Uyghur ziyaliyliri xitay da'irilirini ilham toxtini qoyup bérishke chaqirdi

Muxbirimiz méhriban
2014-01-23
Share
ilham-toxti-guzelnur.jpg Ilham toxti ependi tutulup kétishtin ikki kün ilgiri xanimi güzelnur bilen öz öyide. 2014-Yili 13-yanwar, béyjing.
RFA/Méhriban

23-Yanwar küni ilham toxti ependining tutqun qilghinigha 9 kün boldi. Emma xitay hökümet da'iriliri ilham toxti ependining tutqun qilinishining sewebi we uning nege qamalghanliqi heqqide héchqandaq uchur bermidi.

Bügün ilham toxti ependining ayali güzelnur xanim we chet'ellerdiki Uyghur ziyaliyliridin élshat hesen ependi hemde qeyser mijit ependi qatarliqlar radi'oyimizning ziyaritini qobul qilip, xitay hökümet da'irilirini ilham toxti ependi heqqide xelq'aragha  qayil qilarliq jawab bérishke chaqirdi.

Bügün etigen radi'omiz ziyaritini qobul qilghan güzelnur xanim da'irilerning, éri ilham toxtini tutqun qilghinigha 9 kün bolghan bolsimu, emma yenila uni néme üchün tutqun qilghanliqini we tutqun qilin'ghan Uyghur oqughuchilar heqqide uchur bérishni ret qilghanliqini bildürüp, ilham toxtining ehwaligha köngül bölüwatqan barliq dostlarni ilham ependining dérikini qilishqa chaqirdi.

Bügün yene Uyghur ziyaliyliridin amérikidiki siyasiy analizchi élshat hesen ependi we bostun xarward uniwérsitétida doktorluq oquwatqan qeyser ependilermu radi'omiz Uyghur bölümining ziyaritini qobul qilip, xitay da'irilirini ilham toxti ependi heqqide dunya jama'etchilikige qana'etlinerlik jawab bérishke chaqirdi.

Söhbitimiz jeryanida élshat ependi xitay da'irilirining ilham toxtini tutqun qilishining, emeliyette Uyghurlargha qaratqan siyasitidiki zor bir xataliq ikenlikini eskertip, xitay hökümitini ilham toxtini shertsiz qoyup bérishke chaqirdi.

Ilham toxti ependi tutqun qilin'ghandin buyan feysbok qatarliq ammiwi tor béketliride uni qoyup bérish chaqiriqigha imza toplashta aktip pa'aliyet élip bériwatqan qeyser ependi bolsa, ilham toxti ependi we uning a'ilisi tölewatqan éghir bedelni eskertip, her bir Uyghurning öz xelqi üchün barliqini béghishlighan ilham toxtidek biri üchün sözlesh mes'uliyiti barliqini tekitlesh bilen bille, özining bir Uyghur bolush süpiti bilen ilham toxti we uning a'ilisige semimiy rehmitini bildürdi.

Yuqiridiki awaz ulinishidin söhbetning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet