Ilham toxtigha türk dunyasi insan heqliri erkinlik mukapati bérish qarar qilindi

Ixtiyariy muxbirimiz erkin tarim
2014-10-29
Share
ismail-gaspirali-xelqara-insan-heqliri-erkinlik-mukapati.jpg "Isma'il gaspirali xelq'ara insan heqliri erkinlik mukapati" médali'oni.
RFA/Erkin Tarim

Türk dunyasi zhurnalistlar jem'iyiti teripidin tesis qilin'ghan "Isma'il gaspirali xelq'ara insan heqliri erkinlik mukapati" ni ilham toxtigha bérish qararlashturuldi. Bu mukapat shimali siprus türk jumhuriyiti dölet bashliqi derwish eroghlu, qirim tatarlirining lidiri mustafa jemil qirimli'oghlu, ezerbeyjan parlamént ezasi pashayéwa xanimgha oxshash siyasetchilerdin bashqa yene 7 yashliq Uyghur mujahit qeshqerligimu bérilidiken.

2014-Yili b d t medeniyet, ilim-pen we ma'arip teshkilati teripidin "Isma'il gaspirali yili" bolup élan qilin'ghanliqi munasiwiti bilen türk dunyasining herqaysi jaylirida bu heqte her xil pa'aliyetler ötküzülmekte. Bu munasiwet bilen türk dunyasi zhurnalistlar jem'iyiti isma'il gaspirali ilmiy muhakime yighini chaqirmaqchi. Yighin axirida "Isma'il gaspirali xelq'araliq insan heqliri we zhurnalistlar mukapati" tarqitilmaqchi.

Mutexessislerning éytishiche bu mukapat türk dunyasida tesis qilin'ghan xelq'araliq tunji mukapat bolup, bu mukapatning ilham toxtigha bérilishi alahide ehmiyetke ige iken.

Bu pa'aliyetni uyushturghan türk dunyasi zhurnalistlar jem'iyitining re'isi gün'gör arslan ependi yighin toghrisida melumat bérip mundaq dédi:
"2014-Yili birleshken döletler teshkilati pen-medeniyet we ma'arip komitéti teripidin isma'il gaspirali yili élan qilindi. 2014-Yili isma'il gaspiralining wapat bolghanliqigha 100 yil bolghan yil bolghachqa qirim, türkiye we bashqa türkiy jumhuriyetliride her xil pa'aliyetler ötküzülmekte. Biz türk dunyasi zhurnalistlar jem'iyiti bilen bartin zhurnalistlar jem'iyiti birlikte isma'il gaspirali ilmiy muhakime yighini bilen isma'il gaspirali insan heqliri mukapatini tarqitimiz. Bizning bu yighinimiz 10-ayning 30-31-künliri türkiyening bartin wilayitide ötküzülidu. Bu ikki künlük yighinda 19-esirning axiri 20-esirning bashlirida qirimda yashighan büyük peylesof, zhurnalist, yazghuchi isma'il gaspiralining hayati, idiyisi we uning türk dunyasigha körsetken tesiri toghrisida mulahiziler yürgüzülidu. Bu yighin bartin uniwérsitétida ötküzülidu."

Türk dunyasi zhurnalistlar jem'iyiti re'isi gün'gör yawuzarslan ependi, bu qétimqi mukapatning türk dunyasidin köp sanda siyasetchi, zhurnalist we ziyaliylargha bérilidighanliqini bayan qilip mundaq dédi:
"Isma'il gaspirali zhurnalistliq we insan heqliri mukapati tunji qétim 11-ayning 1-küni chong murasim bilen bérilidu. 2014-Yili bérilidighan mukapatlar insan heq we hoquqliri we zhurnalistliq mukapati. Bu mukapat birleshken döletler teshkilati pen-ma'arip komitétining yardimi bilen emeliyleshtürülidu. Bu yilqi insan heqliri mukapati siprus türk jumhuriyeti re'isi derwish eroghlugha, qirim tatarlirining lidiri abdujemil qirimoghlugha bérilmekchi. Iraq türkmen qurultiyigha, ezerbeyjan parlamént ezasi pashayéwa xanimgha, süriye türkmenliri milliy qurultiyigha we türk dunyasi üchün qelem tewritiwatqan köp sanda zhurnalistlargha bu mukapatni bérimiz"

U yene, türmide yétiwatqan ilham toxti bilen chet'elde shé'ir déklamatsiye qilish arqiliq Uyghurlarni tonutuwatqan mujahit qeshqerligimu bu mukapatni béridighanliqini bayan qilip mundaq dédi:
"Xitayda türmide yétiwatqan yazghuchi we ilmiy tetqiqatchi ilham toxti ependige türk dunyasi zhurnalistlar erkinlik mukapati bérimiz. Hemmimizge melum bolghinidek ilham toxti xitay zulumi astida yashawatqan Uyghur türklirining heq we hoquqini qoghdighuchi muhim bir shexs. Biz 4 yashtin béri türkiyede shé'ir déklamatsiye qilip türklerning qelbide orun alghan mujahit qeshqerligimu bu mukapatni bérishni muwapiq körduq."

Bu ilham toxtigha bérilgen ikkinchi xelq'araliq chong mukapat hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet