghur erzdarlarni yétekligenliki jinayi pakit supitide tilgha élin'ghandin bashqa, anisining wapatini muxbirgha bayan qilishimu dölet mexpiyetlikini ashkarilash dep qaralghan.

Ömerjan türmidin qoyuwétilgen küni özining idiyisi we meydanining özgermigenlikini saqchilargha ochuq éytqan we dégini boyiche béyjinggha yétip kélip erzini dawamlashturmaqta.

Özining türme tesiratini bayan qilghan ömerjan, xizmitidin ayrilghan we patént hoquqidin mehrum qalghandin kéyin, a'ile boyiche weyranchiliqqa uchrighanliqini, özi üchün éytqanda, türmining ichi bilen sirtida chong bir perqni bayqimighanliqini otturigha qoydi. U bu heqte bir misal élip, mundaq dédi: "Qamaqta yaxshi bolsun, yaman bolsun tört waq tamaq bar, emma men 5 yildin artuq yashighan béyjingdiki köwrüklerning astida bezide yeydighanimiz bar, bezide yoq, biz yétiwatqan köwrük astining üsti yépiq bolsimu, ikki yéni ochuq, qamaqxanining bolsa töt témi bar, héch bolmisa shiwirghandin bolsimu mudapi'elineleymiz."

U sözining axirida, emdi hayati bu basquchqa kelgende qayta tutulush we késilishtin qorqmaydighanliqini, sepdashliri bilen birlikte xitay dölet organlirigha erz sunush, erzige qulaq sélinmisa naraziliq bildürüsh, bumu kargha kelmise, ehwalni xelq'ara axbaratqa melum qilishni yene dawamlashturidighanliqini éytti.

Toluq bet