Ilham toxtini 2017-yilliq kishilik hoquq mukapatlirigha körsitish xizmetliri bashlandi

2016-Yili 11-öktebir küni xitay türmisidiki Uyghur öktichi ziyaliysi ilham toxtigha “Martin ennalis kishilik hoquq mukapati” bérilgenliki élan qilindi.

Melum bolushiche nöwette ilham toxtining ish-izlirini tonushturush, ilham ependini yene “Saxarof erkinlik mukapati” qatarliq bashqa kishilik hoquq mukapatlirigha körsitish xizmetliri jiddiy élip bériliwatqan bolup, chet'ellerdiki Uyghur pa'aliyetchiliridin gérmaniyediki “Ilham toxti guruppisi” ning mes'ulliridin biri enwerjan ependi, türkiyediki pa'aliyetchi hamutxan köktürük ependi we xitay démokratliridin saw yashö xanimlar radi'omiz ziyaritini qobul qilip, özlirining bu heqte ishlewatqan xizmetliri toghruluq melumat berdi.

Gérmaniyede qurulghan ilham toxti guruppisining mes'ulliridin biri enwerjan ependi, mezkur guruppa qurulghandin buyan, ilham toxti ependining idiyisi we uning ish-izlirini yawropa parlaménti, gérmaniye döliti qatarliq gherb démokratik dölet hökümetliri we kishilik hoquq teshkilatlirida tonushturush xizmitining ching tutulghanliqini bildürüp, ilham toxtigha béghishlan'ghan bir qatar xelq'araliq pa'aliyetler we yighinlarning orunlashturulghanliqini, ilham toxti ependini “Saxarof erkinlik mukapati” qatarliq gherb döletliride tesis qilin'ghan kishilik hoquq mukapatlirigha körsitish xizmitining élip bériliwatqanliqi qatarliq ehwallarni anglatti.

Amérikida pa'aliyet élip bériwatqan “Xitaydiki özgirish” torining sahibi saw yashö xanim ilham toxti ependige erkinlik telep qilish we uni saxarof erkinlik mukapatigha körsitish teshebbusini deslep otturigha qoyghan xitay démokratliridin biridur. Saw yashö xanim ilham toxti mesilisini xelq'aralashturushning muhim ehmiyitini tekitlesh bilen birge yene ilham toxti idiyisini xitay puqralirigha tonushturushning Uyghur mesilisini xitay xelqige anglitish we xitayda démokratiye idiyisining téximu keng tarqilishida muhim ehmiyetke ige ikenlikini tekitlidi.

Türkiyede pa'aliyet élip bériwatqan Uyghur pa'aliyetchiliridin hamutxan köktürük ependi, nöwette türkiyedimu ilham toxti idiyisi we Uyghur weziyiti heqqide taratqulardimu mexsus programmilar bériliwatqanliqini, emma buning yenila yéterlik emeslikini bildürüp, ilham toxti mesilisini türkiyediki kishilik hoquq teshkilatliri we her xil ammiwi teshkilatlarning xizmet kün tertipige ekélish, ilham toxtini türk dunyasidiki kishilik hoquq mukapatlirigha körsitishning zörürlükini tekitlidi.

U yene, türk xelqi we hetta ottura asiyadiki türki tilliq xelqler arisida Uyghurlar toghrisida söz bolun'ghanda ilham toxti tilgha élinidighan weziyetning shekillinishining tolimu zörürlükini tekitlidi.

Hamutxan köktürük ependi yene, chet'ellerdiki Uyghur teshkilatliri we musteqil pa'aliyet élip bériwatqan Uyghur ziyaliylirining ilham toxti mesilisini öz shara'iti yar bergen ehwalda anglitishining ilham toxtining baldurraq erkinlikke érishishige imkaniyet yaritipla qalmastin, belki Uyghur mesilisining xelqaralishishida muhim ehmiyetke ige ikenlikini bildürdi.

Tepsilatini yuqiriqi awaz ulinishidin anglang.