Токйода хитайниң мәһбусларниң ички әзалирини көчүрүшигә даир һөҗҗәтлик филим көрситилди

Ихтиярий мухбиримиз һаҗи қутлуқ қадири
2016.12.01
Share on WhatsApp
Share on WhatsApp
ichki-organ-setish-filim.jpg Хитайдики мәһбусларниң ички органлирини сетиш қилмишиға аит һөҗҗәтлик филимини көрситиш паалийити. 2016-Йили 30-ноябир, токйо.
RFA/Qutluq

30-Ноябир токйодики мәдәнийәт мәркизидә канадалиқ икки нәпәр адвокат тәрипидин тәйярланған хитай түрмилиридики сиясий мәһбусларниң ички әзалирини йөткәп сетиш қилмишиға даир һөҗҗәтлик филим кәң японийәлик көрүрмәнләр билән тунҗи қетим йүз көрүшкән.

Мәзкур филимни қоюш паалийитини японийәдики “хитайдики мәһбусларниң ички әзалирини елип көчүрүш һәрикитини тохтитиш тәшкилати” уюштурған болуп, паалийәткә японийәдә паалийәт елип бериватқан кишилик һоқуқ тәшкилатлиридин фалуңгуң, тибәт вә уйғур тәшкилатлириниң мәсуллириму қатнашқан.

Паалийәткә йәнә мәзкур филимни тәйярлиғучилардин канадалиқ атақлиқ кишилик һоқуқ адвокати давид матас билән канаданиң сабиқ тәптиши вә асия-тинч окян мәсилилири бойичә дөләт ишлири катипи давид килгорму иштирак қилған.

Филимда асаслиқи хитай йөткәп сетиватқан адәм органлириниң түрмидики фалуңгуң муритлири, уйғур сиясий мәһбуслири, тибәт раһиблири вә хитай христиан муритлириниң болуши мумкинликини илгири сүридиған дәлил-испатлар көрситилгән.

Мәзкур филимни қоюш паалийитигә қатнашқан японийә уйғур бирлики тәшкилатиниң рәиси турмуһәммәт һашим паалийәттин кейин телефон зияритимизни қобул қилип мәзкур филим һәққидә тохталди.

Турмуһәммәт һашимниң билдүрүшичә, мәзкур филимни қоюш паалийитидин кейин, хитайдики адәм органлири әткәсчилики һәққидә сөһбәт елип берилған болуп, сөһбәттә канадалиқ адвокат давид матас униң уйғур сиясий мәһбусларниң ички әзалирини елип-сетиш мәсилиси һәққидә сориған соалиға җаваб бәргән.

Илгири хитайдики лявниң педагогика университетида оқутқучи болған, японийәдики фалуңгуң муритлиридин лин филим һәққидә тохтилип: “хитай компартийәсиниң түрмиләрдики фалуңгуң муритлириниң ички әзалирини йөткәп сетиш қилмишиға чидап турғили болмайду. Бу инсан қелипидин чиққан җинайәт. Шуңа хитай һөкүмити бу җинайити үчүн хәлқара сотқа тартилиши керәк. Бу хил зиянкәшликкә учриғанлар ялғуз фалуңгуң муритлирила әмәс, бәлки хитайдики уйғур сиясий мәһбуслири вә тибәт раһиблири.”

Нам шәрипини ашкарилашни халимиған, токйодики мәлум бир теббий университетниң оқуғучиси филимни көргәндин кейинки тәсиратини баян қилип: “хитайдики фалуңгуң муритлири,тибәт раһиблири вә уйғур сиясий мәһбуслириниң ички әзалирини йөткәп сетиш қилмиши һәққидики бу филимни көрүп толиму һәйран болдум. Бу филимни көпләп тарқитиш вә тәшвиқ қилиш арқилиқ һәммимиз бирликтә хитайниң бу қилмишини тохтитишқа һәрикәт қилишимиз керәк” деди.

Игилишимизчә, канадалиқ атақлиқ кишилик һоқуқ адвокатлиридин давид матас билән канаданиң сабиқ тәптиши вә асия-тинч окян мәсилилири бойичә дөләт ишлири катипи давид килгор йеқинда, австралийә парламентиға шикайәт сунуп, хитай түрмисидики сиясий мәһбусларниң ички әзалирини йөткәп сетиш қилмишиға қарши бир тәклип лайиһәсини тәстиқлашни тәләп қилған.

Мәлум болушичә, йеқинда японийә парламент әзаси вада масамуне японийә уйғур бирлики тәшкилати тәрипидин токйода өткүзүлгән шәрқий түркистан җумһурийәт күнлирини хатириләш мурасимида қилған нутқида, өзиниң пат йеқинда японийә парламентида хитайдики адәм органлири әткәсчилики һәққидә мәхсус бир лайиһәни оттуриға қойидиғанлиқини билдүргән иди.

Юқириқи аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.