A'ile ezalirining tutqundiki ilham toxti bilen körüshüsh telipi ret qilin'ghan

Muxbirimiz qutlan
2014.06.27
Share on WhatsApp
Share on WhatsApp
ilham-toxti-guzelnur-woeser.jpg Ilham toxti ependi tutulup kétishtin ikki kün ilgiri, tibet ayal yazghuchisi wo'eser ilham toxti ependining öyige yoqlap kelgende chüshken xatire süret. Soldin onggha: ilham toxti, ilham toxtining xanimi güzelnur we wo'eser xanim. 2014-Yili 13-yanwar, béyjing.
RFA/Méhriban


Da'iriler adwokat li fangpingni tönügün tutqundiki ilham toxti bilen tunji qétim körüshtürgen bolsimu, lékin a'ile ezalirining körüshüsh telipini ret qilghan.

Tönügündin buyan adwokat li fangping bilen wang yüning birinchi qétim ürümchiki tutup turush ornida ilham toxti bilen yüzturane körüshüshkenliki dunyawiy taratqularning diqqet merkizidin orun aldi.

Bügün ilham toxtining ayali güzelnur xanim radi'omiz ziyaritini qobul qilip, tutqundiki yoldishi ilham toxti heqqide taratqulardin orun alghan bir qisim ehwallarni delillidi.

U özining tönügün adwokat li fangping bilen téléfonda sözleshkenlikini, yoldishining hazirqi ehwali heqqide tunji qétim resmiy uchurgha érishkenlikini bildürdi:

“Tönügün adwokat li fangping yoldishim bilen yüz körüshkendin kéyin manga téléfon qilip bezi ehwallarni dédi. Uning déyishiche, yoldishim 16 kilogram oruqlap kétiptu. Ehwaldin qarighanda, tamaqtin qiynalghan we rohiy jehettinmu qattiq bésimgha duch kelgen bolsa kérek. Adwokat yoldishim bilen sözlishish jeryanida uning ikki qétim achliq élan qilghanliqini uquptu. Birinchi qétim ürümchidiki sh u a r tutup turush ornigha élip bérilghan chaghda yoldishim 10 kün tamaq tashlaptu. Ikkinchi qétim 3 - ayning bashlirida tamaq tashlaptu.”

U sözini dawamlashturup mundaq dédi: “Adwokat tutup turush ornida yoldishim bilen 4 - 5 sa'ettek sözlishiptu. Uning déyishiche, gerche yoldishim oruqlap jismaniy jehettin ajizlap ketken bolsimu, emma u yenila özining héchqandaq jinayet ötküzmigenlikide ching turiwétiptu. Adwokat uning iradisining burunqidekla ching ikenlikini tekitlep ötti.”

U yene munularni bayan qildi: “Adwokat yene ilham bilen bille tutulghan oqughuchi balilarni qoyup bérishni telep qilip da'iriler bilen sözleshken oxshaydu. U téléfonda ilhamning salametlik ehwalining yaxshi ikenlikini, méning ensirimeslikimni tapilidi. U tepsiliy ehwallarni men béyjinggha qaytip barghanda deymen. Bügün ilham bilen yene bir qétim körüshüshni telep qildim. Körüshelisem shenbe yaki yekshenbe küni béyjinggha qaytimen dégen idi. Lékin hazirghiche uning téléfoni yoq. Qarighanda, u ikkinchi qétim körishelmigen oxshaydu.”

Güzelnur xanim sözini dawamlashturup mundaq dédi: “Adwokat li fangping ürümchidiki tutup turush merkizige bérip shu yerde yoldishim bilen körüshüptu. Bu, tutup turush orni iken, resmiy türme emesken. Yoldishimning ilgiri héchqandaq késili yoq idi, u saghlam we rohiy jehettinmu jushqun bir er kishi. Adwokatning déyishiche, gerche u oruqlap ketken bolsimu, lékin salametlik ehwali yaman emesken. Emma yenila ensirep turiwatimen. Bezi ehwallarni adwokat manga démidimu, bilmidim. Chünki 16 kilo oruqlap kétish ademni teshwishke salidu.”

U yene munularni tekitlidi: “Tutup turush ornidikilerning yoldishimgha choshqa méyi arilashturulghan tamaqni bergenlikini adwokat ündidar arqiliq torgha melum qildi. Bu ish yoldishimning tamaq tashlishigha seweb bolghan bolsa kérek. Eger bu ehwal yalghan bolsa, yoldishim hergizmu bu gepni éghizgha almighan hem adwokatmu buni torgha yazmighan bolatti.”

“Men adwokattin a'ile tawabi'atlirini körüshtürüsh imkaniyitining bar - yoqliqini soridim, hazir ilhamning anisi késel. Uning yürek késili we qan bésimi bar. Men li fangpinggha méni körüshtürmisimu, lékin qéyni'anam bilen balilirimni ilham bilen körüshtürse dep telep qildim. Chünki u dégen ana. Anining qelbini men obdan chüshinimen. Lékin da'iriler hazirche peqet adwokatningla körüshüsh hoquqi bar, a'ile tawabi'atlirini körüshtürüshke bolmaydu deptu. Li fangping atushqa bérip qéyni'anamni körüp keptu.”

“Adwokat téléfonda manga hazirche jiddiyliship ketmeng, hemme ehwallarni béyjinggha qaytip kelgende deymen dédi. U bezi ehwallarni birinchi qétimliq körüshüshte toluq uqalmidim, hazir ikkinchi qétim ilham bilen körüshüshni telep qildim. Körüshüp bolsamla béyjinggha qaytimen dédi.”

Güzelnur xanim axirida munularni bildürdi: “Yoldishim bu yil 1 - ayning otturilirida öyimizdin tutup kétilgendin buyan, meyli béyjing sheherlik saqchi yaki dölet xewpsizlik xadimliri we yaki mektep rehberliki bolsun, bu heqte méning bilen sözliship baqmidi. Méning yaki balilirimning shundaqla bashqa uruq - tughqanlirimizning shundin buyan ilham bilen körüshüsh imkaniyitimiz bolmidi. Qizim hazir amérikida, öyde ikki kichik balam bilen yalghuz qaldim. Heqiqeten manga éghir keldi. Lékin men pushayman qilmaymen. Chünki yoldishimning tutqan yolini toghra dep bilgenlikim üchün uni qollap kelgenmen.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.