Германийә ташқи ишлар министирлиқи хадимлири уйғур вәкиллирини қобул қилди

Ихтиярий мухбиримиз әкрәм
2015.12.09
Share on WhatsApp
Share on WhatsApp
uyghur-wekiller-germaniye-minister-umid-agahi.jpg Уйғур вәкиллири германийә ташқи ишлар министирлиқида хатирә сүрәттә. 2015-Йили 9-декабир, германийә.
RFA/Ekrem

Д у қ вәкиллириниң билдүрүшичә, берлинда германийә ташқи ишлар министирлиқи хадимлири уйғур вәкиллирини қобул қилип, өзлириниң хитай һөкүмити билән уйғурлар мәсилиси үстидә елип барған сөһбитиниң мәзмунидин мәлумат бәргән вә улар билән уйғур елиниң нөвәттики вәзийити һәққидә сөзләшкән.

Д у қ муавин рәиси үмид агаһи вә нәшрият-тәшвиқат комитети мудири пәрһат муһәммиди әпәндиләрниң 9-декабир күни берлиндин бәргән мәлуматиға асасланғанда, германийә ташқи ишлар министирлиқи инсан һәқлири комитети мудири шитрас әпәнди уйғур вәкиллирини ташқи ишлар министирлиқи бинасида қобул қилған болуп, бу сөһбәткә баш штаби германийәдики хәтәр астидики милләтләрни қоғдаш тәшкилати асия ишлири бөлүминиң мәсули улрик делюс әпәндиму қатнашқан.

Д у қ хадимлириниң билдүрүшичә, бу қетимқи сөһбәт мәхсус уйғурлар мәсилисини тема қилған болуп, ташқи ишлар министирлиқи хадимлири алдинқи һәптиләр хитайға барғанда хитай вәкиллири билән уйғур мәсилиси үстидә сөһбәттә болғанлиқини вә бу сөһбәтниң мәзмунини билдүрүп өткән. Үмид агаһи әпәнди бу һәқтә тохтилип, учришишниң асасий мәзмунидин бизни хәвәрләндүрди.

Пәрһат муһәммиди әпәндиниң билдүрүшичә, бу қетимқи учришиш германийә һөкүмитиниң уйғурлар мәсилисигә болған иҗабий позитсийисини ениқ көрситип беридикән. Шитрас әпәнди сөһбәт әснасида, уйғурларниң германийә һөкүмитидин күтидиған үмидлири тоғрилиқ сориған. Үмид агаһи җаваб берип, уйғурларниң бәзи истәклири һәққидә тохталған.

Бу қетимқи учришишта йәнә, уйғур сиясий панаһлиқ тилигүчиләрниң германийәдики әһвали һәққидиму сөһбәтләр болуп өткән. Хәтәр астидики милләтләрни қоғдаш тәшкилати мәсули улрик делиюс әпәнди бу һәқтә әтраплиқ мәлумат бәргән. Бу қетимқи учришиш бир йерим саәт давамлашқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.