A'ilidiki 5 partiye ezasi we 3 emeldarning yüz xatirisi ghayib oghulning uchurini élishqa yarimighan

5-Iyul weqeside xitay hakimiyitige eng sadaqetmen bolghan we uning üchün xizmet körsitip kelgen Uyghurlarningmu oxshashla zerbe we yoqitish nishani bolghanliqi yüzlerche pakitlar bilen ispatlanmaqta.

Eng yéqinda bayqalghan ispatlardin biri, tünügünki programmimizda tonushturulghan ghayib shöhret osmanning a'ile terkibi we a'ile tarixidur. Melum bolushiche, ghayib yardemchi saqchi shöhret osmanning anisi 30 yilliq sot xadimi, dadisi nahiyilik pilan komitétining sabiq mudiri, bowisi sabiq yéza bashliqi, momisi nahiyilik erziyet idarisining dem élishqa chiqqan kadiri, taghisi nöwette nahiyilik hökümette bölüm bashliqi. Bularning hemmisila partiye ezasi.

3 Ewlad kishiliri xitay kompartiyisige hayatlirini béghishlap kelgen bu a'ilining xitay da'iriliri aldidiki yüz xatirisi, ghayib oghul shöhret osmanning ölük-tiriklikinila emes, qaysi qamaqxanigha ekétilgenlikinimu bilishke yarimighan.

5-Iyuldin kéyin ghayib bolghanlar, Uyghur jem'iyitining herqaysi qatlamliridin bolup, bularning ichide imammemet élige oxshash injinirlar, alim abduréhimgha oxshash sodigerler, alimjan bekrige oxshash shirket xadimliri, abduréhim sidiqqa oxshash téxnik-hünerwenler, eniwer turdigha oxshash japakesh ishlemchilermu bolghinidek؛ yene, xitay hökümitige sadiq bolup yashap kelgen kompartiye ezasi abdughéni eziz, yardemchi saqchi shöhret osmanlarmu bar. Ularning amanliqigha özlirining sadaqiti kargha kelmigendin bashqa ular heqqide uchur élinishqa ularning a'ile-tawabi'atlirining ewladmu-ewlad körsetken sadaqetlirimu ishqa yarimighan.

Muxbir: ottuz yilliq sot xadimi turup, oghlingizning qaysi qamaqxanigha apirilghanliqinimu bilelmidingizmu?
Méhrinisa: bilelmidim, héch amalini qilalmidim. Men bir ayal kishining qolidin néme kélidu.

Muxbir: wilayetlik sot we aptonom rayonluq sot qatarliq öz kespiy tarmaqliringizni ishqa qol tiqquzup sürüshte qilip baqmidingizmu?
Méhrinisa: aptonom rayonluq sot arilashmidi, nahiyilik siyasiy-qanundikiler arilashti, emma ularmu uchur alalmidi.

Muxbir: idaringiz (awat nahiyilik sot mehkimisi)chu?
Méhrinisa: idaridikiler “Siz bir qanun xadimi, erz qilsingiz bolmaydu” dep manga idiyiwi xizmet ishlidi. Men axiri bolmay “Men erz qilmaymen, peqet iltimas sunimen” dep ruxset sorap ürümchige bardim.

Muxbir: ürümchidikilerning jawabi néme boldi?
Méhrinisa: ularmu izdep tapalmidi. Ehwalimni uqqan Uyghur saqchilardin manga hésdashliq qilip közige yash alghanlar boldi.

Muxbir: démek, ularning kallisighimu “Bu ayalning balisining béshigha kelgen kün ete-ögün bizning balimizningmu béshigha kélidu” dégen oy kelgen gepte?
Méhrinisa: shundaq, qanun saheside turup özimizning balisini özimiz qoghdiyalmisaq qandaq bolidu déyishti.

Muxbir: a'ilide sizdin bashqa bu ishqa yol mangidighanlar bolmidimu?
Méhrinisa: ürümchide singlimning yoldishi dashöde (uniwérsitétta) proféssor؛ u yol méngip baqti, inim awat nahiyilik hökümette bir bölüm bashliqi umu yol mangdi, bolmidi. Yoldishim (awat) nahiyilik pilan komitétining mudiri idi, u shu yili késel we derdtin ölüp ketti.

Muxbir: démek, a'ilenglar partiye we hökümette muhim orun igiligen we xizmet körsitip kéliwatqan iken?
Méhrinisa: shundaq. Dadammu bir yéza bashliqi idi, apam nahiyilik erziyet idarisidin pénsiyige chiqqan.

Yene melum bolushiche, 5-iyul weqesidin kéyin ghayib bolghanlardin imammemet éli aptonom rayonning sabiq re'isi isma'il tiliwaldining tughqini, ghayib amantay jümetay bolsa sabiq qatnash nazaritining naziri hemze dégen kishining newrisi, 5-iyulda tutulup türmide öltürülgen nurul'islam sabiq soda‏ nazariti naziri dawut qurbanning newrisi idi.