Guma nahiyiside weziyet jiddiy we sirliq: sa'et 9din kéyin chiraghlar öchürülüshi shert

Muxbirimiz shöhret hoshur
2017-01-11
Élxet
Pikir
Share
Print
Uyghur hujumchilarni tutush wezipisini ötewatqan xitay qoralliq küchliri.
Uyghur hujumchilarni tutush wezipisini ötewatqan xitay qoralliq küchliri.
CCTV

Xitay axbarati xitay qoralliq küchlirining 1-ayning 8-küni xotende 3 neper gumandarni étip tashlighanliqini we bularning 2015-yili guma nahiyeside yüz bergen atalmish "22-Aprél térror weqesi" bilen chétishliq ikenlikini xewer qilghandin kéyin, muxbirimiz guma nahiyesining nöwettiki weziyiti heqqide éniqlash élip bardi. Melum bolushiche, gumida shenbe kündin bashlap 1-derijilik bixeterlik mudapi'e tedbiri yolgha qoyulghan؛ emma da'iriler wezipe ijra qiliwatqan kent amanliq xadimlirighimu bundaq jiddiy tedbirning sewebi heqqide melumat bermigen. Ahalilerge natonush kishilerni derhal melum qilish uqturulush bilen birlikte, kech sa'et 9 din kéyin chiraghlarni öchürüsh buyrulghan.

Xitay axbarati yuqiriqi 3 gumandarni étip öltürgenlikini xewer qilghan, emma ularning qeyerde étip öltürülgenliki we  tutulghanlarning bar-yoqluqi bildürülmigen. Tünügünki éniqlishimiz dawamida weqening guma köktérekte yüz bergenlik éhtimalliqi ashkarilan'ghan. Bügünki éniqlishimiz dawamida guma nahiyiside 4 kündin béri weziyetning pewqul'adde jiddiy ikenliki ashkarilandi.

Amanliq xadimliridin biri weqede tutulghan we yarilan'ghanlarningmu barliqini ashkarilidi. Xitayning bu weqeni bundaq sirliq tutushi xadimlar arisida weqe heqqide oxshimighan uchurlarning tarqilishigha seweb bolghan. Xitay terep qéchip yürüwatqan 3 gumandarning étilghanliqini bayan qilghan, bir amanliq xadimi gumandarlardin 3 nepirining özini partlitiwalghanliqini bayan qildi.

Xitayning "Shinjang géziti" guma nahiyilik sot mehkimisining xizmette biperwaliq qilghan köktérek bazarliq partkomning ikki sékrétari we töwenqumköl kentining sékrétari rozimemet mexmutni türmige tashlighanliqini xewer qilghan, emma qaysi xizmette, qandaq biperwaliq qilghanliqi ashkarilanmighan. Amanliq xadimliri rozimemet mexmutning muqimliq xizmitide biperwaliq qilghanliqi üchün türmige tashlan'ghanliqini ilgiri sürdi.

Yuqirida xitay saqchiliri xotende 3 neper gumandarni étip tashlighandin kéyinki guma weziyiti heqqide melumat berduq.

Toluq bet