Бир нәпәр уйғур аспирантниң ейтилмиған һекайиси: сарасимлиқ күнләр (2)

Мухбиримиз қутлан
2015.09.02
urumchi-weqesi-tutqun-305.jpg Хитай қораллиқ әскәрлириниң уйғурларни өйму-өй ахтуруп тутқун қилиш һәрикитиниң әмәлий көрүнүшлири. 2009-Йили июл.
RFA/Shu videodin elinghan korunush

Радиомиз зияритини қобул қилған бир нәпәр уйғур яшниң баянлири нөвәттә уйғур билим қатлимидикиләрниң еғир сиясий бесим вә роһий сиқилиш ичидә яшаватқанлиқини ашкара қилмақта.

Мәлумки, уйғур елидики алий мәктәпләрдә 1980-йиллардин кейин магистирлиқ илмий унвани үчүн өрләп оқуйдиған аспирантлар қошуни барлиққа келишкә башлиған. Шуниңдин башлап магистирлиқ вә докторлуқ илмий унваниға еришкән уйғур яшлири уйғур билим саһәсидикиләрниң алий қатлимини шәкилләндүргән.

Һалбуки, йеқинқи йиллардин буян даириләрниң уйғур диярида йүргүзүватқан юқири бесимлиқ сиясити давамида уйғур билим саһәсиниң юқири қатлимиға вәкиллик қилидиған аспирант оқуғучиларниңму тәқиб нишани болуватқанлиқи мәлум.

Нам-шәрипини ашкарилашни халимайдиған мәзкур уйғур яшниң билдүрүшичә, у хитай дөләт хәвпсизлик сақчилириниң қилтиқиға илинип, еғир роһи бесим вә сарасим ичидә яшиған.

Мәхпий сақчиларниң һәр хил усуллар билән қорқутуши, мәҗбурлиши һәмдә билим қатлимидикиләр арисидин учур игиләшкә зорлиши нәтиҗисидә, у нормал инсанға хас турмушидин мәһрум болған.

Қорқунч вә сарасим униң кәспигә болған муһәббәт һәмдә зеһни күчини хоритип, һәммә нәрсигә нисбәтән гуман билән қарайдиған қилип қойған.

У өзила әмәс, бәлки һөкүмәт хираҗити билән чәтәлләргә чиқип оқуш пурситигә еришкән савақдашлири вә достлириниңму охшашла дөләт хәвпсизлик сақчилириниң бесимиға дуч келиватқанлиқини чоңқур һес қилған.

Өз вәтини вә өз хәлқи қойнида нормал бир инсанға хас яшаш муһитини йоқатқан, пүтүн вуҗудини қорқунч чирмиған, реаллиқ билән миллий виҗдани арилиқида таллашқа дуч кәлгән бу яш ахири миң бир мушәққәтләр билән әркин дуняға қәдәм басиду…

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.