Firansiyede ötküzülgen erkinlik namayishigha Uyghurlarmu ishtirak qildi

10-Öktebir firansiyening parizh shehiride ötküzülgen erkinlik namayishigha Uyghurlarmu ishtirak qildi.

Bash shtabi italiyediki sotsiyal libéral partiyesining rehberlikide italiye we firansiyede chaqirilghan asiya elliridiki ézilgen milletning erkinliki we hörlüküni qolgha keltürüshini meqset qilghan keng kölemlik namayishqa firansiyede pa'aliyet élip bériwatqan Uyghur, tibet, wiyétnam qatarliq milletlerning kishilik hoquq teshkilatlirining wekillirimu qatnashqan.

Bu qétimqi namayishqa qatnashqan firansiye Uyghur jem'iyitining re'isi erkin ablimitning bildürüshiche, namayish nahayiti yuqiri keypiyat ichide élip bérilghan bolup, namayishta Uyghur élining hazirqi weziyiti heqqide etrapliq doklat sözlen'gen.

Yilda bir qétim ötküzülidighan bu namayishta, namayishchilar qollirida tibetning rohaniy dahiysi dalay lama bilen meshhur Uyghur öktichi ziyaliysi ilham toxtining süretlirini kötürüshüp mangghan.

Namayish chüshtin kéyin sa'et ikkidin sa'et beshke qeder dawamlashqan bolup, namayishchilar parizhdiki basti rayonidin répoblik meydanigha qeder piyade yol yürüp, erkinlik sho'arlirini towliship mangghan.

Biz bu namayish heqqide toluq melumatqa érishish üchün téléfon qilip, firansiye Uyghur jem'iyitining re'isi erkin ablimit bilen söhbet élip barduq.

Yuqiriqi awaz ulinishidin tepsilatini anglang.