Güzelnur: “Ürümchi saqchi idarisining érim ilhamning ma'ashini tonglatqanliqi qanunsizliq”

Muxbirimiz méhriban
2014.03.27
Share on WhatsApp
Share on WhatsApp
ilham-toxti-guzelnur.jpg Ilham toxti ependi tutulup kétishtin ikki kün ilgiri xanimi güzelnur bilen öz öyide. 2014-Yili 13-yanwar, béyjing.
RFA/Méhriban

Ilham toxti ependi 15-yanwar tutqun qilin'ghandin buyan da'iriler her xil yollar arqiliq uning ayali güzelnur xanimgha qaratqan bésimni kücheytkenliki melum bolmaqta.

Ilham toxtining ayali güzelnur xanim mushu künlerde éghir rohi bésimgha uchrighandin bashqa, iqtisadiy bésimghimu uchrawatqanliqini bildürdi. U ilham ependining mektep teripidin bérilidighan ma'ashi ürümchi saqchi da'irilirining buyruqi bilen tonglitiwétilgenlikini, adwokat li fangping arqiliq ürümchi saqchi da'irilirining bu xil qanunsiz bu qilmishini sürüshtürüsh qararigha kelgenlikini bildürdi.

“Bir hepte ilgiri, ürümchi saqchi idarisi érim ilham toxtining ma'ashini béridighan bankigha uqturush qilip, uning mekteptin normal bériliwatqan ma'ashini tonglatqanliqini uqtum. Men adwokat li fangping arqiliq ürümchi saqchi idarisining bu xil qanunsiz qilmishi üstidin erz qilish qararigha keldim.”

Yuqiriqilar güzelnur xanimning 27-mart küni radi'omiz ziyaritini qobul qilghanda dégen sözliri.

Güzelnur xanim sözide éri ilham ependi tutqun qilin'ghandin buyan, da'irilerning uninggha qaratqan nazaretni kücheytkendin bashqa, nöwette yene iqtisadiy jehettinmu bésim ishlitishke bashlighanliqini bildürdi.

Güzelnur xanimning bildürüshiche, ilham toxti ependi ürümchi saqchi idarisi teripidin bu yil 15-yanwar küni tutqun qilin'ghandin kéyin, ötken hepte da'iriler ilham ependining merkizi milletler uniwérsitétidin bériliwatqan ma'ashinimu tonglitish buyruqi bergen. 21-Mart peyshenbe küni ilham ependining ma'ashini élish üchün bankigha barghan güzelnur xanim, ma'ash kartisigha 3-ayliq ma'ashi kirgen turuqluq, pul alalmighandin kéyin, banka xadimliridin buning sewebini sürüshtürgen. Banka xadimi uninggha mektepning ilham ependining ma'ashini uning hésabatigha kirgüzgen bolsimu, emma ürümchi sheherlik saqchi idarisi ilham toxti namidiki hésabatni tonglitish buyruqi bergini üchün özlirining buyruqni ijra qilishqa mejbur ikenlikini bildürgen.

Ilham ependining adwokati li fangping güzelnur xanimgha ürümchi sheherlik saqchi idarisining bu qilmishining xitay qanunigha xilap ikenlikini bildürüp, özining yéqin arida ilham ependi bilen körüshüsh üchün ürümchige barghanda bu mesilini otturigha qoyidighanliqini we munasiwetlik orunlardin sewebini sürüshtürüp, hökümettin bu mesile heqqide éniqlima bérishni telep qilidighanliqini bildürgen.

Güzelnur xanim yene ilham ependi tutqun qilin'ghandin buyan, da'irilerning uning atushtiki uruq-tughqanliri we tonushlar arqiliq uning yurti atushqa qaytip kétishini qayta-qayta tewsiye qilghanliqini bildürüp, özining ilgiri bu xil teleplerni ret qilghanliqi üchün, ürümchi saqchi idarisining ilham ependining ma'ashini tonglitish buyruqi chüshürüsh arqiliq, uni béyjingdin ayrilishqa mejburlimaqchi bolghan bolushi mumkinlikini, emma özining béshigha herqandaq éghir künler kélishidin qet'iynezer béyjingdin ayrilmaydighanliqini bildürdi.

Güzelnur xanim béyjing merkizi milletler uniwérsitétining mektep kutupxanisida ishleydighan bolup, ilham toxti ependi tutqun qilin'ghandin kéyin, béyjingdek istémal sewiyisi yuqiri bolghan sheherde uninggha oxshash kutupxana xizmetchisining 2000 somluq ma'ashi bilen, yesli yéshidiki ikki bala we amérikida oquwatqan qizi jewherning oqush rasxodini ghemlesh güzelnur xanimgha éghir iqtisadiy bésim élip kelgen. Melum bolushiche, güzelnur xanim 6 yashliq chong oghlining her ayliq oqush puli üchün 600 som xelq puli, 4 yashliq kichik oghlining yesli puli üchün éyigha 1100 som töleydighan bolup, ilham ependi tutqun qilin'ghandin buyan éghir rohi bésim ichide yashawatqan güzelnur xanim üchün bu iqtisadiy yükning qoshulushi, uning bundin kéyinki hayat musapisini téximu qiyinlashturghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.