Myunxénda xitay konsulxanisi aldigha kök chédir tikildi

Ixtiyariy muxbirimiz ekrem
2013.12.12
kok-bayraq-kok-chidir.JPG Xitay konsulxanisi aldigha tikilgen ay yultuzluq kök bayraq süpitidiki kök chédir. 2013-Yili 10-dékabir, myunxén.
RFA/Ekrem

10-Dékabir xelq'ara insan heqliri künidin bashlap gérmaniyening myunxén shehiridiki xitay konsulxanisi aldigha Uyghurlarning yürek sadasini ipadilesh meqsitide ay yultuzluq kök bayraq süpitidiki bir kök chédir tikildi.

Renggi kök bayraqning renggini alghan, ay yultuzning süriti töt tereplirige chüshürülgen bu kök chédirni bash shtabi myunxén shehiridiki yawropa sherqiy türkistan birliki teshkilati layihiligen hemde bu yil 10-dékabir xelq'ara insan heqliri künidin bashlap her küni töt, besh sa'et xitay konsulxanisi aldigha ornitishni pilanlighan.

Gérmaniye saqchi da'irilirining ijaziti bilen ay yultuzluq kök bayraqning simwoli bolghan bu chédirni del konsulxana derwazisining uduligha tikleshning siyasiy ehmiyiti heqqide toxtalghan teshkilat re'isi eniwerjan ependi, bu yerning taki xitay konsulxanisi qarshiliq körsitip naraziliq bildürgen we gérmaniye hökümiti öz ijazitini qayturuwalghan'gha qeder xitaygha qarshi bir siyasiy küresh bazisi süpitide xizmet qilidighanliqini tilgha aldi.

Xitay konsulxanisi bilen kök chédirning ariliqi texminen 25 métir kélidu. Arida peqetla bir yol bolup, konsulxana bilen chédir bir birige udulmu ‏- udul qariship turidu. Bu yoldin ötken yaki xitay konsulxanisigha kelgen herqandaq kishining közi bu chédirgha chüshidu. Chédirning uzunluqi töt métir, kengliki bir yérim métir. Chédir ichige qoyulghan üstellerning üstige yawropa sherqiy türkistan birliki teshkilati teripidin hazirlan'ghan gérmanche hemde in'glizche tillardiki teshwiqat wereqiliri we xitay zulumini eks ettüridighan süretler, kitabchilar tizilghan. Eniwerjan ependi xitayning közige miqtek tikilip turghan bu chédirning öz nöwitide, özini qudretlik bir dölet sanawatqan xitay üchün éghir haqaret ikenlikini tekitlidi.

Myunxéndiki Uyghurlar 10-dékabir xelq'ara insan heqliri küni munasiwiti bilen bu chédirning aldida namayish qilghan idi. Eniwerjan ependining bildürüshiche, yawropa sherqiy türkistan birliki teshkilati bu chédirdin bashqa yene mashinining arqigha chétiwalidighan üsti yépiq bir kozupmu sétiwalghan bolup, bu kozupmu oxshashla ay yultuzluq kökbayraqning renggini alghan. Xitay konsulxanisigha yéqin mashina toxtitidighan jaygha xitaygha qarshi teshwiqat rolini öteydighan bu kozupmu qoyup qoyulghan. Uning bildürüshiche, myunxén shehiridiki namayishlar bundin kéyin mushu chédir we kozup bilen bille élip bérilidiken, buning kishilerni jelp qilish küchi téximu zor bolidiken. Eniwerjan ependi ziyaritimiz esnasida, bu kök chédir we kozupning ikki teripige yézilghan gérmanche, in'glizche xetlerning mezmunidin uchur berdi. Eniwerjan ependi yene, bu kök chédirning muhim ehmiyetliridin biri, wetendiki xelqqe ümid béghishlash, dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.