Amanliq mudiri: "Dolqun hasharning meqsiti kishilerni bosh qoymasliq, qanunsiz ishlardin tosush

Muxbirimiz shöhret hoshur
2015-05-29
Share
20-Esirning-beshidiki-hashar-ishlewatqan-Uyghur-dixanlar-305.jpg Süret, shwétsiyede 1917 - yili neshr qilinghan 'musheqqetlik qedem - sherqi türkistandiki 25 yil' namliq kitabqa kirgüzülgen uyghur dixanlirining hashargha ishlewatqan körünüshliri élinghan süretlerdin biri.
'Musheqqetlik qedem - sherqi türkistandiki 25 yil' dégen kitabtin élindi. / Yalqun


Aqsuning toqsu nahiyiside bu yil 1 - aydin bashlan'ghan we hazirghiche dawam qiliwatqan, qachan axirilishidighanliqi hem melum bolmighan dolqun hasharning sewebi muxbirimizning diqqitini tartti. Bu heqte muxbirimizning so'allirigha jawab bergen kent amanliq mudiri, özining yultuzbagh yéziliq hökümette échilghan yighinda anglighanlirigha asasen, dolqun hasharning kishilerni bosh qoymasliq we bosh waqitlirida topliship qalaymiqan we qanunsiz ish chiqirip qoyushining aldini élish üchün yolgha qoyuliwatqanliqini pash qildi. U sözide dolqun hasharning hergiz ishlepchiqirishning éhtiyaji bilen emes, peqet we peqet muqimliqning éhtiyaji bilen ijra qiliniwatqanliqini tekitlidi.

Hörmetlik radiyo anglighuchilar, yuqiriqilardin melumki, dolqun hashar, bultur 22 - may etigenlik bazar hujumidin kéyin bashlan'ghan qattiq zerbe bérish dolqunidin 6 ay kéyin bashlan'ghan. Xitay qattiq zerbe bérish dolqunini bashlighandin kéyinmu aqsu wilayiti teweside az dégende 20 meydan qarshiliq herikiti yüz bergen. Bularning ichide tesiri nisbeten chong bolghanliri 8 neper pida'iyning 4 a'ililik xitay yer höddigerni a'ilisi boyiche boghuzlap öltürüsh weqesi, bay nahyiside yüz bergen öy tekshürgili kirgen xitay saqchilirigha hujum qilish weqesi qatarliqlar. Mana bu ehwalni nezerde tutqan muhajirettiki Uyghur közetküchiler, xitayning qattiq zerbe bérish herikiti bilenmu bash egdürelmigen Uyghur xelqini, hashargha mejburlash arqiliq tinjitmaqchi boluwatqanliqini ilgiri sürmekte. Toqsuda yolgha qoyuluwatqan bu hashargha dolqun hashar dep nam bérilishimu Uyghur közetküchilerning yuqiriqi perizining toghriliqini isharetlimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet