Yaponiyediki falunggung teshkilatining pa'aliyitide Uyghur, tibet mesilisi tilgha élindi

Ixtiyariy muxbirimiz haji qutluq qadiri
2015-12-21
Share
Falungong-yaponiye.jpg Yaponiyediki falun'gung teshkilati kyushu shöbisining mes'uli pyaw longxé ependim ziyaritimizni qobul qilmaqta. 2015-Yili 20-dékabir, yaponiye.
RFA/Qutluq

20-Dékabir yaponiyening kagoshima shehiride élip bérilghan falunggung teshkilatining xitayning sabiq dölet re'isi jyang zémin üstidin xelq'araliq sot échish üchün élip bérilghan imza toplash pa'aliyitide, falunggong teshkilati rehberliri xitayda yalghuz falunggungchilar emes, belki étiqadliq Uyghur, tibetlerningmu xitay kompartiyesining ziyankeshlikige izchil uchrawatqanliqini teshwiq qildi.

Yaponiye falunggung teshkilati kyushu shöbisining mes'uli pyaw lungxé ependi nöwettiki Uyghur, tibet jümlidin xitaydiki az sanliq millet mesilisi heqqide toxtaldi.

Bash shtabi tokyodiki falunggung teshkilatining orunlashturushi bilen kagoshima shehiride élip bérilghan falunggung teshkilati kyushu shöbisining pa'aliyiti heqqide toxtalghan, yaponiyelik falunggung muriti ogawa ziyaritimizni qobul qilip mundaq dédi: "2001-Yilidin bashlap kumamoto shehiride falunggong teshkilatining teshwiq herikitini bashliduq. Hazir tor bétimiz we pa'aliyet merkizimiz bar. Köpligen kishiler herikitimizni qollawatidu. Meqsitimiz xitaydiki kishilik hoquq depsendichilikini dunyagha anglitish bolghanliqtin köpligen kishilerning qollishigha érishtuq. Shunga pa'aliyitimizni dawamliq halda kéngeytishke tirishimiz."

Imza toplash pa'aliyitide yaponiye falunggung teshkilati kyushu shöbisining mes'uli pyaw lungxé özining yalghuz xitayda falunggung muritlirila emes, belki Uyghur we tibet aptonom rayonidiki étiqadliq yerlik xelqlerningmu oxshashla xitay kompartiyesining ziyankeshlikige uchrawatqanliqi heqqide toxtaldi. Pa'aliyettin kéyin ziyaritimizni qobul qilghan pyaw lungxé ependi Uyghur, tibetler heqqide toxtilip:"Shizang,shinjangning hazirqi ehwalidin tepsiliy xewirim bolmisimu, emma xitay kompartiyesining ularning diniy étiqadlirini izchil depsende qilip kéliwatqanliqini bilimen. Chünki menmu ilgiri xitayning kadiri bolghan. Shunga xitay kompartiyesining asasiy qatlimidiki az sanliq milletlerge tutqan siyasetliridin toluq xewirim bar. Xitay kompartiyesi meyli shizang, meyli shinjang we yaki falunggung bolsun hemmisini oxshashla basturup kompartiyening heq ‏- hoquqini we menpetini qoghdashqa tirishiwatidu" dédi.

U sözide, xitay kompartiyesining Uyghur, tibetler heqqide memliket ichide élip bériwatqan teshwiqatlirining hemmisining pütünley yalghanliqi heqqide toxitilip:"Biz chet'elge chiqqandin kéyin shizang, shinjang mesilisining heqiqiy mahiyitini bilduq" dédi.
Ziyaritimiz jeryanida pyaw lungxé xitaydiki az sanliq milletler mesilisini tekitlep mundaq dédi:"Xitaydiki az sanliq milletlerge sirttin qarisingiz, ular xitay kompartiyesining jem'iyitide barawerlikke érishkendek körünidu shundaqla kompartiye ulargha yalghandin köz boyamchiliq qilip qurup bergen aptonom rayon, aptonom oblast dégendek hakimiyetlerning hemmisige kompartiye özi üchün xizmet qilidighan, özige sadiq kishilerni wezipige teyinlep ewetidu. Aptonom rayon xitay kompartiyesining qamchisi astida bashqurulidu. Köpinche waqitlarda xelq kompartiyening bu xil siyasetlirini hés qilalmay, kompartiyige qarighularche egishidu. Emeliyetni éytqanda xitay kompartiyesi erkinlik we kishilik hoquqning düshmini hésablinidu."

Yaponiye falunggung teshkilati kyushu shöbisining mes'uli pyaw lungxé ependi eslide xitayning sherqiy shimalidiki yenmin uniwérsitétining ximiye oqutquchisi bolup u, 1993-yili yaponiyege oqushqa kélip, yaponiyede turup qalghan.

Ziyaritimizni qobul qilghan yaponiyediki falunggung teshkilatining aktip ezaliridin oki xanim yaponiyede élip bériliwatqan falunggung herikiti heqqide toxtilip: "Men on töt yildin buyan falunggung teshkilatigha eza bolup kéliwatimen. Bu jeryanda falunggung teshkilatining türlük pa'aliyetlirige aktip qatnishish bilen birge, yaponiye xelqige namelum bolghan xitayning sabiq dölet re'isi jyang zémin zamanisida öltürülgen we jazalan'ghan falunggung muritlirining mesilisini yaponiye jem'iyitige anglitishqa tirishiwatimen" dédi.

Kyushu rayonidiki falunggung teshkilatining mes'ulliridin biri nen béyxé xanim ziyaritimizni qobul qilip falunggong teshkilatining pa'aliyiti heqqide toxtilip mundaq dédi:"Jyang zémin zamanisida falunggungchilar éghir basturushqa uchridi. Junggo xelqi we shundaqla dunya xelqi néme sewebtin falunggungchilarning basturushqa uchrighanliqining heqiqiy mahiyitini bilmidi. Shunga biz falunggung teshkilati jyang zéminning bu qirghinchiliqini dunyagha anglitish we uni xelq'araliq sotqa tartish yüzisidin toxtimay bu xildiki imza toplash pa'aliyetlirini élip bériwatimiz."

Ziyaritimizni qobul qilghan falunggung teshkilatining imza toplash pa'aliyitige közetküchisi süpitide qatnashqan yaponiyelik xitaydiki milletler mesilisi musteqil tetqiqatchisi arima xanim falunggung muritlirining Uyghur, tibet mesilisini tilgha élishining özi chet'ellerdiki xitay kompartiyesige qarshi guruhlarning ittipaqliqining birdeklikining ipadisi ikenliki heqqide toxtilip mundaq dédi: "Chet'ellerde pa'aliyet élip bériwatqan Uyghur,tibet, falunggung we shundaqla xitay öktichiliri bolsun, hemmisi teshwiqatlirida bir-birisige hemdem bolushi kérek. Bu xil yüzlinish xitay kompartiyesige rohiy jehettin ghayet zor bésim bolidu" dédi.

Yaponiyediki falunggung teshkilati mes'ullirining éytishiche, 31-dékabir yaponiyening her qaysi jayliridiki falunggung muritliri özliri turushluq sheherlerdiki xitay konsulxanilirining aldida kech sa'et altidin kéche sa'et 12 ge qeder yeni yéngi yil kirgiche bolghan waqitqiche süküt ichide turup naraziliq namayishi élip baridiken.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet