Кәнт сақчиси: "иккийүзлимичиләр гуруһини паш қилишта қулақлардин пайдиландим"

Мухбиримиз шөһрәт һошур
2017-10-12
Share
charlash-xelq-seperwer-tianshanwang-8.jpg Бай көмүркан һуҗумчилирини қоршап тутуш опиратсийәсидин көрүнүш.
ts.cn

Мухбиримизниң уйғур аптоном районида давам қиливатқан кәң-көләмлик тутқун һәққидики ениқлашлири давамида, пәйзиватниң шаптул йезисидики бир сақчи хадими, қапақтерәк кәнтидә "иккийүзлимичилик" билән әйиблинип 7 йиллиқтин кесилгән сабиқ секретар қурбан һеким билән униң 9 нәпәр шерикини өзи паш қилғанлиқини билдүрди. У, аталмиш "қурбан һеким гуруһи" ни паш қилишта кәнттики қулақлири, йәни учурчилириниң муһим рол ойниғанлиқини баян қилди. Игиләнгән учурлар нөвәттики вәзийәтниң җиддийликидә асаси қатламдики бир қисим пурсәтпәрәс хадимларниңму бәлгилик роли барлиқини ашкарилимақта.

Ениқлашлиримиздин мәлум болушичә, уйғур аптоном районида кәң көләмлик давам қиливатқан "йепиқ тәрбийәләш" долқунида бәзи йеза кәнтләрдә аһалиләрниң 20-30 пирсәнти, бәзилиридә болса 5 пирсәнти аталмиш "тәрбийәләш мәркәзлири" гә йиғивелинған. Санниң бу қәдәр көп болушида юқири дәриҗилик орунларниң биваситә буйруқи асаслиқ рол ойниғандин башқа, асасий қатламлардики бир қисим пурсәтпәрәс сақчилар вә кәнт кадирлириниң актиплиқиму бәлгилик рол ойнимақта.

Һазирға қәдәр ашкарилинишичә, ғулҗа наһийиси бойичә 1500 чә, корла шәһири бойичә 2000 чә киши тәрбийәлиниватқан болса йеңисарниң топлуқ йезисидинла 2000 дин артуқ, қарақашниң пурчақчи йезисидин болса 4000 чә киши "йепиқ тәрбийәләш" тә тутуп турулмақта. Муһаҗирәттики бәзи уйғур көзәткүчиләр, "йепиқ тәрбийәләш" һәрикитидә тутулғанлар саниниң көплүкини, хитай мәркизи һөкүмитиниң уйғур районидики райондики әмәлдарлириға муқимлиқ мәсилисидә халиғанчә бир тәрәп қилиш һоқуқини бәргәнлики билән мунасивәтлик дәп қариса, йәнә бәзи көзәткүчиләр, районниң узун мәзгилдин буян қанунға тайинип әмәс, шоар вә чақириққа тайинип идарә қилиниши билән алақидар, дәп қаримақта.

Улар йәнә охшаш сиясәт, охшаш чақириқниң охшимиған наһийә вә охшимиған йезиларда пәрқлиқ вәзийәт яритиватқанлиқи, йәни "тәрбийәләш мәркәзлири" дә тәрбийәлиниватқанлар саниниң бәзи йезиларда һәтта бәзи наһийәләрдинму көп болушиниң шу җайда вәзипә иҗра қиливатқанларниң пурсәтпәрәслик билән зич мунасивәтлик икәнликини илгири сүрмәктә.

Пәйзиватниң шаптул йезисидики бир сақчи хадими, аталмиш "иккийүзлимичи" қурбан һекимни паш қилишта кәнт вә мәһәллидики пайлақчилиридин пайдиланған. Кәнт секретари қурбан һекимни паш қилған мәһәллә башлиқи 1000 йүән билән мукапатланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт