Güzelnur xanim özige qaritilghan nazaret we cheklimining kücheytilgenlikini bildürdi

Muxbirimiz méhriban
2014.03.24
Share on WhatsApp
Share on WhatsApp
ilham-toxti-guzelnur-woeser.jpg Ilham toxti ependi tutulup kétishtin ikki kün ilgiri, tibet ayal yazghuchisi wo'eser ilham toxti ependining öyige yoqlap kelgende chüshken xatire süret. Soldin onggha: ilham toxti, ilham toxtining xanimi güzelnur we wo'eser xanim. 2014-Yili 13-yanwar, béyjing.
RFA/Méhriban


Amérika prézidénti barak obamaning xanimi mishal obamaning xitay ziyariti mezgilide béyjingdiki kishilik hoquq aktipliri we erzdarlar teqip astigha élin'ghan.

15 - Yanwar tutqun qilin'ghan Uyghur öktichisi ilham toxtining ayali güzelnur xanim, da'irilerning özi we adwokatning ilham ependi bilen körüshüshige yenila yol qoymaywatqanliqini bildürüsh bilen bille, noruz mezgilide özige qaritilghan nazaret we cheklimilerning téximu kücheygenlikini bildürdi.

Amérika prézidént xanimi mishal obama ötken peyshenbe xitay ziyaritini bashlidi. Melum bolushiche, 1 - xanim mishél obamaning 19 - marttin 26 - martqa qeder dawamlishidighan ziyariti jeryanida béyjingdiki kishilik hoquq aktipliri we erzdarlar teqip astigha élin'ghan yaki béyjingdin chetleshtürülgen.

Radi'omiz igiligen ehwallardin melum bolushiche, béyjingdiki kishilik hoquq pa'aliyetchilirini we erzdarlarni teqip qilish xitayning 18 - qurultiyidin ilgirila kücheytilgen bolup,1 - marttin ilgirila ularning beziliri öyige nezerbend qilinip, narazet qilish kücheytilgen bolsa, tibet ayal yazghuchisi wo'ésér qatarliq yene bir qisim ziyaliylar béyjingdin chetleshtürülüp, “Mejburiy sayahet” qildurulghan.

Radi'omiz ziyaritini qobul qilghan güzelnur xanim, noruz mezgilide özining wichat, skaypé qatarliq ammiwi alaqe torining taqiwétilgenlikini, uning öyi etrapigha orunlashturulghan saqchilarning köpeytilip, ilgiri bu öyge da'im kélip turidighan dostlarning ishik aldida nazarette turghan saqchilarning tosqunluqigha uchrawatqanliqini bildürüsh bilen bille, bu a'ilining yéqin dosti tibetlik yazghuchi wo'ésér xanimning mejburiy halda tibetke sayahetke ewetiwétilgenlikini bildürdi.

Radi'omiz xitay bölümining 24 - mart düshenbe künidiki xewiride déyilishiche, mishal obamaning xitay ziyariti mezgilide, mishal obama bilen körüshüsh üchün sendungdin béyjinggha kelgen erzdar lu chiyu méy we shüdali qatarliq ikkeylenmu, 20 - mart küni saqchilar teripidin mejburiy halda xangjugha sayahetke élip kétilgen. Melum bolushiche bu ikki erzdar mishal obama xanimning béyjingdiki gugung xan ordisi moziyxanisida ziyarette bolidighanliqini anglighandin kéyin, téléfonda meslihetliship gugung xan ordisigha bérip mishal obama bilen körüshmekchi bolghan. Emma,ularning télifonda sözleshken sözi saqchilar teripidin sézilgendin kéyin, da'iriler gugung mozéyxanisigha mexsus adem ewetip, bu ikkeylenni xangjugha “Mejburiy sayahet” ke élip ketken. Melum bolushiche, bu ikki erzdar yéqinda amérikigha bir yilliq sayahet wizasi alghan bolsimu, emma ularning pasporti bikar qilin'ghanliqi üchün, amérikigha kélish chüshi köpükke aylan'ghan.

Güzelnur xanim yene, da'irilerning yéqindin buyanqi nazariti we bésimi qattiq bolghanliqi üchün, özining ilham toxtining adwokati li fangping ependi bilenmu körüshelmeywatqanliqini bildürdi.

Güzelnur xanim yene özining nöwettiki iqtisadiy ehwali heqqidimu toxtilip, ilham ependining mektep teripidin bérilidighan ma'ashi ürümchi saqchi da'irilirining buyruqi bilen tonglitiwétilgenliki üchün, mushu künlerde éghir rohi bésimgha uchrighandin bashqa, iqtisadiy bésimghimu uchrawatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.