Һиҗабқа қол узатқан йеза башлиқини тиллиған зөһрәгүл мәмтимин 3 йиллиқ кесилгән

Мухбиримиз шөһрәт һошур
2014-12-22
Share
hijap-romal-yaghliq-reshatka-jaza-305.jpg Төмүр решаткилиқ һойлиға соланған һиҗапланған уйғур аяллири.
RFA/Ruqiye


Керийә наһийисиниң сийәк йезисида йеқинқи 6 ай ичидә аз дегәндә миңға йеқин аялниң бешидики лечәк мәҗбурий еливетилгән, бу җәрянда мәҗбурланған аял вә униң аилә - тавабиатлири билән хитай сақчилири вә хадимлири оттурисида көп қетим җидәл - маҗира вә тоқунушлар йүз бәргән. Маҗиралардин биридә сабиқ дөләт хизмәтчиси зөһрәгүл мәмтимин бешидики лечәккә қол узатқан йеза башлиқи мәмәтҗанни тиллиған. Зүһрәгүлниң бу қилмиши үчүн, бу йил 7 - айда сийәк йезисида сот ечилип униңға қамақ җазаси берилгән; сотқа униң аилә - тавабиатлири қатнаштурлмиған. Мәлум болушичә, дәсләптә керийә, униңдин кейин нийә қамақханисида тутуп турулған зөһрәгүл мәмтимин нөвәттә үрүмчидики бир аяллар түрмисидә җаза муддитини өтимәктә.

Мәлум болушичә, зөһрәгүл мәмтимин 1996 - йили хотән вилайәтлик техник ишчилар мәктипини пүттүргән. У бир мәһәл анисиниң хизмәт орни болған йезилиқ тәминат сода копиратипида ишлигәндин кейин иштин бошитилған, арқидин у, йезилиқ игилик башқуруш идарисиға ишқа чүшкән; йәнә мәлум мәзгилдин кейин бу хизмәт орнидин айрилип үрүмчигә йөткилип таш содиси билән шуғулланған. Үрүмчидики мәзгилидә учрашқан дост - бурадәрлириниң тәсир көрситиши билән һидайәт йолиға маңған зөһрәгүл мәмтимин, бу йил юрти керийәниң сийәк йезисидики бирқанчә сорунда көпчиликниң тәлипигә бинаән сағлам әвлад тәрбийәләш һәққидә тәблиғ қилған. Аталмиш қанунсиз диний паалийәт билән шуғуллиниш гумани билән тутқун қилинған зүһрәгул мәмтимин бешидики личәкни еливетишкә зорлиған йеза башлиқини тиллиған. Униң бу қилмиши бу йил 7 - айда сийәк йезисида ечилған сотта, 3 йиллиқ кесилишигә сәвәб болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт