Gérmaniyede xitaygha qarshi namayish élip bérildi

Ixtiyariy muxbirimiz ekrem
2018-12-10
Élxet
Pikir
Share
Print
Myunxénda ötküzülgen xitaygha qarshi namayishtin bir körünüsh. 2018-Yili 10-dékabir. Myunxén, gérmaniye.
Myunxénda ötküzülgen xitaygha qarshi namayishtin bir körünüsh. 2018-Yili 10-dékabir. Myunxén, gérmaniye.
RFA/Ekrem

Dunya Uyghur qurultiyining chaqiriqigha bina'en 10-dékabirdiki dunya kishilik hoquq küni munasiwiti bilen gérmaniyening myunxén shehiridiki awat sayahet merkizi bolghan odé'ons meydanida namayish élip bérildi. Namayishqa er-ayal, chong-kichik bolup köpsanda Uyghurlar, birqisim qérindash türk jama'iti we kishilik hoquq teshkilatlirining wekilliri qatnashti.

D u q ning mu'awin re'isi perhat muhemmidi ependi bu qétimqi namayish meydanidin ziyaritimizni qobul qilghanda d u q ning chaqiriqigha bina'en bügün dunyaning her yerliride her xil shekildiki pa'aliyetlerning ötküzülüwatqanliqini, dunya kishilik hoquq künide Uyghurlar mesilisini keng türde tonutushning ehmiyitini tilgha aldi. 

Bu qétimqi namayishni merkizi myunxén shehiride bolghan "Yawropa sherqiy türkistan birliki" bilen "Méhriban anilar" jem'iyiti birlikte teshkilligen bolup, teshkilat re'isi turghunjan alawudun ependi ziyaritimizni qobul qilip, namayishning meqsetliri toghrisida toxtilip ötti.

D u q ning yawropagha mes'ul wekili esqerjan ependi namayish jeryanida Uyghur diyarining omumiy weziyiti, bolupmu jaza lagérliri mesilisini gérman tilida etraptiki jama'etke tepsiliy chüshendürüshke, yerlik xelq we sayahetchilerni Uyghurlarning nöwettiki échinishliq weziyitidin melumatlandurushqa tirishti.

Bu qétimqi namayish sépidin orun alghan myunxéndiki jama'et erbabi ablimit tursun ependi neq meydanda ziyaritimizni qobul qilghanda muhajirettiki Uyghurlarni jaza lagérlirigha qarshi omumyüzlük qozghilishqa chaqiriq qildi. 

Xitayning jaza lagérigha qamalghan Uyghur ziyaliysi gülgine tashmemetning hedisi gülzire tashmemetmu bu namayishqa qatnashqan bolup, u jaza lagérliridiki Uyghurlarning erkinliki üchün bu küreshni dawam qilduridighanliqini tilgha aldi. 12 Yashliq Uyghur perzenti ensar bolsa "Men jaza lagérliridiki Uyghurlarni qutuldurush üchün bu namayishqa keldim," dédi. 

Namayish meydanini ay-yultuzluq kök bayraq, jaza lagérliridiki tutqunlar we shéhitlarning resimliri, "1 Milyon Uyghur lagérdin qoyup bérilsun!" dégendek sho'arlar yézilghan lozunkilar qaplighan idi. Jama'et sa'et 2:00 din 3:30 qeder bir yérim sa'et namayish ötküzdi.

Toluq bet