Гүзәлнур ханим: мәктәп илһамниң маашини тохтатти, назарәт вә роһи бесим оғлумни йүрәк аҗизлиқиға гириптар қилди

Мухбиримиз меһрибан
2014-05-15
Share
ilham-toxti-muash-toxtutush-uqturush.jpg Илһам тохти әпәндиниң мәктәптин берилидиған маашиниң тохтитилғанлиқи һәққидики язма уқтуруш. 2014-Йили май.
RFA

Гүзәлнур ханим 15-май күни радиомиз зияритини қобул қилип, мәктәп даирилириниң уқтуруш чүшүрүп ери илһам тохтиниң маашини рәсмий тохтатқанлиқи вә 8 яшқа толмиған чоң оғлиниң йүрәк аҗизлиқиға гириптар болуши бу аилигә еғир күлпәтләрни елип кәлгәнликини билдүрди.

Гүзәлнур ханимниң билдүрүшичә сақчиларниң илһам тохтини нарәсидә балиларниң көз алдида тутқун қилиши вә төт айдин буян каридорда йетип-қопуватқан назарәтчи сақчи балиларда қорқунч туйғусини техиму күчәйтивәткән болуп, бу сәвәбтин балилар кечилири йиғлайдиған һаләткә кәлгән. Дохтурниң билдүрүшичә чоң оғлиниң йүрәк аҗизлиқи кесилиму узундин буян давамлашқан еғир роһи бесим сәвәбидин шәкилләнгән.

Йеқинқи бирқанчә йилдин буян хәлқараға вә хитай пуқралириға уйғурларниң әһвалини аңлитип, хитай даирилиридин уйғурларниң қануний һәқ-һоқуқлирини тәләп қилип келиватқан мустәқил тәтқиқатчи илһам тохти әпәнди, бу йил 15-январ күни бейҗиңдики өйидин тутқун қилинғандин буян, бу аилә еғир иқтисадий бесим вә роһи бесимға дуч кәлмәктә.

Пәйшәнбә күни радиомиз уйғур бөлүми зияритини қобул қилған гүзәлнур ханим, мәктәп кадирлар бөлүминиң 25-апрел күни уни чақиртип, илһам әпәндиниң мәктәптин берилидиған маашиниң тохтитилғанлиқи һәққидики язма уқтурушни униңға бәргәнликини билдүрди.

Гүзәлнур ханимниң билдүрүшичә, мәктәп даирилири униңға илһам әпәндиниң қолға елинишиға униң өз алдиға шәхсий қурған "уйғурбиз" тор бекити сәвәб болғанлиқи үчүн мәктәпниң илһам әпәндиниң ишлирини сүрүштүрүш вәзиписиниң йоқлуқини билдүргән.

Улар йәнә илһам тохтиниң 20 нәччә йиллиқ хизмәт истажи үчүн башқа төләм пул берилмәйдиғанлиқини әскәртип, пәқәт икки балиниң беқиш һәққи үчүн хәлқ ишлар идариси тәрипидин берилидиған 2000 сом хәлқ пулиниң 5-айдин башлап қошумчә берилидиғанлиқини уқтурған.

Гүзәлнур ханим йәнә нөвәттә еғир иқтисадий бесимдин башқа йәнә илһам әпәндиниң чоң оғлиниң йүрәк аҗизлиқ кесилигә гириптар болушиму, бу аилини паракәндичиликкә салғанлиқини билдүрүп, чоң оғлини бир айдин буян мәктәпкә апармай, дохтурханида окул урғузуп давалитиватқанлиқини баян қилди.

Дохтурниң оғли һәққидики диагнози тоғрилиқ тохталған гүзәлнур ханим, илһам әпәндиниң нарәсидә балиларниң көз алдида тутуп кетилиши вә уларни 24 саәт назарәт қиливатқан сақчиларниң кечиси каридорға кариват қоюп уларниң ишики алдида ухлиши қатарлиқ амилларниң балиларда еғир роһи бесим пәйда қилип, балилар кечиси ухлаватқинида қара бесип йиғлап ойғинидиған болуп қалғандин башқа йәнә, чоң оғлиниң йүрәк аҗизлиқ кесилигә гириптар болғанлиқини билдүрди.

Даириләрниң бу аилигә кәлтүргән һәр хил бесимлириға наразилиқини билдүргән гүзәлнур ханим йәнә, өзиниң хәлқара мәтбуатларға һәқиқий әһвални баян қилиш ирадисидин янмайдиғанлиқини вә адвокат арқилиқ мунасивәтлик орунларға наразилиқ әрзи беришкә тәйярлиниватқанлиқини билдүрди.

Хитай һөкүмитидин уйғурларниң қануний һәқ-һоқуқлирини тәләп қилған илһам әпәнди 15-январ күни бейҗиңдики өйидин тутқун қилинғиниға төт айдин ашқан болсиму, даириләр һазирғичә униң аилисидикиләрниң вә адвокатиниң униң билән көрүшүшигә йол қоймай кәлмәктә.

Хитай даирилири униң бөлгүнчиликкә қутратқулуқ қилиш гумани билән қолға елинип тәкшүрүлүватқанлиқини билдүргән болсиму, әмма хәлқара кишилик һоқуқ тәшкилатлири вә ғәрб демократик дөләтлири униң тинчлиқ йоли арқилиқ өз миллитиниң қануний һәқ -һоқуқлирини тәләп қилған бир зиялий икәнликини тәкитләп, хитай һөкүмитидин илһам тохтини гунаһсиз дәп қоюп беришни үзлүксиз тәләп қилип кәлмәктә.

Илһам тохти әпәнди америка қәләмкәшләр җәмийити тәрипидин берилгән 2014-йиллиқ "голдимиш әркинлик мукапати" ға еришкән болуп, 5-май күни ню йоркта өткүзүлгән мурасимда, дадисиға вакалитән мукапатни тапшурувалған америка индиана университетиниң оқуғучиси җәвһәр илһамму өз нутқида, дадиси тутуп кетилгәндин буян бу аилиниң бешиға еғир иқтисадий вә роһи бесим кәлгәнликини, болупму икки укисиниң телефонда дадисиниң гепи чиқсила йиғлиши, униң йүрикини техиму қаттиқ езидиғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт