Бир нәпәр уйғур аспирантниң ейтилмиған һекайиси: қилтаққа илиниш (1)

Мухбиримиз қутлан
2015-09-01
Share
urumchi-puqraliri-kech-bazar.jpg Бир уйғурниң хәлқаралиқ чоң базар алдидин телефон сөзлишип кетиватқан көрүнүши. 2014-Йили 17-сентәбир, үрүмчи.
AFP

Шаһитларниң кәчмиш вә баянлири алий мәлуматлиқ бир қисим уйғур билим адәмлири дуч келиватқан сиясий бесим билән уларниң сарасим иликидики еғир тиниқлирини ашкара қилмақта.

Йеқинда нурғун мушәққәтләр билән әркин дуняға қәдәм қойған бир нәпәр уйғур аспирант радиомиз зияритини қобул қилип, өзиниң қорқунч, сарасим вә тәшвиш иликидә өткән аспирантлиқ һаятидин еғиз ечишқа җүрәт қилди.

"5-июл үрүмчи қирғинчилиқи" ниң һарписида оқуш пүттүргән мәзкур яш әслидә қәлбигә гүзәл арзу-арманларни пүккән, илим йолиға өзини беғишлиған үмидлик уйғур зиялийлиридин иди.

Һалбуки, хитай дөләт хәвпсизлик хадимлириниң уйғур билим қатлимиға салған йошурун тори бу үмидлик яшни чирмап елип, униң кәлгүсигә болған үмидини бәрбат қилиду.

Әйни чағда университетни пүттүрүш алдида мәктәп даирилириниң униң архипиға селип қойған "сиясий еңи төвән" дегән баһаси униң җәмийәткә чиққандин кейин хизмәт тапалмаслиқиға сәвәб болиду.

Бакалаврлиқ оқуш тарихи туруп һечйәрдин хизмәт тапалмиған бу яш ахири шинҗаң университетиниң аспирантлиқ имтиһаниға қатнишип өтиду. Бу җәрянда униң йеқин бир дости чәтәлгә оқуш үчүн чиқип кетиду. У дости билән телефонда сөзлишип нормал салам-саәтни давамлаштуриду. Әмма күнләрниң биридә үрүмчидики дөләт хәвпсизлик назаритиниң мәхпий хадимлири униң чәтәлдики дости билән телефонда сөзлишип туридиғанлиқини тутқа қилип, уни мәхпий сорақ қилиду.

Мәхпий сақчиларниң қорқутуши, попоза қилиши һәмдә тинимсиз бесими астида у ахири уларниң қилтиқиға илинип қалиду. Мәхпий сақчилар уни қоюп бәргән болсиму, лекин қәрәллик түрдә уни издәп, чәтәлдики "бөлгүнчи" дости билән алақә қилған-қилмиғанлиқи, униңдин қандақ учурларға еришкәнлики һәққидә тинимсиз бесим қилиду.

Оқуш вә илмий җәһәттики издинишләрдин башқа чәтәлдики әһваллар һәққидә һечқандақ мәлумати болмиған бу яш мәхпий сақчиларниң контроллуқиға чүшүп қелип, еғир роһий бесимға муптила болиду. Қорқунч вә сарасим униң һаятиниң бир қисмиға айлиниду….

Униң кейинки күнлирини қандақ өткүзгәнлики, немиләргә шаһит болғанлиқи вә қандақ қилип әркин дуняға қәдәм бесишқа мувәппәқ болғанлиқи һәққидики баянларни программимизниң кейинки қисмидин аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт