Güzelnur xanim éri ilham toxtining mexpiy sotlan'ghanliq xewirining téxi delillenmigenlikini bildürdi

Muxbirimiz méhriban
2014.06.20
Share on WhatsApp
Share on WhatsApp
ilham-toxti-guzelnur-woeser.jpg Ilham toxti ependi tutulup kétishtin ikki kün ilgiri, tibet ayal yazghuchisi wo'eser ilham toxti ependining öyige yoqlap kelgende chüshken xatire süret. Soldin onggha: ilham toxti, ilham toxtining xanimi güzelnur we wo'eser xanim. 2014-Yili 13-yanwar, béyjing.
RFA/Méhriban


20 - Iyun jüme küni radi'omiz ziyaritini qobul qilghan güzelnur xanim, bu hepte tarqalghan ilham toxtining mexpiy sotlan'ghanliqi heqqidiki xewerning téxi delillenmigenlikini bildürdi. Güzelnur xanim yéqinda adwokat li fangpingning ilham ependining ehwalini sürüshte qilish üchün ürümchige baridighanliqini, emma özining hazir ürümchige yaki yurti atushqa bérish heqqide héchqandaq qarar almighanliqini bildürdi.

Ziyaritimiz jeryanida güzelnur xanim yene, özi we balilarning ehwali heqqidimutoxtilip, öyining télifon alaqisining pat - pat üzülüp qéliwatqanliqi, her xil bésimlar sewebidin yürek ajizliqigha giripdar bolghan oghlini yenila dawalitiwatqanliqini bildürüp, da'irilerdin éri ilham toxtining ehwalini dunyagha ashkarilashni, uning sotini ochuq - ashkara, adil élip bérishni telep qilidighanliqini bildürdi.

16 - Iyun düshenbe künidin bashlap, bir qisim metbu'atlarda bu yil 15 - yaniwar küni béyjingdiki öyidin tutqun qilin'ghan, tonulghan Uyghur ziyaliysi ilham toxti ependining mexpiy sotlan'ghan bolushi mumkinliki heqqidiki xewer tarqaldi. En'giye gwardiyan géziti, jenubiy xitay géziti qatarliqlar xewiride ilham toxtining a'ilisidikilerning telipi bilen, ilham toxtigha adwokatliq qilishni üstige alghan adwokat li fangpingning sözi neqil élinip,“Da'iriler teripidin tutqun qilinip, besh aydin buyan a'ilisi we adwokat bilen körüshtürülmigen, hazirghiche héchqandaq uchuri bolmighan ilham ependining belkim Uyghur rayonidiki bingtüen'ge qarashliq melum sotta mexpiy sotlan'ghan bolushi mumkinliki, emma xitay hökümet da'irilirining ilham toxtining yéqinqi ehwali heqqide héchqandaq resmiy bayanat bermigenliki” ilgiri sürülgen idi.

Biz ilham toxtining ayali güzelnur xanimdin ehwal igilesh üchün, uning béyjingdiki öyige we qol téléfonigha köp qétim téléfon qilghan bolsaqmu, emma téléfon üzlüksiz taqaq halette bolup, téléfon ulanmighan idi. 20 - Iyun jüme küni güzelnur xanim radi'omiz ziyaritini qobul qildi.

Güzelnur xanim söhbet jeryanida, ilham ependining mexpiy sotlan'ghanliq xewiri tarqalghanliqini anglighan bolsimu, emma bu xewer xitay hökümet da'iriliri teripidin téxi delillenmigenliki üchün adwokat li fangpingning eng yéqin ariliqta ürümchige ehwal igileshke baridighanliqini, hazirche özining ürümchige yaki yurti atushqa bérish niyitining yoqluqini bildürdi.

Yoqiridiki awaz ulinishidin güzelnur xanim bilen ötküzülgen söhbetning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.