Xitay da'iriliri özliri tarqatqan mexpiy uqturushning axbaratqa ashkarilinishidin endishige chüshti

5-Iyul weqeside oghli(otturida) ghayib bolghan, saqchilarning nazariti astida tijaret qiliwatqan baqqal hélaji (soldin birinchisi). 2012-Yili, ürümchi.

Ürümchidiki bir ahaliler komitéti 5-iyul ghayibliridin alim hélaji a'ilisige öy ijare bermeslik heqqide mexpiy uqturush tarqatqanliqi ashkarilan'ghandin kéyin, muxbirimiz hélaji a'ilisidin mezkur uqturushning kopiyisini tor arqiliq özige yollap bérishni telep qilghan we bu telepni hélaji a'ilisi razimenlik bilen qobul qilghan idi. Shu künning etisi saqchilar hélaji a'ilisige üsüp kirip mezkur uqturushning dölet mexpiyetlikige a'it matériyal ikenlikini eskertken we eger bu uqturushni axbaratqa ashkarilisa, hélajining a'ile boyiche türmide yatidighanliqini éytip tehdit salghan. Hélaji a'ilisimu özlirining puqraliq hoquqini tilgha élip, saqchilar bilen qet'iy pozitsiyide zakonlashqan.

Muxbir: qaysi küni sözleshken waqtimizda, qolunglardiki uqturushning kopiyisini manga yollap bermekchi bolghantinglarghu?
Qurban'gül: uninggha yol qoymidi. Etigendila weli sojang (baxuliyang saqchixanisining mu'awin bashliqi) kiriptu, qolunglardiki uqturushni yollimanglar, yollisanglar a'ile boyiche türmige solaymiz dep.

Muxbir: siler néme dédinglar?
Qurban'gül: bu uqturush seweblik öysiz qalduq, ishsiz qalduq, buni kim sorisa shuninggha yollaymiz déduq.

Muxbir: saqchixana bashliqi buni öz saqchixanisining agahlandurushi dep yetküzdimu yaki sheherlik saqchining buyruqi dep uqturdimu?
Qurban'gül: ürümchi sheherlik dölet amanliq idarisi shundaq buyruq qiptu, “Eger uqturushni yollisa, a'ilisi boyiche türmige sola” dep, bizge shundaq dédi “Yollisanglar béshinglargha awarichilik tépiwalisiler” dédi.

Muxbir: siler yaman bolghandin kéyin, qudretlik döletning qanun orgini bolghandikin, mushunchilik bir uqturushning ashkarilinishidin némishqa qorqisiler dep sorap baqmidinglarmu?
Qurban'gül: unimu soriduq, buninggha jawab bermey turuwaldi.

Muxbir: undaq bolsa, bu uqturushni emeldin qaldurunglar dep telep qoymidinglarmu?
Qurban'gül: déduq, emise awwal bu ashkarilansa bolmaydighan uqturushni chiqarghan ahaliler komitétining bashliqi memet hoshurni soraq qilinglar, uni jazalanglar dep.

Muxbir: memet hoshur kimken?
Qurban'gül: shu uqturushni tarqatqan nenwen ahaliler komitétining mudiri.

Muxbir: uqturushni shuning chiqarghanliqi éniq boldimu?
Qurban'gül: éniq, shu chiqiriptu, minbing dep atalghan 6 yanchuqchi uni öymu öy tarqitiptu. Bu ishlarni (yoldishim) hélajidin sorap béqing.

Muxbir: hélaji, bu ikkimiz sözleshkendin kéyin, sizge yene üstilep awarichilik boldimu, bilip baqay dep téléfon qilishim.
Hélaji: bu uqturushni yollima dep tehdit salghidin bashqa awarichilik bolmidi.

Muxbir: uqturush qolingizda barmu, achiqip kettimu?
Hélaji: élip ketti.

Muxbir: buni yollishimizning néri xata dep sorap baqmidingizmu?
Hélaji: sorudum, bu dölet mexpiyetlikige a'it matériyal yollisang bolmaydu dédi. Men döletning puqrasighu, méning yashash hoququm yoqmu, némishqa manga bundaq ziyankeshlik qilghanlarni jazalimaysiler désem, bu mesile tekshürülüwatidu deydu.

Muxbir: tekshüriliwatqini, ghayib oghlingizning ishimu yaki bu uqturushning ishimiken.
Hélaji: mushu uqturush chiqarghan memet hoshur tekshürülüwatidu, dédi.

Muxbir: bu memet hoshur, shu ahaliler komitétining birinchi bashlighu?
Hélaji: yaq, uning üstide xenzu sékrétar bar.

Muxbir: xenzu sékrétar mushu ishlardin xewersizmidu?
Hélaji: bu mexpiy uqturushning ishidin, ahaliler komitétla emes, sheherlik, aptonom rayonluq alaqidar bashliqlarning hemmisi bilidu.

Muxbir: uqturushni tarqatqan ahaliler komitétining tekshüriliwatqini rastmidu?
Hélaji: busi manga melum emes, men yenila öy izdesh bilen aware.

Yuqirida ürümchidiki alaqidar xitay da'irilirining özliri tarqatqan mexpiy uqturushning axbaratqa ashkarilinishidin endishige chüshkenliki heqqide tepsiliy xewer berduq.